മുംബൈ ഓഹരി സൂചികയായ സെന്സെക്സ് 23 പോയിന്റ് ഉയര്ന്ന് 16990.76ലും ദേശീയ സൂചികയായ നിഫ്റ്റി 7.25 പോയിന്റ് കൂടി 5149.15ലും വില്പ്പന അവസാനിപ്പിച്ചു.
ഓഹരികള് വിറ്റഴിക്കുമെന്ന എച്ച്എസ്ബിസിയുടെ തീരുമാനം ആക്സിസ് ബാങ്കിന്റെയും യെസ് ബാങ്കിന്റെയും ഓഹരികളെ പ്രതികൂലമായി ബാധിച്ചു. വില്പ്പന സമ്മര്ദ്ദത്തെ തുടര്ന്ന് രണ്ട് ഓഹരികളും രണ്ടു ശതമാനത്തിലധികം താഴോട്ടിറങ്ങി. ഉച്ചകോടി നടക്കുന്നതിനാല് യൂറോപ്യന് വിപണിയില് നിന്ന് യാതൊരു വിധ പിന്തുണയും ലഭിച്ചില്ലെന്നതും തിരിച്ചടിയായി.
ബജാജ് ഫിന്സെര്വ് ലിമിറ്റഡ്, എംഎംടിസി ലിമിറ്റഡ്, സെഞ്ച്വറി ടെക്സ്റ്റൈല്സ്, ഇന്ത്യന് ഹോട്ടല്സ് കോ, യുനൈറ്റഡ് ബ്രിവറീസ് ലിമിറ്റഡ് ഓഹരികള് മൂന്നു മുതല് അഞ്ചു ശതമാനം വരെ നേട്ടമുണ്ടാക്കി.
നഷ്ടക്കാരുടെ പട്ടികയില് ജയപ്രകാശ് പവര് വെഞ്ച്വറാണ് മുന്നിലെത്തിയത്. കഴിഞ്ഞ കുറെ ദിവസങ്ങളായി മികച്ച കുതിപ്പ് നടത്തുന്ന മണപ്പുറം ഫിനാന്സ് 3.17 ശതമാനത്തോളം താഴോട്ടിറങ്ങി. രുചി സോയ ഇന്ഡസ്ട്രീസ്, സെസാ ഗോവ കമ്പനികള്ക്കും തിരിച്ചടിയേറ്റു.
റിലയന്സ് ഇന്ഡസ്ട്രീസ് ഓഹരികള്ക്ക് ചെറിയ തോതില് ഇടിച്ചില് തട്ടി. ടാറ്റാ സ്റ്റില് 1.83 ശതമാനം നേട്ടത്തോടെ 428.40ല് ക്ലോസ് ചെയ്തു.