ന്യൂഡല്ഹി: പാസഞ്ചര് വാഹനങ്ങളില് വിറ്റാരയും. മാരുതി സുസുകിയുടെ കോംപാക്ട് എസ്യുവി വിറ്റാര ബ്രസ്സ പാസഞ്ചര് വെഹിക്കിള്സിന്റെ ടോപ് സെല്ലിംഗ് പട്ടികയിലെ ആദ്യ പത്തില് ഇടംപിടിച്ചു.
മേയ് മാസത്തെ കണക്കനുസരിച്ച് മാരുതിക്ക് മികച്ച നേട്ടമാണുള്ളത്. മാരുതിയുടെ ഏഴു മോഡലുകള് ആദ്യ പത്ത് സ്ഥാനങ്ങളിലുണ്ട്. കഴിഞ്ഞ വര്ഷം ഇതേ സമയത്ത് മാരുതിയുടെ നാല് മോഡലുകള് മാത്രമേ ലിസ്റ്റിലുണ്ടായിരുന്നുള്ളൂ.
വാഹന നിര്മാതാക്കളുടെ സംഘടനയായ സൊസൈറ്റി ഓഫ് ഇന്ത്യന് ഓട്ടോമൊബൈല് മാനുഫാക്ചേഴ്സ് അസോസിയേഷന്റെ (സിയാം) കണക്കനുസരിച്ച് ടൊയോട്ട കിര്ലോസ്കര് മോട്ടോഴ്സിന്റെ പുതിയ വാഹനമായ ഇന്നോവ ക്രിസ്റ്റയും ആദ്യ പത്തില് ഇടം പിടിച്ചിട്ടുണ്ട്. പട്ടികയില് ഒമ്പതാം സ്ഥാനത്താണ് ക്രിസ്റ്റ.ബ്രസ്സ പത്താം സ്ഥാനത്താണ്.
പട്ടികയില് ഒന്നാം സ്ഥാനത്ത് ആള്ട്ടോയാണ് തുടരുന്നത്. മാരുതിയുടെ കോംപാക്ട് സെഡാനായ സ്വിഫ്റ്റ് ഡിസയര് രണ്ടാം സ്ഥാനത്തും ഹാച്ച്ബാക്ക് മോഡലുകളായ വാഗണ് ആര് മൂന്നാം സ്ഥാനത്തും സ്വിഫ്റ്റ് നാലാം സ്ഥാനത്തുമാണ്. പ്രീമിയം ഹാച്ച്ബാക്ക് മോഡലായ ബലേനോ ഏഴാം സ്ഥാനത്തും ഹാച്ച് ബാക്ക് സെലേറിയോ എട്ടാം സ്ഥാനത്തുമാണ്.
ഹ്യുണ്ടായി ഗ്രാന്ഡ് ഐ10 അഞ്ചാം സ്ഥാനത്തും എലൈറ്റ് ഐ20 ആറാം സ്ഥാനത്തുമാണ്.19,874 ആള്ട്ടോ കാറുകള് പോയ മാസം നിരത്തിലിറങ്ങിയിരുന്നു.