ന്യൂഡല്ഹി: രാജ്യത്ത് റിലയന്സ് ജിയോ തുടക്കമിട്ട താരിഫ് യുദ്ധത്തിന് അതേ നാണയത്തില് മറുപടി പറഞ്ഞ് എയര്ടെല് രംഗത്ത്. 90 ദിവസം അണ്ലിമിറ്റഡ് 4 ജി സേവനം നല്കുന്ന സെപ്ഷ്യല് ഡേറ്റാ പാക്ക് എയര്ടെല് അവതരിപ്പിച്ചു.
പ്രത്യേക പാക്കിന് 1,495 രൂപയാണ് എയര്ടെല് 4 ജി ഉപഭോക്താക്കള് നല്കേണ്ടി വരുക.
ആദ്യം ഡല്ഹിയില്
നിലവില് ഡല്ഹിയില് മാത്രമാണ് ഓഫര് അവതരിപ്പിച്ചിരിക്കുന്നത്. ഇതിനുശേഷം വളരെപ്പെട്ടന്നുതന്നെ രാജ്യത്തിന്റെ മറ്റുഭാഗങ്ങളിലേക്ക് ഈ സേവനം വ്യാപിപ്പിക്കും.
ബിഎസ്എന്എല്ലും മത്സരിക്കാന്
ബിഎസ്എന്എല് ജനുവരി മുതല് കോള് താരിഫ് എടുത്തുകളയും എന്ന സൂചന നല്കിയതിന് പിന്നാലെയാണ് എയര്ടെല് സ്പെഷ്യല് ഓഫര് അവതരിപ്പിച്ചിരിക്കുന്നത്.4ജി യൂസര്മാര്ക്ക് മാത്രമായുള്ള ജിയോയില് നിന്നും വ്യത്യസ്തമായി 2 3ജി,2ജി ഉപയോക്താക്കള്ക്ക് ഫ്രീകോള് വാഗ്ദാനമാണ് ബിഎസ്എന്എല് മുന്നോട്ട് വയ്ക്കുന്നത്.
ബിഎസ്എന്എല്ലില് ആകര്ഷക ഓഫറുകള്
ജിയോയുടെ 149 രൂപയുടെ ബേസ് പ്ലാനിലേക്കാള് തുച്ഛവുമായിരിക്കും ബിഎസ്എന്എല് താരിഫുകള്. പുതുവര്ഷത്തിലാണ് പുതിയ താരിഫുകള് അവതരിപ്പിക്കുക. ജിയോ തരംഗത്തെ നേരിടാന് നേരത്തെ 1,099 രൂപയ്ക്ക് അണ്ലിമിറ്റഡ് 3ജി ഡേറ്റാ പ്ലാന് ബിഎസ്എന്എല് പുറത്തിറക്കിയിരുന്നു.
റിലയന്സ് ജിയോ തരംഗം
മൂന്ന് മാസം അണ്ലിമിറ്റഡ് ഇന്റര്നെറ്റും വോയ്സ് കോളും നല്കിയാണ് ജിയോ ഇന്ത്യന് ടെലികോം രംഗത്തെ ഞെട്ടിച്ചത്. പ്രതിദിനം 4ജിബി 4ജി ഡേറ്റാ ഫ്രീയായി ഉപയോഗിക്കാം. ഡിസംബര് 31 വരെയാണ് സൗജന്യ ഓഫര്. അതുകഴിഞ്ഞാല് ഡാറ്റാ പ്ലാനുകള് തെരഞ്ഞെടുക്കണം.
മത്സരം കടുത്തു
ബിഎസ്എന്എല്ലിന് ശേഷം എയര്ടെലും താരിഫ് കുറയ്ക്കാന് മുന്നിട്ടിറങ്ങിയതോടെ ഐഡിയ, വോഡഫോണ് തുടങ്ങി മറ്റ് ടെലികോം കമ്പനികളെല്ലാം ഇനി പ്രതിസന്ധിയിലാവും. ജിയോ ഉയര്ത്തിവിട്ട മത്സരം നേരിടണമെങ്കില് ഇനിയും കമ്പനികള് ആനുകൂല്യങ്ങള് നല്കേണ്ടി വരും.