ടി സി എസ് സിഇഒ, എന്‍ ചന്ദ്രശേഖരന്‍ ടാറ്റ സണ്‍സിന്റെ പുതിയ ചെയര്‍മാന്‍

സൈറസ് മിസ്ത്രി പുറത്തായപ്പോള്‍ രത്തന്‍ ടാറ്റയായിരുന്നു പദവി കൈകാര്യം ചെയ്തിരുന്നത്. പുതിയ ചെയര്‍മാനെ ഉടന്‍ പ്രഖ്യാപിക്കുമെന്ന് ഗ്രൂപ്പ് നേരത്തെ അറിയിച്ചിരുന്നു.

2009 മുതല്‍ ടിസിഎസിന്റെ മേധാവിയാണ് 53 കാരനായ ചന്ദ്രശേഖരന്‍. 1987 ലാണ് നടരാജന്‍ ചന്ദ്രശേഖരനെന്ന എന്‍.ചന്ദ്രശേഖരന്‍ ടിസിഎസില്‍ ചേരുന്നത്. നേരത്തെ സൈറസ് മിസ്ത്രിയെ പുറത്താക്കിയപ്പോള്‍ ചന്ദ്രശേഖരനെ ടാറ്റാസണ്‍സ് ഡയറക്ടര്‍ ബോര്‍ഡില്‍ നിയമിച്ചിരുന്നു. തമിഴ്നാട്ടിലെ നാമക്കല്‍ സ്വദേശിയായ ചന്ദ്രശേഖരന്‍ കോയമ്പത്തൂര്‍ ഇന്‍സ്റ്റിറ്റ്യൂട്ട് ഓഫ് ടെക്നോളജി, ട്രിച്ച് റീജണല്‍ എന്‍ജിനീയറിംഗ് കോളേജ് എന്നിവിടങ്ങളിലാണ് പഠനം പൂര്‍ത്തിയാക്കിയത്.

കഴിഞ്ഞ ഒക്ടടോബറിലാണ് സൈറസ് മിസ്ത്രിയെ ടാറ്റ സണ്‍സ് തലപ്പത്തുനിന്ന് പുറത്താക്കിയിരുന്നത്. സൈറസ് മിസ്ത്രിയുടെ പുറത്താക്കലുമായി ബന്ധപ്പെട്ട് നിയമപോരാട്ടങ്ങള്‍ തുടരുന്നതിനിടയിലാണ് പുതിയ നിയമനം വരുന്നത്. നാലുവര്‍ഷം മുമ്പാണ് ടാറ്റാ കുടുംബാംഗമല്ലാത്ത സൈറസ് മിസ്ത്രി ചെയര്‍മാനായി ചുമതലയേറ്റിരുന്നത്.

നൂറോളം സംരംഭങ്ങളും ആറുലക്ഷം ജീവനക്കാരും 7,00,000 കോടി രൂപയോളം ആസ്തിയുമുള്ള ടാറ്റാ ഗ്രൂപ്പിന്റെ ഹോള്‍ഡിങ് കമ്പനിയാണ് ടാറ്റാ സണ്‍സ്.

വിജയിക്കാന്‍ കഴിയുന്ന മികച്ച ബിസിനസ്സ് ആശയങ്ങള്‍ വേണോ?