ജിഎസ്ടി 2017 ജൂലൈ ഒന്നു മുതല് പ്രാബല്യത്തില് വരുമെന്ന് കേന്ദ്ര സര്ക്കാര് അറിയിച്ചു. രാജ്യത്താകമാനം ഒറ്റ പരോക്ഷനികുതി സമ്പ്രദായം ഏര്പ്പെടുത്താന് കേന്ദ്ര സര്ക്കാര് ആവിഷ്കരിച്ച ആശയമാണ് ജിഎസ്ടി. ചരക്കുസേവന നികുതി ജൂലൈ ഒന്നോടെ നടപ്പാക്കാമെന്ന് സംസ്ഥാന സര്ക്കാരുകള് സമ്മതിച്ചിട്ടുണ്ടെന്ന് കേന്ദ്ര സാമ്പത്തികകാര്യ സെക്രട്ടറി ശക്തികാന്ത ദാസ് പറഞ്ഞു. ഇതോടെ ജിഎസ്ടി ജൂലൈ ഒന്നിന് പ്രാബല്യത്തില് വരുമോയെന്ന ആശങ്കകള്ക്ക് വിരാമമായി.
സംസ്ഥാന നികുതി, അന്തര് സംസ്ഥാന നികുതികള്, കേന്ദ്ര നികുതി, പ്രാദേശിക നികുതികള് എന്നിവ ഒറ്റ നികുതി സമ്പ്രദായത്തിന് കീഴിലാവുമെന്നതാണ് ജിഎസ്ടിയുടെ പ്രത്യേകത.
അവസാനം നടന്ന ജിഎസ്ടി കൗണ്സില് യോഗത്തിനുശേഷം ജൂലൈ ഒന്നോടെ ജിഎസ്ടി നടപ്പാക്കാന് ആവില്ലെന്നായിരുന്നു കേന്ദ്രസര്ക്കാര് അറിയിച്ചിരുന്നത്. ചരക്കുസേവന നികുതി നിയമത്തിനു കീഴിലുള്ള വിവിധ നിര്ദേശങ്ങളും വ്യവസ്ഥകളും പല സംസ്ഥാനങ്ങളും എതിര്ത്ത സാഹചര്യത്തിലായിരുന്നു അനിശ്ചിതത്വം നിലനിന്നിരുന്നത്.
എന്നാല്, ചരക്ക് സേവന നികുതി നിലവില്വന്നാലും ഇന്കം ടാക്സ്, കസ്റ്റംസ് തീരുവ, പെട്രോളിയം ഉല്പന്നങ്ങളുടെ ഡ്യൂട്ടി, സ്റ്റാംപ് ഡ്യൂട്ടി, രജിസ്ട്രേഷന് ടാക്സ്, മോട്ടോര് വാഹന നികുതി, തദ്ദേശസ്ഥാപനങ്ങളുടെ കെട്ടിട-തൊഴില്-എന്റര്ടെയിന്മെന്റ് നികുതികള് തുടങ്ങിയവ തുടരും.
ജിഎസ്ടി: ചരിത്രത്തിലെ ഏറ്റവും വലിയ നികുതി പരിഷ്കാരത്തെ അഭിമുഖീകരിക്കാനൊരുങ്ങി രാജ്യം