പുതിയ സീസണില് സ്വര്ണത്തിന് വില കൂടികൊണ്ടിരിക്കുകയാണെന്ന് എല്ലാവര്ക്കും അറിയാം. എങ്കിലും ഇപ്പോള് സ്വര്ണം വാങ്ങുന്നത് ബുദ്ധിപരമായിരിക്കുമെന്നാണ് വിദഗ്ധര് അഭിപ്രായപ്പെടുന്നത്. ഇത്തരം ഉപദേശങ്ങള്ക്കു പിറകില് പ്രധാനമായും നാലു കാരണങ്ങളാണുള്ളത്.
വിവിധ മേഖലകളിലെ സംഘര്ഷ സാധ്യത
വടക്കന് കൊറിയയും തെക്കന് കൊറിയയും തമ്മില് ഒരു യുദ്ധത്തിന്റെ വക്കിലാണെന്ന് എല്ലാവര്ക്കും അറിയാം. സിറിയയിലും അഫ്ഗാനിസ്താനിലും അമേരിക്ക വീണ്ടും സജീവമായിരിക്കുകയാണ്. യുദ്ധസാധ്യത പോലും സാമ്പത്തിക മേഖലയെ പ്രതികൂലമായി ബാധിക്കും. അപ്പോള് യുദ്ധ തുടങ്ങിയാലുള്ള കാര്യം പറയേണ്ടല്ലോ.. സുരക്ഷിതമായ നിക്ഷേപം എന്ന നിലയില് സ്വര്ണം ഒന്നാംസ്ഥാനത്തെത്തുന്നത് അങ്ങനെയാണ്.
രൂപയുടെ വിലയിടിവ്
രൂപയുടെ മൂല്യത്തില് വീണ്ടും ഇടിവുണ്ടാകുമെന്ന ആശങ്ക സജീവമാണ്. അന്താരാഷ്ട്രവിപണിയില് നിന്നു സ്വര്ണം വാങ്ങുന്നത് ഡോളര് നല്കിയാണ്. രൂപയുടെ മൂല്യം കുറയുന്നത് രാജ്യത്ത് സ്വര്ണ വില കൂടാന് കാരണമാകും.
ഫ്രാന്സിലെ തിരഞ്ഞെടുപ്പ്
ഫ്രാന്സ് യൂറോപ്യന് യൂനിയന്റെ ഭാഗമായിരിക്കുന്നതിനോട് യോജിപ്പില്ലാത്ത ഇടതുകക്ഷി നേതാവ് തിരഞ്ഞെടുപ്പില് ആധിപത്യം നേടാനുള്ള സാധ്യതയുണ്ട്. ആ രാഷ്ട്രീയ അനിശ്വിതത്വത്തിലും സ്വര്ണം തന്നെയാണ് മികച്ച നിക്ഷേപമാര്ഗ്ഗം.
അമേരിക്കന് നയങ്ങള്
അമേരിക്കയുടെ പല നയങ്ങളിലും ഇപ്പോഴും അവ്യക്തത നിലനില്ക്കുന്നുണ്ട്. ട്രംപ് സര്ക്കാര് ഇത്തരം കാര്യങ്ങളില് വ്യക്തത വരുത്തുമ്പോള് അതു സാമ്പത്തിക മേഖലയില് ചില പ്രത്യാഘാതങ്ങളുണ്ടാക്കും. ഇതു മറികടക്കാനും നിക്ഷേപകര് സ്വര്ണത്തെ ഉപയോഗപ്പെടുത്താനുള്ള സാധ്യതയുണ്ട്.