വിപ്രോ കൺസ്യൂമർ കെയർ ആൻഡ് ലൈറ്റിംഗ് കമ്പനിയുടെ മൈസൂർ യൂണിറ്റ് ഉടൻ അടച്ചുപൂട്ടും. കമ്പനി കടുത്ത നഷ്ട്ടത്തിലായതോടെയാണ് അടച്ചുപൂട്ടൽ നടപടികൾ ആരംഭിച്ചത്.
എൽഇഡി സാങ്കേതികവിദ്യ പ്രചാരം നേടിയതോടെ, കമ്പനി നിർമ്മിക്കുന്ന സിഎഫ്എൽ ഉത്പന്നങ്ങളുടെ വിപണി ഇടിഞ്ഞതാണ് കമ്പനി നഷ്ട്ടത്തിലാകാൻ കാരണം. രണ്ടു വർഷമായി സിഎഫ്എൽ ഉത്പന്നങ്ങളുടെ വിപണനത്തിൽ കടുത്ത മാന്ദ്യമുണ്ടായിട്ടുണ്ട്.
കമ്പനിയിലെ 84 ജീവനക്കാർക്കും ഈ വർഷം ആദ്യം തന്നെ വിആർഎസ് നൽകിയിരുന്നു. കമ്പനി നിർത്തലാക്കുന്ന വിവരം രണ്ടു മാസം മുമ്പ് ഗവൺമെന്റിനെയും ബന്ധപ്പെട്ട അധികൃതരെയും അറിയിച്ചിരുന്നതായും വിപ്രോ വ്യക്തമാക്കി.
ഉത്പാദനം ഗണ്യമായി കുറച്ചും മറ്റു ചെലവുകൾ ഒഴിവാക്കിയും ഒരു വർഷത്തോളമായി കമ്പനി പിടിച്ചു നിർത്താനുള്ള ശ്രമത്തിലായിരുന്നു അധികൃതർ. എന്നാൽ നഷ്ടം വീണ്ടും കൂടിയതോടെയാണ് ഉടൻ അടച്ചുപൂട്ടൽ നടത്തുന്നത്.
malayalam.goodreturns.in