ജിടിഎസ് ആനുകൂല്യങ്ങൾ ഉപഭോക്താക്കൾക്ക് ലഭ്യമാക്കുന്നതിന്റെ ഭാഗമായി ഫിയറ്റ് ക്രിസ്സ്ലർ ഓട്ടോമൊബൈൽസ് ജീപ്പുകളുടെ വില വെട്ടിക്കുറച്ചു. 18.49 ലക്ഷം വരെയാണ് കമ്പനി പ്രഖ്യാപിച്ചിരിക്കുന്ന ഇളവ്.
ഡീസൽ മോഡൽ റാങ്ക്ളറിന് 7.14 ലക്ഷം വരെയാണ് വിലക്കുറവ്. 71.59 ലക്ഷം രൂപയ്ക്ക് വിറ്റിരുന്ന വണ്ടി ഇപ്പോൾ വെറും 64.45 ലക്ഷം രൂപയ്ക്ക് ലഭിക്കും.
ഗ്രാന്റ് ചെറോക്കി ലിമിറ്റഡ് ഡീസൽ മോഡലിന് 18.49 ലക്ഷം രൂപയാണ് കമ്പനി ഇളവ് നൽകുന്നത്. 93.64 ലക്ഷം രൂപ വില വരുന്ന ഈ വണ്ടി ഇപ്പോൾ 75.15 ലക്ഷം രൂപയ്ക്ക് ലഭിക്കും. ഗ്രാൻഡ് ചെറോക്കി സമ്മിറ്റിന് 18.24 ലക്ഷത്തിന്റെ കുറവാണുള്ളത്. 1.03 കോടി വിലമതിക്കുന്ന ഈ വണ്ടി ഇപ്പോൾ 85.15 ലക്ഷം രൂപയ്ക്ക് വാങ്ങാം.
റാങ്ക്ളർ അൺലിമിറ്റഡ് പെട്രോളിന്റെ വിലയിൽ മാത്രം മാറ്റമില്ല. 56 ലക്ഷമാണ് ഇതിന്റെ ഡൽഹി ഷോറൂം വില. മെഴ്സിഡീസ് ബെൻസ്, ഔഡി, ജാഗ്വാർ ലാൻഡ് റോവർ തുടങ്ങിയവ ഉൾപ്പെടെയുള്ള വിവിധ ആഡംബര വാഹനങ്ങൾക്കും ഇന്ത്യയിൽ വിലക്കുറവ് പ്രഖ്യാപിച്ചിട്ടുണ്ട്.
malayalam.goodreturns.in