അമ്പത് ലക്ഷം രൂപയിലധികം വിലവരുന്ന സ്ഥലമോ വീടോ വില്പ്പന നടത്തിയിട്ടുണ്ടോ നിങ്ങള്? വില്ക്കുമ്പോള് ആ തുകയില് നിന്ന് ടിഡിഎസ് പിടിച്ച് ആദായ നികുതി വകുപ്പിന് നല്കിയിട്ടുണ്ടോ? ഇല്ലെങ്കില് ആദായനികുതി വകുപ്പിന്റെ നോട്ടീസ് നിങ്ങളെത്തേടി ഇപ്പോഴെത്തും. ഒരുലക്ഷം രൂപവരെ പിഴയും അടക്കേണ്ടിവരും.അടുത്തകാലത്ത് ഭൂമിയിടപാട് നടത്തിയ നിരവധി പേര്ക്ക് ആദായനികുതി വകുപ്പിന്റെ നോട്ടീസ് ഇതിനകം ലഭിച്ചുകഴിഞ്ഞു.
കാര്ഷിക രംഗം കഴിഞ്ഞാല് ഏറ്റവും കൂടുതല് തൊഴിലവസരങ്ങള് സൃഷ്ടിക്കുന്ന മേഖലയാണ് റിയല് എസ്റ്റേറ്റ്. ഇടപാടുകള് മുഴുവന് റിപ്പോര്ട്ടു ചെയ്യാതിരിക്കുക, അല്ലെങ്കില് കുറഞ്ഞ തുക റിപ്പോര്ട്ടു ചെയ്യുക തുടങ്ങി അനധികൃത ഇടപാടുകള് തടയാനാണ് ടിഡിഎസ് ഈടാക്കുന്നത്. കാര്ഷിക ഭൂമികളല്ലാത്ത 50 ലക്ഷം രൂപയോ അതില് കൂടുതലോ വില കാണിക്കുന്ന റിയല് എസ്റ്റേറ്റ് ഇടപാടുകളില് വില്പന നടത്തുന്നയാള് റെസിഡന്റ് ആണെങ്കില് വാങ്ങുന്നയാള് വില്പ്പനത്തുകയുടെ ഒരു ശതമാനം ടിഡിഎസ് സര്ക്കാരിലേക്ക് അടക്കണമെന്ന് അനുശാസിക്കുന്ന വകുപ്പ് 194-ഐഎ (1949എ) 2013ലെ ധനകാര്യ നിയമത്തിലൂടെയാണ് കൊണ്ടുവന്നത്. 2003 ജൂണ് ഒന്നിനാണ് ഇത് സംബന്ധിച്ച നിയമം പ്രാബല്യത്തിലായതെങ്കിലും പലര്ക്കും ഇതേക്കുറിച്ച് ധാരണയില്ല.
50 ലക്ഷം രൂപയില് കൂടുതല് മൂല്യമുള്ള ഇടപാടുകള്ക്കാണ് ഇത് ബാധകം. വസ്തു ഉടമയ്ക്ക് പണം നല്കുന്നതിനുമുമ്പ് ഒരുശതമാനം തുക കിഴിച്ച് അത് ആദായനികുതി വകുപ്പിന് കൈമാറണം. ഇത് ചെയ്യാന്വാങ്ങുന്നയാള് ബാധ്യസ്ഥനാണ്. ഭൂമി ഇടപാടിന്റെ മൊത്തം വില അടിസ്ഥാനമാക്കിയാണ് ടിഡിഎസ് കണക്കാക്കേണ്ടത്. ഫോം 26ക്യൂബിയാണ് ഇതിനായി ഉപയോഗിക്കേണ്ടത്.