ബംഗളൂരുവിൽ ജലനിയന്ത്രണം കടുക്കുന്നു: വെള്ളം പാഴാക്കിയാൽ പിഴയും കണക്ഷൻ വിച്ഛേദിക്കലും; അറിയേണ്ടതെല്ലാം

ബംഗളൂരുവിൽ ജലനിയന്ത്രണം കടുക്കുന്നു

വാഹനങ്ങൾ കഴുകാനോ പൂന്തോട്ടം നനയ്ക്കാനോ കുടിവെള്ളമോ ശുദ്ധീകരിച്ച വെള്ളമോ ഉപയോഗിക്കുന്നത് ഇനി ശിക്ഷാർഹമായ കുറ്റമാണ്. ആദ്യതവണ നിയമം ലംഘിച്ചാൽ ഉടമയിൽ നിന്ന് 5,000 രൂപ പിഴ ഈടാക്കും. നിയമലംഘനം തുടർന്നാൽ, പ്രശ്നം പരിഹരിക്കുന്നത് വരെ പ്രതിദിനം 500 രൂപ വീതം അധിക പിഴയും നൽകേണ്ടി വരും. നിങ്ങളുടെ പ്രദേശത്ത് വെള്ളം പാഴാക്കുന്നത് ശ്രദ്ധയിൽപ്പെട്ടാൽ 1916 എന്ന BWSSB ഹെൽപ്പ് ലൈൻ നമ്പറിൽ വിവരമറിയിക്കാം. ടാപ്പുകളിൽ എയറേറ്ററുകൾ ഉണ്ടെന്ന് ഉറപ്പുവരുത്താനും അനാവശ്യ ഉപയോഗം ഒഴിവാക്കാനും നഗരവാസികൾ ശ്രദ്ധിക്കണം.

അപ്പാർട്ട്‌മെന്റുകൾ പാലിക്കേണ്ട നിർദ്ദേശങ്ങൾ

അപ്പാർട്ട്‌മെന്റുകളിലെ പൊതുവായ ടാപ്പുകളും ഓരോ ഫ്ലാറ്റിലെയും ടാപ്പുകളും കൃത്യമായി പരിശോധിക്കണം. പൈപ്പുകളിൽ ചോർച്ചയില്ലെന്ന് ഉറപ്പാക്കുകയും എല്ലാ ടാപ്പുകളിലും എയറേറ്ററുകൾ ഘടിപ്പിക്കുകയും വേണം. കുറഞ്ഞ അളവിൽ വെള്ളം ഉപയോഗിച്ച് കൂടുതൽ പ്രഷർ നൽകാൻ ഇത്തരം ഉപകരണങ്ങൾ സഹായിക്കും. നഗരത്തിലെ ജലവിതരണം തടസ്സമില്ലാതെ മുന്നോട്ട് കൊണ്ടുപോകാൻ എല്ലാവരുടെയും സഹകരണം അത്യാവശ്യമാണ്.