സ്വർണക്കുതിപ്പിന് ഇന്ന് 'താത്കാലിക ബ്രേക്ക്'; വിലയിടിവിൽ ആശ്വാസമില്ല: നാളെ വീണ്ടും കുതിച്ചുയരുമോ?

ആശ്വസിക്കണോ അതോ ആശങ്കപ്പെടണോ? ഇന്നലെ തുടർച്ചയായ രണ്ട് തവണ സ്വർണ വില കുതിച്ചതോടെ ഇന്ന് സ്വർണ വിലയിൽ നേരിയ ഇടിവ് രേഖപ്പെടുത്തി. സ്വർണ വിലയിലെ ഈ ചാഞ്ചാട്ടം നിരാശയുണ്ടാക്കുന്നു. ഇന്നലെ ഉച്ചക്കു ശേഷം വില കുതിച്ചതോടെ പവൻ 94,000 കടന്നിരുന്നു. ഇന്ന് വില ഇടിഞ്ഞെങ്കിലും പവൻ 93,000 രൂപയിലാണ് നിൽക്കുന്നത്.

കേരളത്തിൽ സ്വർണ വില കത്തിക്കയറുന്നത് വിവാഹപാർട്ടികൾക്ക് കടുത്ത നഷ്ടമുണ്ടാക്കും. സ്വർണത്തിൻ്റെ ഈ ട്രെൻഡ് ഒരു വലിയ റെക്കോർഡ് മുന്നേറ്റത്തിനുള്ള ആരംഭമാണോ എന്നും സംശയിക്കേണ്ടിയിരിക്കുന്നു. കാരണം നിലവിലെ ലഭ്യമായ സൂചനകൾ അനുസരിച്ച് അമേരിക്കയുടെ സാമ്പത്തിക പ്രതിസന്ധികൾ കണക്കിലെടുത്ത് കൊണ്ട് യുഎസ് ഫെഡറൽ റിസർവ് ഡിസംബറിൽ വീണ്ടും അടിസ്ഥാന പലിശ നിരക്ക് കുറക്കുമെന്നാണ്. ഇതു സംഭവിച്ചാൽ സ്വർണത്തിൻ്റെ കുതിപ്പ് കൂടുതൽ ശക്തമാവും.

ഇന്നലെ രാവിലെയും ഉച്ചയ്ക്കുമായി പവന് 2,280 രൂപയും, ഗ്രാമിന് 285 രൂപയുമാണ് വർദ്ധിച്ചത്. ഇതോടെ പവൻ വില 94,320 രൂപയിലും ​ഗ്രാമിന് 11,790 രൂപയിലും വില ഉയർന്നിരുന്നു.

ഇന്നത്തെ സ്വർണ വില

ഇന്ന് ഒരു ഗ്രാമിന് 70 രൂപ കുറഞ്ഞ് 11,720 രൂപയായി. ഒരു പവന് 560 രൂപ കുറഞ്ഞ് 93,760 രൂപയായി. ഇന്നത്തെ വിലപ്രകാരം 10 ഗ്രാം സ്വർണം വാങ്ങാൻ 1,17,200 രൂപയാവുന്നു. 24 കാരറ്റ് സ്വർണം ഒരു ഗ്രാമിന് 77 രൂപ കുറഞ്ഞ് 12,785 രൂപയും, പവന് 616 രൂപ കുറഞ്ഞ് 1,02,280 രൂപയുമാവുന്നു. 18 കാരറ്റിന് ഒരു ഗ്രാമിന് 58 രൂപ കുറഞ്ഞ് 9,589 രൂപയും, പവന് 464 രൂപ കുറഞ്ഞ് 76,712 രൂപയുമായി.