ഐടി മേഖലയിൽ വീണ്ടും പിരിച്ചുവിടൽ കാലം. വെരിസോൺ ഇന്ത്യയിൽ ജീവനക്കാരുടെ എണ്ണം 14 ശതമാനം കുറയ്ക്കുമെന്നാണ് ഏറ്റവും പുതിയ റിപ്പോർട്ട്. ഐടി ആൻഡ് ഐടിഇഎസ് ജീവനക്കാരുടെ സംഘടനയാണ് ഇത് സംബന്ധിച്ച വിവരം പുറത്തു വിട്ടത്.
ഈ സാമ്പത്തിക വർഷത്തെ ആദ്യ പകുതിയിൽ ഇന്ത്യയിലെ പ്രധാന ആറ് ഐടി കമ്പനികൾ തങ്ങളുടെ ജീവനക്കാരുടെ എണ്ണത്തിൽ കുറവു വരുത്തിയിരുന്നു. കോഗ്നിസന്റ്, ഇൻഫോസിസ്, വിപ്രോ തുടങ്ങിയ കമ്പനികൾ നാലായിരം ജീവനക്കാരെയാണ് പിരിച്ചുവിട്ടത്.
പുതിയ കണക്കനുസരിച്ച് വെരിസോണിലെ 993 പേർക്ക് ജോലി നഷ്ടപ്പെടും. കമ്പനിയുടെ ചെന്നൈ, ഹൈദരാബാദ്, ബംഗളൂരു ഓഫീസുകളിലെ ജീവനക്കാരെയാണ് പിരിച്ചു വിടുന്നത്.
കഴിഞ്ഞ വർഷം ഇതേ കാലയളവിൽ 60,000ത്തോളം പേർക്കാണ് ഐടി മേഖലയിൽ പുതുതായി ജോലി ലഭിച്ചത്. എന്നാൽ ഇത്തവണ കാര്യങ്ങൾ തകിടം മറിഞ്ഞു. കടുത്ത വെല്ലുവിളികൾ നിറഞ്ഞ ബിസിനസ്സ് പരിതസ്ഥിതിയിൽ കമ്പനിയുടെ ചെലവുചരുക്കലിന്റെ ഭാഗമാണ് പിരിച്ചുവിടൽ.
malayalam.goodreturns.in