മേയ് മാസം മുതൽ 650 ഇന്ത്യാ പോസ്റ്റ് പേമെന്റ്സ് ബാങ്കുകൾ കൂടി രാജ്യത്ത് പ്രവർത്തന സജ്ജമാകുമെന്ന് കേന്ദ്ര സഹമന്ത്രി മനോജ് സിൻഹ അറിയിച്ചു. പേമെന്റ്സ് ബാങ്കുകളുടെ നിർമാണ പ്രവർത്തനങ്ങൾ പൂർത്തിയായെന്നും റിസർവ് ബാങ്ക് ഓഫ് ഇന്ത്യയുടെ നടപടികൾ ഒരാഴ്ചകൊണ്ട് പൂർത്തിയാകുമെന്നും അദ്ദേഹം പത്രസമ്മേളനത്തിൽ പറഞ്ഞു.
ഇന്ത്യ പോസ്റ്റ് പേമെന്റ്സ് ബാങ്കിന്റെ തുടക്കം
കഴിഞ്ഞ വർഷം ജനുവരിയിലാണ് പേമെന്റ്സ് ബാങ്ക് തുടങ്ങാൻ ഇന്ത്യാ പോസ്റ്റിന് റിസർവ് ബാങ്ക് അനുമതി നൽകിയത്. ഇതേ തുടർന്ന് റായ്പുരിലും റാഞ്ചിയിലും പരീക്ഷണാടിസ്ഥാനത്തിൽ രണ്ടു കേന്ദ്രങ്ങൾ ആരംഭിക്കുകയും ചെയ്തിരുന്നു.
പദ്ധതി വിജയകരമായതിനെത്തുടർന്നാണ് രാജ്യവ്യാപകമായി ഇന്ത്യ പോസ്റ്റ് പേമെന്റ്സ് ബാങ്ക് സർക്കാർ ആരംഭിക്കുന്നത്. അതിവേഗം സേവനങ്ങൾ ഇടപാടുകാർക്ക് ലഭ്യമാക്കാനായി പുതിയ സാങ്കേതിവിദ്യയാണ് ഇതിനായി ഉപയോഗിച്ചിട്ടുള്ളത്.
പോസ്റ്റ്മാന്മാർക്ക് സ്മാർട്ട്ഫോൺ
കൂടാതെ സേവനം എളുപ്പമാക്കുന്നതിന്റെ ഭാഗമായി പോസ്റ്റ്മാന്മാർക്ക് സ്മാർട്ട്ഫോൺ പോലുള്ള ഉപകരണങ്ങളും നൽകും. നിലവിൽ 15,000ഓളം ഫോണുകൾ വിതരണം ചെയ്ത് കഴിഞ്ഞു. ഉടൻ 40,000ഓളം ഉപകരണങ്ങൾ കൂടി തൊഴിലാളികൾക്ക് വിതരണം ചെയ്യുമെന്നാണ് തപാൽ വകുപ്പിൽ നിന്നുള്ള വിവരം. തപാൽ വകുപ്പിന്റെ ഈ പേയ്മെന്റ് ബാങ്ക് സേവനം വൈകാതെ 1.5 ലക്ഷത്തിലധികം പോസ്റ്റ് ഓഫീസുകൾ വഴിയും നടപ്പിലാക്കുമെന്ന് മന്ത്രി വ്യക്തമാക്കി.
malayalam.goodreturns.in