രാജ്യത്തെ ഏറ്റവും വലിയ പൊതുമേഖലാ ബാങ്കായ സ്റ്റേറ്റ് ബാങ്ക് ഓഫ് ഇന്ത്യ (എസ്ബിഐ) എംസിഎൽആർ നിരക്ക് 0.2 ശതമാനം ഉയർത്തി. ഇതോടെ എസ്ബിഐയുടെ ഭവന, വാഹന വായ്പകളുടെ പലിശ നിരക്ക് ഉയരും.
ഇന്ന് മുതൽ പ്രാബല്യത്തിൽ
പുതിയ നിരക്ക് ഇന്ന് മുതൽ പ്രാബല്യത്തിൽ വരും. സ്റ്റേറ്റ് ബാങ്ക് ഓഫ് ഇന്ത്യയുടെ മൂന്ന് വർഷം കാലാവധിയുള്ള വായ്പകളുടെ പലിശ നിരക്ക് 20 ബേസിസ് പോയന്റാണ് ഉയർത്തിയിരിക്കുന്നത്. 8.1 ശതമാനമാണ് പുതിയ പലിശ നിരക്ക്. മുമ്പ് 7.9 ശതമാനമായിരുന്നു പലിശ.
കാലാവധി
ഒരു വർഷം കാലാവധിയിലുള്ള വായ്പയുടെ പലിശ നിരക്ക് 8.45 ശതമാനമായാണ് ഉയർത്തിയിരിക്കുന്നത്. നേരത്തേ ഇത് 8.25 ശതമാനമായിരുന്നു. ചില്ലറ വായ്പകളിൽ ഭൂരിഭാഗവും ഒരു വർഷത്തെ കാലാവധിയിലുള്ളതാണ്. മൂന്ന് വർഷം കാലാവധിയുള്ള വായ്പകളുടെ പലിശ നിരക്ക് 8.45 ശതമാനത്തിൽ നിന്ന് 8.65 ശതമാനമായാണ് ഉയർത്തിയത്.
ആർബിഐ വായ്പാനയം
റിസർവ് ബാങ്ക് ഓഫ് ഇന്ത്യ മൂന്നാമത്തെ ദ്വൈമാസ വായ്പാ നയം പ്രഖ്യാപിച്ചതിന് ഒരു മാസത്തിന് ശേഷമാണ് ഇപ്പോൾ എസ്ബിഐ വായ്പാ പലിശ നിരക്ക് ഉയർത്തിയിരിക്കുന്നത്. ആർബിഐ റിപ്പോ, റിവേഴ്സ് റിപ്പോ നിരക്കുകൾ 25 ബേസിസ് പോയിന്റ് ഉയർത്തിയിരുന്നു. നിലവിലെ റിപ്പോ നിരക്ക് 6.5 ശതമാനമാണ്.
സ്ഥിരനിക്ഷേപ പലിശ നിരക്ക്
ജൂലൈയിൽ എസ്ബിഐ സ്ഥിര നിക്ഷേപങ്ങളുടെ പലിശ നിരക്ക് പുതുക്കി നിശ്ചയിച്ചിരുന്നു. വിവിധ കാലവധികളിലുള്ള ജനറൽ, മുതിർന്ന പൗരന്മാർ എന്നിവരുടെ എഫ്ഡിഡി പലിശ നിരക്കുകളാണ് പരിഷ്കരിച്ചത്. ഒരു കോടി രൂപയ്ക്ക് താഴെയുള്ള ഫിക്സഡ് ഡിപ്പോസിറ്റുകളുടെ പലിശ നിരക്ക് 5 ബേസിസ് പോയിന്റ് മുതൽ 10 ബേസ് പോയിന്റ് വരെയാണ് ഉയർത്തിയത്. എസ്ബിഐയുടെ റിക്കറിംഗ് ഡിപ്പോസിറ്റ് അല്ലെങ്കിൽ ആർഡി പലിശ നിരക്ക് സ്ഥിര നിക്ഷേപ പലിശ നിരക്കിന് തുല്യമാണ്. ജൂലൈയ്ക്ക് മുമ്പ് എസ്ബിഐ സ്ഥിര നിക്ഷേപ പലിശ നിരക്ക് ഉയർത്തിയത് കഴിഞ്ഞ മേയ് 28നാണ്.
പുതുക്കിയ നിരക്ക്
ജനറൽ വിഭാഗത്തിന്റെ വിവിധ കാലാവധികളിലുള്ള സ്ഥിര നിക്ഷേപങ്ങളുടെ പുതുക്കിയ നിരക്ക് താഴെ പറയുന്നവയാണ്. (കാലാവധി, നിലവിലെ പലിശ നിരക്ക്, പുതുക്കിയ നിരക്ക് എന്ന ക്രമത്തിൽ)
- 1 വർഷം മുതൽ 2 വർഷത്തിൽ താഴെ - 6.65% - 6.7%
- 2 വർഷം മുതൽ 3 വർഷത്തിൽ താഴെ - 6.65% - 6.75%
- 3 വർഷം മുതൽ 5 വർഷത്തിൽ താഴെ - 6.7 % - 6.8%
- 5 വർഷം മുതൽ 10 വർഷം വരെ - 6.75% - 6.85%
malayalam.goodreturns.in