ബാങ്ക് അക്കൗണ്ട് തുടങ്ങുവാന്‍ ആധാര്‍ മാത്രം മതി

<p>മുംബൈ:ബാങ്ക് അക്കൗണ്ട് തുടങ്ങുന്നത് സുഗമമാക്കുന്ന നൂതന സംവിധാനം ഇനി ആധാറിന്റെ പ്രത്യേകതയാകും.ആധാര്‍ കാര്‍ഡുമായി ബാങ്കിനെ സമീപിയ്ക്കുന്ന പൗരന്‍ തന്റെ 12 അക്ക ആധാര്‍ നമ്പര്‍ പറഞ്ഞു കൊടുക്കുകയും ബാങ്ക് അധികൃതര്‍ പുതിയ അക്കൗണ്ട് അനുവദിക്കുകയും ചെയ്യുന്നതാണ് പുതിയ പരിഷ്‌ക്കരണം. ആധാര്‍ കാര്‍ഡ് വിതരണം ചെയ്യുന്ന യൂണിക് ഐഡന്റിഫിക്കേഷന്‍ അതോറിറ്റി ഓഫ് ഇന്ത്യ (യു.ഐ.ഡി.എ.ഐ) ചീഫ് നന്ദന്‍ നിലേകനിയാണ് മുംബൈയില്‍ പ്രസ്തുതസംവിധാനത്തെക്കുറിച്ച് പരിചയപ്പെടുത്തി സംസാരിച്ചത്.</p> <p>പുതിയ പരിഷ്‌ക്കരണത്തില്‍ ആധാര്‍ കാര്‍ഡുടമ ബാങ്കിന് സ്വന്തം വിരലടയാളം പതിപ്പിച്ചു കൊടുക്കുക മാത്രമാണ്‌ചെയ്യേണ്ടത്. ബാങ്കുകളെ യു. ഐ. ഡി. എ. ഐ ഡാറ്റാബേസുമായി ബന്ധപ്പെടുത്തിയാണ് ഇവരുടെ അക്കൗണ്ട് തുറക്കുന്നത്.ഇതോടെ രേഖകളുടെ ഫോട്ടോകോപ്പിയും അനുബന്ധ രേഖകളും സമര്‍പ്പിയ്ക്കുന്ന നിലവിലെ രീതികള്‍ക്ക് അന്ത്യമാകും.<br /><strong>

</strong></p> <p>അടുത്ത വര്‍ഷത്തോടെ രാജ്യത്തെ മൊത്തം ജനസംഖ്യയുടെ പകുതിയോളം പേരെ ആധാറിനു കീഴില്‍ വരുത്തുന്നതിനാണ് അഥോറിറ്റി ലക്ഷ്യമിടുന്നത്. സ്വകാര്യ ബാങ്കായ ആക്‌സിസ് ബാങ്കാണ് ഇന്ത്യയില്‍ ആദ്യമായി കസ്റ്റമറെ നേരിട്ട് ആധാറുമായി ബന്ധിപ്പിച്ചത്. താനെ പ്രദേശത്തുള്ള നിതിന്‍ ഷാ ആണ് ഇത്തരത്തില്‍ അക്കൗണ്ട് ആദ്യമായി തുടങ്ങിയത്.</p> <p>ആധാറുണ്ടങ്കില്‍ ആര്‍ക്കും സ്വന്തം വിരലടയാളം മാത്രമുപയോഗിച്ച് ഒരു ബാങ്ക് അക്കൗണ്ട് തുടങ്ങാവുന്നതാണെന്ന് ആക്‌സിസ് ബാങ്ക് മാനേജിംഗ് ഡയറക്ടറും ചീഫ് എക്‌സിക്യുട്ടീവുമായ ശിഖാ ശര്‍മ പുതിയ സംവിധാനം പരിചയപ്പെടുത്തുന്ന വേളയില്‍ പറഞ്ഞു. ആക്‌സിസ് ബാങ്കിന്റെ പത്തു ശാഖകളില്‍ ഉടന്‍ തന്നെ ഈ സൗകര്യം ലഭ്യമാകുമെന്ന് അഥാറിറ്റി ചീഫ് നന്ദന്‍ നിലേകനി പറഞ്ഞു. ഇന്‍ഷുറന്‍സ്,മൂച്വല്‍ഫണ്ട് രംഗങ്ങളില്‍ ഈ പുതിയ മാറ്റത്തിന്റെ സാദ്ധ്യതകള്‍ അനന്തമാണെന്നും ഭാവിയില്‍ അവ പ്രതീക്ഷിക്കാമെന്നും അദ്ദേഹം കൂട്ടിച്ചേര്‍ത്തു.</p>