വിദ്യാഭ്യാസ വായ്പ അറിയേണ്ടതെല്ലാം

ഏഴു മുതല്‍ 10 വരെ വര്‍ഷകാലാവധിയില്‍ 11-14 ശതമാനം നിരക്കിലാണ് ഇപ്പോള്‍ വിദ്യാഭ്യാസ വായ്പ കിട്ടുന്നത്. വസ്തു ഈടിന്മേല്‍ 11.25 - 11.30 ശതമാനം നിരക്കില്‍ തുക കിട്ടും. അതും 15 വര്‍ഷകാലയളവില്‍.

വിദ്യാഭ്യാസ വായ്പയില്‍ ഓരോ വര്‍ഷവും തുക അനുവദിക്കുന്നതിനാല്‍ അതനുസരിച്ച് പലിശ കുറയും. വിദ്യാഭ്യാസ വായ്പയെ കുറിച്ച് അറിഞ്ഞിരിക്കേണ്ട പ്രധാന വസ്തുതകള്‍

1 . സര്‍ക്കാര്‍ അംഗീകാരമുള്ള ഏതു കോഴ്‌സിനും നിയമാനുസൃതം അഡ്മിഷന്‍ നേടിയ വിദ്യാര്‍ത്ഥിക്കു വിദ്യാഭ്യാസ വായ്പ ലഭിക്കും.

2. ട്യൂഷ്യന്‍ ഫീസ്, ഹോസ്റ്റല്‍ ഫീസ്, അടക്കം പഠനവുമായി ബന്ധപ്പെട്ട എല്ലാത്തരം ചെലവുകള്‍ക്കുമുള്ള തുക വായ്പയായി കിട്ടും.

3. വിദ്യാര്‍ത്ഥിയുടെ പേരിലാണ് വായ്പയെങ്കിലും തുക കൈയില്‍ കിട്ടില്ല. ഓരോ വര്‍ഷത്തേയും തുക അതതു വര്‍ഷം സ്ഥാപനത്തിന്റെ അക്കൗണ്ടിലേക്കാകും നല്‍കുക.

4. നാലു ലക്ഷം വരെയുള്ള വായ്പയ്ക്ക് ഈടോ ജാമ്യമോ ആവശ്യമില്ല.അതിനുമുകളില്‍ ആവശ്യപ്പെടുന്ന ജാമ്യം നല്‍കണം. നാലു ലക്ഷത്തിനു മുകളില്‍ അഞ്ചു ശതമാനം മാര്‍ജിന്‍ മണിയുണ്ട്. വിദേശ പഠനത്തിനാണെങ്കില്‍ 15-20 ശതമാനം വരെ മാര്‍ജിനായി കൈയിലുണ്ടാകണം.

5. ഓരോ ബാങ്കും ഈടാക്കുന്ന പലിശ വ്യത്യസ്തമാണ്. കുടുംബ വാര്‍ഷിക വരുമാനം 4.5 ലക്ഷത്തില്‍ താഴെയായിട്ടുള്ളവര്‍ക്ക് പഠനകാലയളവിലെ പലിശക്ക് കേന്ദ്ര സര്‍ക്കാര്‍ സബ്‌സിഡി ലഭിക്കും. ഇതിന് വില്ലേജ് ഓഫീസര്‍ നല്‍കുന്ന വരുമാനസര്‍ട്ടിഫിക്കറ്റ് ഹാജരാക്കിയാല്‍ മതി.

6. കോഴ്‌സ് പൂര്‍ത്തിയായി ആറുമാസം മുതല്‍ ഒരു വര്‍ഷത്തിനുള്ളില്‍ തിരിച്ചടച്ചു തുടങ്ങണം.10 വര്‍ഷത്തിനുള്ളില്‍ അടച്ചു തീര്‍ത്താല്‍ മതി. തിരിച്ചടക്കുന്ന തുകക്ക് ആദായനികുതി ഇളവ് ലഭിക്കും.