ആദായ നികുതി: ശ്രദ്ധിക്കാന്‍ 5 കാര്യങ്ങള്‍

ഫോമുകള്‍ തെറ്റിച്ചാല്‍

നികുതിവിധേയമായ വരുമാനം ഉണ്ടെങ്കിലും പല നികുതിദായകരും ഫോം 15 ജി, എച്ച് എന്നിവ തെറ്റായി സമര്‍പ്പിച്ച് സ്രോതസ്സിലുള്ള നികുതി ഒഴിവാക്കുന്നുണ്ട്. നികുതിക്ക് വിധേയമായ വരുമാനം ഉള്ള ഒരു നികുതിദായകനും ഫോം 15 ജി, എച്ച് എന്നിവ സമര്‍പ്പിക്കരുത്.

വിദേശത്തെ വരുമാനം

വിദേശത്ത് സ്വത്തുക്കള്‍ സൂക്ഷിച്ചിട്ടുണ്ടെങ്കിലും അവയില്‍നിന്ന് വരുമാനം ലഭിക്കുന്നുണ്ടെങ്കിലും രണ്ടും ആദായനികുതി റിട്ടേണുകളില്‍ കാണിക്കണം.ഇത് മറച്ചുവെച്ചാല്‍ ബ്ലാക്ക് മണി ആക്ടിന്റെ പരിധിയില്‍ വന്ന് 10 ലക്ഷം രൂപ വരെ പിഴ ചുമത്താനിടയുണ്ട്.

സ്രോതസ്സില്‍ നികുതി പിടിക്കാതിരിക്കുക

ഇന്ത്യയില്‍ സ്ഥിരതാമസക്കാരായവരുടെ പക്കല്‍നിന്ന് 50 ലക്ഷം രൂപയില്‍ കൂടുതല്‍ വിലയുള്ള വസ്തു വാങ്ങുകയും അതേസമയം സ്രോതസ്സില്‍ തുകയുടെ ഒരു ശതമാനം നികുതി പിടിച്ച് അടക്കാതിരിക്കുകയും ചെയ്താല്‍ ആദായനികുതി ഓഫിസില്‍നിന്ന് നോട്ടീസ് ലഭിക്കുകയും ലക്ഷം രൂപ വരെ പിഴ ചിലപ്പോള്‍ അടക്കേണ്ടി വരുകയും ചെയ്യും.

പലിശയില്‍നിന്നുള്ള വരുമാനം

നിരവധി നികുതിദായകര്‍ സ്ഥിര നിക്ഷേപത്തില്‍നിന്ന് ലഭിക്കുന്ന പലിശക്ക് 10,000 രൂപയുടെ കിഴിവ് ലഭിക്കും എന്ന ധാരണയില്‍ തെറ്റായി റിട്ടേണ്‍ ഫയല്‍ ചെയ്യാറുണ്ട്. ആദായനികുതി നിയമത്തിലെ 80 ടി.ടി.എ വകുപ്പനുസരിച്ച് സേവിങ്‌സ് ബാങ്കില്‍നിന്ന് ലഭിക്കുന്ന പലിശക്ക് 10,000 രൂപ വരെ കിഴിവ് ലഭിക്കും. എന്നാല്‍, സ്ഥിര നിക്ഷേപങ്ങളുടെ പലിശക്ക് ഒരു കിഴിവും ലഭിക്കുന്നതല്ല.

മൊത്തവരുമാനം നോക്കണം

മൊത്ത വരുമാനം പരിധിയേക്കാള്‍ കൂടുതലാണെങ്കില്‍ നികുതി അടക്കേണ്ടി വന്നില്ലെങ്കിലും റിട്ടേണ്‍ സമര്‍പ്പിക്കണം.