ഒരു പൈസയില്‍ 10 ലക്ഷം രൂപയുടെ ഇന്‍ഷുറന്‍സ്, അറിയേണ്ടതെല്ലാം

ന്യൂഡല്‍ഹി: ഐആര്‍സിടിസി അവതരിപ്പിച്ച 92 പൈസയ്ക്കുള്ള 10 ലക്ഷം രൂപയുടെ ഇന്‍ഷുറന്‍സ് പരിരക്ഷ ഇപ്പോള്‍ ഒരു പൈസയില്‍ ലഭ്യം. ഉത്സവകാലത്തോടനുബന്ധിച്ചാണ് ഈ പുതിയ ആനുകൂല്യം

ഐആര്‍സിടിസി ഇനിയും പുതിയ പദ്ധതികള്‍ ആവിഷ്‌കരിച്ചേക്കുമെന്നാണ് സൂചന. ഇന്‍ഷുറന്‍സ് കമ്പനികളുമായി ഐആര്‍സിടിസി അധികൃതര്‍ ഇതുമായി ബന്ധപ്പെട്ട പ്രാരംഭഘട്ട ചര്‍ച്ചകള്‍ നടത്തിയെന്ന് ഐആര്‍സിടിസി ചെയര്‍മാനും മാനേജിംഗ് ഡയറക്ടറുമായ എ.കെ. മനോച്ച അറിയിച്ചിരുന്നു.

മൊബൈലിനും ഇന്‍ഷുറന്‍സ്

യാത്രക്കാരുടെ ഉപകരണങ്ങള്‍ക്ക് ഇന്‍ഷുറന്‍സ് പരിരക്ഷ നല്കാനുള്ള ചര്‍ച്ചകള്‍ പുരോഗമിക്കുകയാണ്. മൊബൈല്‍ ഫോണുകള്‍, ലാപ്‌ടോപ്പുകള്‍ തുടങ്ങിയ ഉപകരണങ്ങള്‍ക്കായിരിക്കും ഇന്‍ഷുറന്‍സ് ലഭിക്കുക.

മോഷണങ്ങള്‍ക്കെതിരെ

വ്യാജ ക്ലെയിമുകളെക്കുറിച്ച് ഇന്‍ഷുറന്‍സ് കമ്പനികള്‍ക്ക് ആശങ്കയുണ്ട്. ഐആര്‍സിടിസിയുടെ ആശയങ്ങള്‍ക്കൊപ്പം കമ്പനികളുടെ നിര്‍ദേശങ്ങളും ആരാഞ്ഞിട്ടുണ്ടെന്നും അദ്ദേഹം പറഞ്ഞു. അപകടങ്ങള്‍ക്കും മോഷണങ്ങള്‍ക്കും ഈ പദ്ധതി ആവിഷ്‌കരിക്കുകയാണ് ചെയര്‍മാന്റെ ലക്ഷ്യം.

ഒരു കോടിയിലധികം അംഗങ്ങള്‍

കഴിഞ്ഞ മാസം രൂപീകരിച്ച യാത്രക്കാര്‍ക്കുള്ള ഇന്‍ഷുറന്‍സ് പദ്ധതി വന്‍ വിജയമായതിനാലാണ് പുതിയ പദ്ധതി ഐആര്‍സിടിസി ആവിഷ്‌കരിക്കുന്നത്. ഒരു കോടിയിലധികം ആളുകളാണ് യാത്രക്കാര്‍ക്കുള്ള ഇന്‍ഷുറന്‍സ് പദ്ധതിയില്‍ അംഗമായിട്ടുള്ളത്.

ഒക്ടോബര്‍ 31 വരെ സമയം

ഒക്ടോബര്‍ 7 മുതല്‍ ഈ മാസം 31 വരെ ഒരു പൈസ പ്രീമിയത്തില്‍ ഈ ഇന്‍ഷുറന്‍സ് പദ്ധതിയില്‍ അംഗമാകാം. ഉത്സവസീസണോട് അനുബന്ധിച്ചാണ് 92 പൈസ പ്രീമിയം തുക ഒരു പൈസയാക്കി ഇളവു ചെയ്തത്.