സ്വ‍ർണം ലഭിക്കുന്ന എടിഎം!!! സ്വ‍ർണത്തെക്കുറിച്ച് നിങ്ങൾക്ക് അറിയാത്ത ചില രഹസ്യങ്ങൾ

സ്വ‍ർണാഭരണങ്ങൾ ധരിക്കുന്നവരാണ് മലയാളികളിലധികവും എന്നാൽ തിളങ്ങുന്ന ഈ ലോ​ഹത്തെക്കുറിച്ച് നിങ്ങൾക്ക് അറിയാത്ത ധാരാളം കാര്യങ്ങളുണ്ട്. അത്തരം ചില രഹസ്യങ്ങൾ എന്തൊക്കെയാണെന്ന് നോക്കാം.

ഒളിമ്പിക് ​ഗോൾഡ് മെഡൽ സ്വർണം കൊണ്ടല്ല

ഒളിമ്പിക് സ്വർണ മെഡലിൽ വെറും ഒരു ശതമാനം മാത്രമാണ് സ്വർണമുള്ളത്. ബാക്കി ഭാഗങ്ങളിൽ 92 ശതമാനം വെള്ളിയും 6 ശതമാനം ചെമ്പുമാണ് അടങ്ങിയിരിക്കുന്നത്. ഒളിമ്പിക്സിൽ അവസാനമായി പൂ‍ർണമായും സ്വർണമടങ്ങിയ മെഡലുകൾ നൽകിയത് 1912ൽ ആയിരുന്നു.

സ്വ‍ർണം കഴിക്കാം

കുഞ്ഞിന് നാവില്‍ സ്വര്‍ണമുരച്ചു നല്‍കുന്ന പതിവ് ഇന്ത്യയിൽ പലയിടത്തുമുണ്ട്. ശരീരത്തിലേയ്ക്ക് ആ​ഗീരണം ചെയ്യപ്പെടാതെ ദഹനേന്ദ്രിയത്തിലൂടെ കടന്നുപോകാനുള്ള കഴിവ് സ്വ‍ർണത്തിനുണ്ട്. ആയുര്‍വേദ പ്രകാരം പണ്ടു കാലം മുതല്‍ സ്വര്‍ണം ആരോഗ്യത്തിന് നല്ലതാണെന്നാണ് കണക്കുകൂട്ടല്‍. ഇതുകൊണ്ടാണത്രേ രാജഭരണകാലത്ത് രാജാക്കന്മാര്‍ സ്വര്‍ണ പാത്രങ്ങളില്‍ ഭക്ഷണം കഴിച്ചിരുന്നത്. എന്നാൽ സ്വ‍ർണം കഴിക്കുന്നത് ദോഷകരമാണെന്ന വാദവും നിലനിൽക്കുന്നുണ്ട്.

ഓറോഫോബിയ

സ്വ‍ർണത്തോടുള്ള കടുത്ത ഭയമാണ് ഓറോഫോബിയ. സ്വ‍ർണം കാണുന്നതും ധരിക്കുന്നതും ഇവരിൽ പേടിയുണ്ടാക്കും. സ്വ‍ർണത്തെക്കുറിച്ച് സംസാരിക്കുന്നത് പോലും ചിലപ്പോൾ ഓറോഫോബിയയുള്ളവരിൽ തലകറക്കം, ഛ‍ർദ്ദി, ആക്രമണ സ്വഭാവം എന്നിവയുണ്ടാക്കും.

നാവികർ സ്വ‍ർണക്കമ്മൽ ധരിക്കും

യൂറോപ്പ്യൻ രാജ്യങ്ങളിലെ നാവികർ സ്വർണ കമ്മലുകൾ ധരിച്ചിരുന്നു. ഇത് ഫാഷന് വേണ്ടിയല്ല. പകരം അവർ മുങ്ങി മരിച്ചാൽ ക്രിസ്തീയ രീതിയിൽ ശവസംസ്കാരം നടത്തുന്നവർക്ക് ഈ കമ്മൽ പ്രതിഫലം എന്ന നിലയിൽ എടുക്കാവുന്നതാണ്.

സ്വ‍‍ർണം ലഭിക്കുന്ന എടിഎം

ദുബായിലെ ഒരു ​ഹോട്ടലിൽ സ്വർണം ലഭിക്കുന്ന എടിഎമ്മുണ്ട്. 10 ​ഗ്രാം വീതമുള്ള സ്വർണ ബാറുകളാണ് ഈ എടിഎം വഴി ലഭിക്കുക. സ്വ‍ർണ നാണയങ്ങളും ഈ എടിമ്മിലൂടെ കിട്ടും.