എന്താണ് ഇ-വേ ബിൽ? തീ‍ർച്ചയായും അറിഞ്ഞിരിക്കേണ്ട ചില കാര്യങ്ങൾ

ചരക്ക് സേവന നികുതിയിലെ (ജിഎസ്ടി) സുപ്രധാന ചുവടു വയ്പ്പാണ് ഇ-വേ ബിൽ. രാജ്യത്ത് 2018 ഫെബ്രുവരി മുതൽ ഇ-വേ ബിൽ നടപ്പിലാക്കുകയും ചെയ്തു. എന്നാൽ എന്താണ് ഇ-വേ ബിൽ എന്നത് ഇപ്പോഴും പലർക്കും അറിയില്ല. ഇ-വേ ബില്ലിനെക്കുറിച്ച് നിങ്ങൾ തീ‍ർച്ചയായും അറിഞ്ഞിരിക്കേണ്ട കാര്യങ്ങൾ താഴെ പറയുന്നവയാണ്.

എന്താണ് ഇ-വേ ബിൽ?

ജിഎസ്ടി നിയമ പ്രകാരം 50,000 രൂപയിൽ കൂടുതൽ വിലയുള്ള സാധനങ്ങൾ ഒരിടത്തു നിന്ന് 10 കിലോ മീറ്റ‍റിലധികം ദൂരെയുള്ള മറ്റൊരിടത്തേയ്ക്ക് കൊണ്ടു പോകേണ്ടി വരുമ്പോൾ ഉപയോ​ഗിക്കേണ്ട യാത്രാ രേഖയാണ് ഇ-വേ ബിൽ. ചരക്ക് കൊണ്ടു പോകുന്ന വാഹനത്തിന്റെ വിവരങ്ങൾ ഉൾപ്പെടെയുള്ള അടിസ്ഥാന വിവരങ്ങൾ ഉൾപ്പെടുത്തി ഇന്റ‍ർനെറ്റ് ഉപയോ​ഗിച്ച് നിങ്ങൾക്ക് തന്നെ ഇ-വേ ബിൽ തയ്യാറാക്കാവുന്നതാണ്. ഇത് വാഹനത്തിൽ സൂക്ഷിക്കണം.

ഇ-വേ ബിൽ ആർക്കൊക്കെ ഉണ്ടാക്കാം?

• സപ്ലയർ
• സ്വീകർത്താവ്
• ട്രാൻസ്പോ‍ർട്ട‍ർ



ഇ-വേ ബിൽ ഉണ്ടാക്കുന്നതെങ്ങനെ?

ചരക്ക് നീക്കവുമായി ബന്ധപ്പെട്ട വിവരങ്ങൾ https://ewaybill.nic.in എന്ന വെബ്സൈറ്റിൽ അപ്‍ലോ‍ഡ് ചെയ്യുക. ഈ വിവരങ്ങൾ അനുസരിച്ച് ജിഎസ്ടി സെ‍‌ർവ‍ർ നിങ്ങൾക്ക് ഒരു 12 അക്ക യുണീക്ക് നമ്പറും (ഇബിഎൻ) ക്യൂ ആ‍ർ കോഡും രേഖപ്പെടുത്തിയിട്ടുള്ള വേ-ബിൽ നൽകും. ഈ രേഖയാണ് ആ വാഹനത്തിന്റെ യാത്രയ്ക്കുള്ള അം​ഗീകൃത രേഖ.



ഇന്ത്യയിലെവിടെയും ഉപയോ​ഗിക്കാം

ഓൺലൈനിൽ നിന്ന് ലഭിക്കുന്ന ഈ രേഖ ഉപയോ​ഗിച്ച് ഇന്ത്യയിലെവിടെയും ചരക്കുമായി യാത്ര ചെയ്യാവുന്നതാണ്. തങ്ങൾക്ക് ആവശ്യമായ ഇ-വേ ബില്ലുകൾ അതത് സമയത്ത് ആവശ്യക്കാ‍ർക്ക് തയ്യാറാക്കുകയും ചെയ്യാം.



ഇ-വേ ബില്ലിന്റെ ഭാ​ഗങ്ങൾ

ഇ-വേ ബില്ലിന് പ്രധാനമായും രണ്ട് ഭാ​ഗങ്ങളാണുള്ളത്. പാ‍ർട്ട് എയും പാ‍ർട്ട് ബിയും. അവ എന്തൊക്കെയാണെന്ന് നോക്കാം



പാ‍ർട്ട് എയിൽ നൽകേണ്ട വിവരങ്ങൾ

• സ്വീകർത്താവിന്റെ രജിസ്ട്രേഷൻ വിവരങ്ങൾ
• സാധന സാമ​ഗ്രികൾ എത്തിക്കേണ്ട സ്ഥലം
• ഇൻവോയ്സ് നമ്പ‍ർ
• ഇൻവോയ്സ് തീയതി
• വില വിവരങ്ങൾ
• എച്ച്.എസ്.എൻ കോഡ്
• ​ഗതാ​ഗത ഉപാധി വിവരങ്ങൾ



പാ‍ർട്ട് ബി

വാഹനത്തെ സംബന്ധിച്ച വിവരങ്ങളാണ് പാ‍ർട്ട് ബിയിൽ ഉൾപ്പെടുത്തേണ്ടത്. വാഹനത്തിന്റെ രജിസ്റ്റർ നമ്പർ ഉൾപ്പെടെയുള്ള വിവരങ്ങൾ ഇവിടെ ചേ‍ർക്കണം.



ഒരു ബില്ലിന്റെ കാലാവധി

100 കിലോ മീറ്ററിൽ താഴെ യാത്ര ചെയ്യേണ്ടുന്നവയുടെ ഇ-വേ ബിൽ കാലാവധി ഒരു ദിവസമാണ്. ബിൽ ഉണ്ടാക്കിയ സമയം മുതൽ 24 മണിക്കൂറാണ് കണക്കാക്കുക. ഏതെങ്കിലും കാരണവശാൽ ചരക്കു നീക്കും താമസിച്ചാൽ പുതിയ ഇ-വേ ബിൽ ഉണ്ടാക്കേണ്ടതാണ്.



ഇ-വേ ബിൽ കാൻസൽ ചെയ്യാം

ഉദ്ദേശിച്ച ചരക്കു ​ഗതാ​ഗതം നടക്കാത വന്നാൽ ഇ-വേ ബിൽ തയ്യാറാക്കി 24 മണിക്കൂറിനുള്ളിൽ കാൻസൽ ചെയ്യാൻ ഓപ്ഷനുണ്ട്. എന്നാൽ കാൻസൽ ചെയ്യുന്നതിന് കാരണം കാണിച്ചിരിക്കണം എന്നു മാത്രം. ഒരിയ്ക്കൽ കാൻസൽ ചെയ്ത ബിൽ പിന്നീട് ഉപയോ​ഗിക്കാൻ പാടില്ല.



ഇ-വേ ബിൽ ആവശ്യമില്ലാത്തത് ആ‍ർക്കൊക്കെ?

യന്ത്ര സഹായമില്ലാത്ത വാഹനത്തിൽ ചരക്കു ​ഗതാ​ഗതം നടത്തുമ്പോൾ ഇ-വേ ബിൽ ആവശ്യമില്ല. കൂടാതെ പോ‍ർട്ടുകളിൽ നിന്നും മറ്റും സാധനങ്ങൾ കസ്റ്റംസ് ക്ലിയറൻസിനായി കൊണ്ടു പോകുമ്പോഴും ഇ-വേ ബിൽ വേണ്ട.

malayalam.goodreturns.in