വെയിറ്റിംഗ് ലിസ്റ്റിലുള്ള ട്രെയിൻ ടിക്കറ്റ് കൺഫേം ആകുമോ? അറിയാൻ മാർഗം ഇതാ..

യാത്രകളുടെയും മറ്റും അവസാന നിമിഷങ്ങളിൽ ട്രെയിൻ ടിക്കറ്റുകൾ ബുക്ക് ചെയ്യുമ്പോൾ പലരും വെയിറ്റിംഗ് ലിസ്റ്റിലാണ് ഉണ്ടാകുക. എന്നാൽ, ഇനി മുതൽ ഇന്ത്യൻ റെയിൽവേ കാറ്ററിംഗ് ആൻഡ് ടൂറിസം കോർപ്പറേഷന്റെ വെബ്സൈറ്റ് (ഐആർസിടിസി) വഴി ടിക്കറ്റുകൾ കൺഫേം ആകാൻ സാധ്യതയുണ്ടോയെന്ന് അറിയാനും സാധിക്കും. 

പുതിയ വെബ്സൈറ്റ്

പുതുക്കിയ ഐആർസിടിസി വെബ്സൈറ്റിലാണ് ഈ സൗകര്യമുള്ളത്. സെന്റ‍‍ർ ഫോ‍ർ റെയിൽവേ ഇൻഫർമേഷൻ സിസ്റ്റംസ് വികസിപ്പിച്ച പുതിയ അൽഗൊരിതം അടിസ്ഥാനമാക്കിയാണ് വെയിന്റിം​ഗ് ലിസ്റ്റിലുള്ള ടിക്കറ്റ് കൺഫേം ആകുമോയെന്ന സാധ്യത മനസ്സിലാക്കുന്നത്.

ബുക്കിം​ഗ് ട്രെൻഡ്

ബുക്കിം​ഗ് ട്രെൻഡ് അടിസ്ഥാനമാക്കിയാണ് ടിക്കറ്റിന്റെ സാധ്യത പരിശോധിക്കുന്നത്. റെയിൽവേയിൽ നിന്ന് തന്നെ ലഭിക്കുന്ന വിവരങ്ങളാണ് ഇതിനായി ഉപയോ​ഗിക്കുന്നത്. കഴിഞ്ഞ 13 വർഷത്തെ വിവരങ്ങൾ അടങ്ങുന്നതാണ് പുതിയ അൽ​ഗൊരിതം.

ഐഡിയ പിയൂഷ് ഗോയലിന്റേത്

റെയിൽവേ മന്ത്രി പിയൂഷ് ഗോയൽ ആണ് ടിക്കറ്റുകളുടെ സാധ്യത പരിശോധിക്കുന്ന ആശയം മുന്നോട്ട് വച്ചത്. ഇതിനായി അദ്ദേഹം കഴിഞ്ഞ ഒരു വർഷത്തെ സാവകാശം ഉദ്യോ​ഗസ്ഥ‍ർക്ക് നൽകി.

രജിസ്റ്റ‍‍‍ർ ചെയ്യേണ്ട ആവശ്യമില്ല

നിങ്ങളുടെ യൂസർ നെയിമും പാസ്‍വേ‍ർഡും മറന്നാലും പുതിയ വെബ്സൈറ്റ് വഴി ട്രെയിനുകളെക്കുറിച്ചോ സീറ്റ് ഒഴിവുകളെക്കുറിച്ചോ വിവരങ്ങൾ തേടാം. പഴയ വെബ്സൈറ്റിൽ ലോ​ഗിൻ ചെയ്യുന്നവർക്ക് മാത്രമായിരുന്നു സേവനങ്ങൾ ലഭിച്ചിരുന്നത്. എന്നാൽ ഇപ്പോൾ ഉപയോക്താവിന് ട്രെയിനുകൾ അന്വേഷിക്കാനും തിരയാനും സീറ്റുകളുടെ ലഭ്യത പരിശോധിക്കാനും രജിസ്റ്റ‍ർ ചെയ്യേണ്ട ആവശ്യമില്ല.

ടിക്കറ്റ് ബുക്കിം​ഗ്

പൊതുജനങ്ങൾക്ക് ബുദ്ധിമുട്ടുണ്ടാക്കാത്ത തരത്തിൽ പഴയതും പുതിയതുമായ വെബ്സൈറ്റുകളിൽ ഇപ്പോൾ ട്രെയിൻ ടിക്കറ്റുകൾ ബുക്ക് ചെയ്യാവുന്നതാണ്. പഴയ വെബ്സൈറ്റിൽ തന്നെയാണ് പുതിയതിലേയ്ക്ക് പോകാനുള്ള ലിങ്ക് നൽകിയിരിക്കുന്നത്.

malayalam.goodreturns.in