ആധാ‍ർ കാ‍ർഡിലെ ജനനതീയതി തെറ്റാണോ? തിരുത്താൻ അൽപ്പം പാട്പെടും

നിങ്ങളുടെ ആധാ‍ർ കാ‍ർഡിലെ ജനനതീയതിയിൽ തെറ്റുണ്ടോ? എങ്കിൽ തിരുത്താൻ ഇനി അൽപ്പം പാട്പെടും. യുണീക് ഐഡന്റിഫിക്കേഷൻ അതോറിറ്റി ഓഫ് ഇന്ത്യ (യുഐഡിഎഐ) അടുത്തിടെ പുറത്തിറക്കിയ അറിയിപ്പ് പ്രകാരം ആധാർ കാർഡിലുള്ള നിങ്ങളുടെ ജനനത്തീയതി ഒന്നിലധികം തവണ തിരുത്തണമെങ്കിൽ യുഐഡിഎഐയുടെ റീജിയണൽ ഓഫീസ് സന്ദർശിക്കണം.

ഒന്നലധികം തവണ തിരുത്താൻ

ആധാ‍ർ കാർഡ് എടുത്ത സമയത്ത് നൽകിയ നിങ്ങളുടെ ജനനത്തീയതി തെറ്റാണെങ്കിൽ അടുത്തുള്ള എൻറോൾമെന്റ് സെന്ററിലെത്തി തിരുത്താവുന്നതാണ്. എന്നാൽ രണ്ടാം തവണയും ജനനത്തീയതി തെറ്റായാണ് നൽകിയിരിക്കുന്നതെങ്കിൽ യുഐഡിഎഐയുടെ റീജിയണൽ ഓഫീസിലെത്തി മറ്റ് നടപടികൾ സ്വീകരിക്കേണ്ടതാണ്.

തെറ്റുകൾ കുറയ്ക്കാൻ

ഇത്തരത്തിലുള്ള തെറ്റുകൾ കുറയ്ക്കുന്നതിന്റെ ഭാ​ഗമായാണ് തിരുത്തൽ നടപടികൾ കൂടുതൽ സങ്കീർണമാക്കിയിരിക്കുന്നതെന്ന് അധിക‍ൃതർ വ്യക്തമാക്കി. മുമ്പ് ജനനത്തീയതി എത്ര തവണ വേണമെങ്കിലും അടുത്തുള്ള എൻറോൾമെന്റ് സെന്ററിലെത്തി തിരുത്താമായിരുന്നു. തിരുത്തലുകൾ നടത്താൻ ‌നിശ്ചിത പരിധി ഇല്ലായിരുന്നു.

തപാൽ വഴി തിരുത്തലുകൾ നടത്താൻ സാധിക്കില്ല

ആധാർ വിശദാംശങ്ങൾ തപാൽ വഴി അപ്ഡേറ്റ് ചെയ്യുന്ന പ്രക്രിയയും യുഐഡിഎഐ നിർത്തി വച്ചിട്ടുണ്ട്. ആധാറിന്റെ പ്രാരംഭ എൻറോൾമെന്റ് നിയമമനുസരിച്ച് വ്യക്തികൾക്ക് അവരുടെ വിശദാംശങ്ങൾ തപാൽ വഴി അപ്ഡേറ്റ് ചെയ്യാനും തിരുത്താനും സാധിച്ചിരുന്നു. നിർദ്ദിഷ്ട വിലാസത്തിലേയ്ക്ക് ആവശ്യമായ രേഖകൾ സഹിതമാണ് ഇത്തരത്തിൽ അയച്ചിരുന്നത്. എന്നാൽ ഇപ്പോൾ UIDAIയുടെ സ്വയം സേവന അപ്ഡേറ്റ് പോർട്ടൽ (എസ്എസ്‍യുപി) വഴി ഓൺലൈനായോ അല്ലെങ്കിൽ അടുത്തുള്ള ആധാർ എൻറോൾമെന്റ് സെന്റർ സന്ദർശിച്ചോ മാത്രമേ വിവരങ്ങൾ അപ്ഡേറ്റ് ചെയ്യാനാകൂ.

അഡ്രസ് തിരുത്താൻ

എന്നാൽ ആധാർ കാർഡിലെ അഡ്രസ് തിരുത്താൻ പുതിയ മാർഗം അടുത്തിടെ യുണീക്ക് ഐഡന്റിഫിക്കേഷൻ അതോറിറ്റി ഓഫ് ഇന്ത്യ വിശദമാക്കിയിരുന്നു. ഇതനുസരിച്ച് രഹസ്യ പിൻ അടങ്ങിയ കത്ത് വഴിയാകും ഇനി മുതൽ അഡ്രസ് തിരുത്താൻ സാധിക്കുക. 2019 ഏപ്രിൽ ഒന്നു മുതൽ പുതിയ സർവീസ് തുടങ്ങാനാണ് ഉദ്ദേശിക്കുന്നത്. വിലാസം അപ്ഡേറ്റ് ചെയ്യുന്നതിന് യുഐഡിഎഐയുടെ വെബ്സൈറ്റിൽ അപേക്ഷിച്ചാൽ നിങ്ങൾക്ക് ഒരു രഹസ്യ പിൻ ലെറ്റർ വഴി ലഭിക്കും. ഈ പിൻ ഉപയോഗിച്ച് എസ്എസ്ഇപി ഓൺലൈൻ പോർട്ടൽ വഴി അഡ്രസ് തിരുത്താനാകും. ബാങ്കുകളും ക്രെഡിറ്റ് കാർഡ് കമ്പനികളും ഡെബിറ്റ് അല്ലെങ്കിൽ ക്രെഡിറ്റ് കാർഡുകൾ ആക്ടിവേറ്റ് ചെയ്യുന്നതിന് അയച്ചു തരുന്ന ലെറ്റർ രീതിയിലായിരിക്കും അഡ്രസ് തിരുത്തുന്നതിനുള്ള രഹസ്യ നമ്പർ ലഭിക്കുക.

malayalam.goodreturns.in