എന്താണ് ഇടക്കാല ബജറ്റും വോട്ട് ഓണ്‍ എക്കൗണ്ടും തമ്മിലുള്ള വ്യത്യാസം?

ഇവ രണ്ടും ഒന്നാണെന്ന ധാരണയാണ് പൊതുവെയുള്ളത്. എന്നാല്‍ തമ്മില്‍ പ്രകടമായ അന്തരമുണ്ട്. രണ്ട് മാസത്തെ സര്‍ക്കാരിന്റെ അടിയന്തര ചെലവുകള്‍ക്ക് പാര്‍ലമെന്റിന്റെ അംഗീകാരം നേടിയെടുക്കുന്ന പരിപാടിയാണ് വോട്ട് ഓണ്‍ അക്കൗണ്ട്. അതായത് തെരഞ്ഞെടുപ്പ് കഴിയുന്നത് വരെ ആവശ്യമായ ചെലവുകള്‍ക്ക് പാര്‍ലമെന്റിന്റെ അനുവാദം വാങ്ങാനുള്ള വഴി. രണ്ടു മാസത്തേക്കാണ് വോട്ട് ഓണ്‍ അക്കൗണ്ടിന്റെ കാലാവധിയെങ്കിലും ആറു മാസം വരെ ഇത് നീട്ടിയെടുക്കാം. അതില്‍ കൂടുതല്‍ പറ്റില്ല. കാരണം രണ്ട് പാര്‍ലമെന്റ് സമ്മേളനങ്ങള്‍ക്കിടയിലെ ഏറ്റവും കൂടിയ കാലയളവാണ് ആറ് മാസം.

പൂര്‍ണ-താല്‍ക്കാലിക ബജറ്റുകളില്‍ നിന്ന് വ്യത്യസ്തമായി വോട്ട് ഓണ്‍ അക്കൗണ്ട് ചെലവുകള്‍ മാത്രമായി ബന്ധപ്പെട്ടതാണ്. സര്‍ക്കാരിന്റെ വരവുകളെ കുറിച്ച് ഒന്നും പറയുകയില്ല. മാത്രമല്ല, പുതിയ നികുതികള്‍ ഏര്‍പ്പെടുത്തുകയോ ക്ഷേമപദ്ധതികള്‍ പ്രഖ്യാപിക്കുകയോ ഇല്ല.

ബജറ്റിനു മുമ്പ് മനസ്സിലാക്കിയിരിക്കേണ്ട ചില സാങ്കേതിക പദങ്ങള്‍

കേന്ദ്രമന്ത്രി പിയൂഷ് ഗോയല്‍ അവതരിപ്പിക്കാനിരിക്കുന്നതാവട്ടെ, ഇടക്കാല ബജറ്റാണ്. അതായത് സര്‍ക്കാരിന്റെ വരവുകളും ചെലവുകളും കൈകാര്യം ചെയ്യുന്ന ബജറ്റ്. തെരഞ്ഞെടുപ്പ് വര്‍ഷമായതിനാല്‍ ഇടക്കാല ബജറ്റ് എന്നു പറയുന്നുവെന്ന് മാത്രം. എന്നാല്‍ ഇടക്കാല ബജറ്റില്‍ പുതിയ നികുതികളോ പദ്ധതികളോ പ്രഖ്യാപിക്കുന്ന പതിവില്ല. അതേസമയം, തെരഞ്ഞെടുപ്പിന് ശേഷം വരുന്ന സര്‍ക്കാരിന് ഇടക്കാല ബജറ്റിലെ നിര്‍ദ്ദേശങ്ങള്‍ മാറ്റാന്‍ സ്വാതന്ത്ര്യമുണ്ട്. പൂര്‍ണ ബജറ്റ് അവതരണത്തിലാണ് ഈ മാറ്റങ്ങള്‍ കൊണ്ടുവരിക.