മാസം 3000 രൂപ പെൻഷൻ കിട്ടാൻ നിങ്ങൾ ചെയ്യേണ്ടത് ഇത്രമാത്രം; വെറുതേ കളയരുത്

യോ​ഗ്യതകൾ

• അസംഘടിത മേഖലയിലെ തൊഴിലാളി ആയിരിക്കണം

• പ്രതിമാസ വരുമാനം 15,000 രൂപയോ അതില്‍ താഴെയോ ആയിരിക്കണം

• അപേക്ഷകർ 18നും 40നും ഇടയില്‍ പ്രായമുള്ളവരായിരിക്കണം

• അപേക്ഷകർ ആദായ നികുതി അടയ്ക്കുന്നവർ ആയിരിക്കരുത്

• എന്‍പിഎസ്, ഇസ്‌ഐ, ഇപിഎഫ് തുടങ്ങിയ പദ്ധതികളിൽ അംഗങ്ങളാകരുത്

ആവശ്യമായവ എന്തൊക്കെ?

• സേവിങ്‌സ് ബാങ്ക് അക്കൗണ്ട് (ജന്‍ധന്‍ അക്കൗണ്ടായാലും മതി)

• ആധാര്‍ കാര്‍ഡ്

• മൊബൈൽ ഫോൺ നമ്പർ
  

അപേക്ഷിക്കേണ്ടത് എങ്ങനെ?

ആവശ്യമായ രേഖകളുമായി അടുത്തുള്ള കോമൺ സർവീസ് സെന്ററിൽ എത്തുക. തുടർന്ന് സ്വയം സാക്ഷ്യപ്പെടുത്തിയ അപേക്ഷാ ഫോം, ബാങ്ക് അക്കൗണ്ടിൽ നിന്ന് പണം ഡെബിറ്റ് ചെയ്യുന്നതിനുള്ള സമ്മതപത്രം എന്നിവ സമർപ്പിക്കുക. ആധാറിലെയും ബാങ്ക് പാസ്ബുക്കിലെയും വിവരങ്ങൾ പരിശോധിച്ച് ബന്ധപ്പെട്ട ഉദ്യോഗസ്ഥർ നിങ്ങളുടെ അപേക്ഷ ഫോം സ്വീകരിക്കും. കൂടാതെ, കോൺടാക്റ്റ് വിശദാംശങ്ങൾ പരിശോധിക്കാനായി നിങ്ങളുടെ മൊബൈൽ നമ്പറിലേയ്ക്ക് ഒരു ഒടിപി (ഒറ്റത്തവണ പാസ്വേഡ്) ലഭിക്കും.

പെൻഷൻ സ്കീം കാർഡ്

എൻറോൾമെൻറ് നടപടികൾ പൂർത്തിയായാൽ ഉദ്യോഗസ്ഥർ നിങ്ങളുടെ പെൻഷൻ നമ്പർ ഉൾപ്പെടുന്ന ഒരു പെൻഷൻ സ്കീം കാർഡ് നൽകും. അതിൽ നിങ്ങളുടെ വ്യക്തിപരമായ വിശദാംശങ്ങൾ, പെൻഷൻ പദ്ധതിയിലേയ്ക്ക് സംഭാവന ചെയ്യുന്ന തുക എന്നിവയുണ്ടാകും.

നിക്ഷേപിക്കേണ്ട തുക

18 വയസ്സുള്ള ഒരാള്‍ക്ക് പദ്ധതിയില്‍ ചേരാന്‍ പ്രതിമാസം 55 രൂപയാണ് അടയ്‌ക്കേണ്ടി വരിക. പ്രായം കൂടുന്നതിനനുസരിച്ച് നിക്ഷേപ തുകയും വർദ്ധിക്കും. 50 ശതമാനം വിഹിതം സര്‍ക്കാരും നല്‍കും.

പെൻഷൻ ലഭിക്കുന്നത് എപ്പോൾ?

പദ്ധതി പ്രകാരം ഒരാള്‍ക്ക് 60 വയസ്സാകുമ്പോൾ മുതലാണ് പെൻഷൻ ലഭിച്ചു തുടങ്ങുക. പ്രതിമാസം 3000 രൂപ പെന്‍ഷന്‍ ലഭിക്കും. കാലാവധി പൂർത്തിയാകും മുമ്പ് വരിക്കാരന്‍ മരിച്ചാൽ ഭാര്യക്ക് പദ്ധതിയില്‍ തുടരാം. അടുത്തുള്ള കോമണ്‍ സര്‍വീസ് സെന്ററിലെത്തിയാണ് പദ്ധതിയില്‍ ചേരേണ്ടത്.

പദ്ധതിയിൽ നിന്ന് പിന്മാറിയാൽ?

പദ്ധതിയില്‍ ചേര്‍ന്ന് 10 വര്‍ഷത്തിനു മുമ്പാണ് പിന്മാറുന്നതെങ്കില്‍ അടച്ച തുക മാത്രമാണ് തിരിച്ചു കിട്ടുക. എന്നാൽ പത്തുവര്‍ഷം കഴിഞ്ഞോ അപേക്ഷകന് 60 വയസ്സ് ആകുന്നതിന് മുമ്പോ പിന്മാറുകയാണെങ്കിൽ നിക്ഷേപിക്കുന്ന തുകയും പലിശയും തിരികെ ലഭിക്കും.