ഇന്ത്യയുടെ കുറഞ്ഞ ജി‍ഡിപി വളർച്ചാ നിരക്ക് നിങ്ങളെ ബാധിക്കുന്നത് എങ്ങനെ?

എന്താണ് ജി‍ഡിപി എന്നും, രാജ്യത്തിന്റെ ജി‍ഡിപി വളർച്ച നിരക്ക് നിങ്ങളെ എങ്ങനെ ബാധിക്കുമെന്നും പലർക്കും അറിയാൻ സാധ്യതയില്ല. ഇന്നലെ പുറത്തു വിട്ട ഈ സാമ്പത്തിക വർഷത്തിലെ ആദ്യപാദ ജി‍ഡിപി നിരക്ക് സാമ്പത്തിക വിദ​ഗ്ധർ പ്രതീക്ഷിച്ചതിനേക്കാളും വളരെ കുറവാണ്. വെറും 5 ശതമാനം മാത്രമാണ് ഇന്ത്യയുടെ വളർച്ച നിരക്ക്. അതുകൊണ്ട് തന്നെ ഇന്ത്യയുടെ കുറഞ്ഞ ജി‍ഡിപി വളർച്ചാ നിരക്ക് സാധാരണക്കാരെ എങ്ങനെ ബാധിക്കുമെന്ന് പരിശോധിക്കാം.

വരുമാനം കുറയും

ജിഡിപി വളർച്ചാ നിരക്ക് കുറയുന്നത് ഏറ്റവും കൂടുതൽ ബാധിക്കുന്നത് സാധാരണക്കാരെയാണ്. മാന്ദ്യം ആളുകളുടെ ശരാശരി വരുമാനത്തെ ബാധിക്കുകയും തൊഴിലവസരങ്ങൾ കുറയ്ക്കുകയും ചെയ്യുന്നു. ഇന്ദിരാഗാന്ധി ഇൻസ്റ്റിറ്റ്യൂട്ട് ഓഫ് ഡവലപ്മെന്റ് റിസർച്ചിലെ സാമ്പത്തിക ശാസ്ത്ര പ്രൊഫസർ ആർ. നാഗരാജ് പറയുന്നത് അനുസരിച്ച് 2018-19ൽ പ്രതിശീർഷ പ്രതിമാസ വരുമാനം10,534 രൂപ ആയിരുന്നു. എന്നാൽ വാർഷിക ജിഡിപി വളർച്ച 5% ആയതോടെ ഈ സാമ്പത്തിക വർഷം വരുമാനം 526 രൂപ കൂടി വർദ്ധിക്കും.

തുടർച്ചയായ ഇടിവ്

വാർഷിക ജിഡിപി വളർച്ചാ നിരക്ക് 5 ശതമാനത്തിൽ നിന്ന് 4 ശതമാനമായി കുറയുമ്പോൾ പ്രതിമാസം 105 രൂപ വീതം കുറയും. വാർഷിക അടിസ്ഥാനത്തിൽ എടുത്താൽ, ഒരു വ്യക്തിക്ക് ആകെ നഷ്ടം ഒരു വർഷത്തിൽ 1,260 രൂപ ആയിരിക്കും. 2018-19 ലെ ഒന്നാം പാദത്തിൽ 8 ശതമാനമായിരുന്ന ജിഡിപിയാണ് 2020 സാമ്പത്തിക വർഷത്തെ ഒന്നാം പാദത്തിൽ 5 ശതമാനമായി കുറഞ്ഞത്. മുൻ‌വർഷത്തെ വാർഷിക ജിഡിപി നിരക്കായ 7.3 ശതമാനത്തിൽ നിന്ന് ഈ വാർഷത്തെ വാർഷിക ജിഡിപി വളർച്ച 6.7 ശതമാനമായാണ് കണക്കു കൂട്ടിയിരിക്കുന്നത്. വളർച്ച കുറയുന്ന തുടർച്ചയായ മൂന്നാമത്തെ സാമ്പത്തിക വർഷമാണിത്.

കൂടുതൽ ബാധിക്കുന്നത് ആരെ?

ജിഡിപി വളർച്ച സാധാരണക്കാരിൽ ചെലുത്തുന്ന സ്വാധീനം വിശദീകരിച്ച മുതിർന്ന സാമ്പത്തിക വിദഗ്ധൻ നാഗരാജ് പറഞ്ഞു, ജിഡിപി കുറയുന്നത് പ്രതിശീർഷ വരുമാനത്തിൽ ആനുപാതികമായി ഇടിവുണ്ടാക്കും. സമ്പദ്‌വ്യവസ്ഥയിലെ ഉയർന്ന അസമത്വം കണക്കിലെടുക്കുമ്പോൾ, സമ്പന്നരെ അപേക്ഷിച്ച് ജിഡിപി വളർച്ചാ നിരക്കിന്റെ ഇടിവ് ദരിദ്രർക്കാണ് കൂടുതൽ അനുഭവിക്കേണ്ടി വരുന്നത്.

ദാരിദ്ര്യരേഖയ്ക്ക് താഴെയുള്ളവരുടെ എണ്ണം

ജിഡിപി കുറയുന്നതിന് അനുസരിച്ച് ദാരിദ്ര്യരേഖയ്ക്ക് താഴെയുള്ളവരുടെ എണ്ണം ഉയരും. ജിഡിപി വളർച്ചാ നിരക്കിന്റെ ഇടിവ് തൊഴിൽ നിരക്കിലും ഇടിവുണ്ടാക്കും.

malayalam.goodreturns.in