പാൻ കാർഡ് നഷ്ട്ടപ്പെട്ടോ? വെറും 50 രൂപയ്ക്ക് പുതിയ കാർഡ് ലഭിക്കുന്നത് എങ്ങനെ?

വിവിധ ആവശ്യങ്ങൾക്കായി ഐഡന്റിറ്റി ഡോക്യുമെന്റായി ഉപയോഗിക്കുന്ന രേഖകളിലൊന്നാണ് പാൻ കാർഡുകൾ. എല്ലാവർക്കും പേഴ്സിൽ എളുപ്പത്തിൽ സൂക്ഷിക്കാൻ പറ്റുന്ന ഒരു സുപ്രധാന രേഖയാണ് ലാമിനേറ്റഡ് പാൻ (സ്ഥിരം അക്കൗണ്ട് നമ്പർ) കാർഡ്. അതുകൊണ്ട് തന്നെ എപ്പോഴെങ്കിലും നിങ്ങളുടെ പാൻ കാർഡ് നഷ്‌ടപ്പെടുകയോ കേടുപാടുകൾ സംഭവിക്കുകയോ ചെയ്താൽ മറ്റൊരു പകർപ്പ് ലഭിക്കാൻ നിങ്ങൾ ചെയ്യേണ്ടതെന്ത്?

പാൻ കാർഡ് ലഭിക്കുന്നത് എവിടെ നിന്ന്?

ആദായനികുതി വകുപ്പ് യു‌ടി‌ഐ‌ടി‌എസ്‌എൽ അല്ലെങ്കിൽ എൻ‌എസ്‌ഡി‌എൽ വഴി നഷ്ട്ടപ്പെട്ട പാൻ കാർ‍ഡിന് പകരമുള്ള കാർഡിന് അപേക്ഷിക്കാം. നിങ്ങളുടെ പാൻ കാർഡ് ഏത് ഏജൻസിയാണ് നൽകിയത് എന്നതിനെ ആശ്രയിച്ച്, നിങ്ങളുടെ പാൻ കാർഡിന്റെ പുന: പ്രസിദ്ധീകരണത്തിന് അപേക്ഷിക്കാം. അപേക്ഷിക്കുമ്പോൾ, നിങ്ങളുടെ പാൻ കാർഡ് നമ്പറും ജനനത്തീയതിയും നൽകേണ്ടതുണ്ട്. പാൻ, ആധാർ എന്നിവ ലിങ്കുചെയ്യേണ്ടത് നിർബന്ധമായതിനാൽ എൻ‌എസ്‌ഡി‌എൽ നിങ്ങളുടെ ആധാർ കാർഡ് നമ്പറും ആവശ്യപ്പെടും.

വീണ്ടും അച്ചടിക്കാൻ ഓർഡർ ചെയ്യുന്നതെങ്ങനെ?

എൻ‌എസ്‌ഡി‌എല്ലിന്റെയോ യു‌ടി‌ടി‌എസ്‌എല്ലിന്റെയോ ഓൺലൈൻ പോർട്ടലിൽ "പാൻ കാർഡ് വീണ്ടും അച്ചടിക്കുക" എന്ന ഓപ്ഷൻ തിരഞ്ഞെടുക്കുക. നിങ്ങളുടെ വീട്ടിലേക്ക് പാൻ കാർഡിന്റെ പുതിയ പകർപ്പ് ലഭിക്കാൻ ഈ സേവനം ഉപയോ​ഗപ്പെടുത്തിയാൽ മതി. നിലവിലുള്ള പാൻ കാർഡ് ഡാറ്റയിൽ മാറ്റങ്ങളൊന്നും വരുത്താൻ ആഗ്രഹിക്കാത്തവർക്ക് ഇത് ഉപയോഗിക്കാം.

ചാർജ്

രണ്ട് ഏജൻസികളും ഇന്ത്യൻ വിലാസത്തിലേക്ക് പാൻ കാർഡ് ഡെലിവറി ചെയ്യുന്നതിന് 50 രൂപയാണ് ഈടാക്കുക. ഇന്ത്യക്ക് പുറത്തുള്ളവരുടെ അഡ്രസിൽ 959 രൂപയ്ക്ക് പാൻ കാർഡിന്റെ പകർപ്പ് ലഭിക്കും. ആദായനികുതി വകുപ്പിന്റെ രേഖകളിൽ നിങ്ങൾ നൽകിയിരിക്കുന്ന വിലാസം പരിശോധിക്കേണ്ടതുണ്ട്, കാരണം നിങ്ങളുടെ പാൻ കാർഡ് ആ വിലാസത്തിലേക്ക് മാത്രമേ ലഭിക്കുകയുള്ളൂ.

ഇ-പാൻ കാർഡ്

ഭേദഗതി വരുത്തിയ ആദായനികുതി നിയമങ്ങൾ അനുസരിച്ച് പാൻ കാർഡിന്റെ സോഫ്റ്റ് കോപ്പി കൈയിൽ സൂക്ഷിച്ചാൽ മതി. പുതിയതും പഴയതുമായ പാൻ കാർഡ് ഉടമകൾക്ക് യുടിഐടിഎസ്എൽ, എൻ‌എസ്‌ഡി‌എൽ-ടിൻ എന്നിവ വഴി ഇ-പാൻ ലഭിക്കും. ആദായനികുതി വകുപ്പ് നൽകുന്ന പിഡിഎഫ് ഫയലും പാൻ കാർഡിന്റെ പകർപ്പുകൾക്ക് തുല്യമായി പരിഗണിക്കും. ഇക്കാര്യത്തിൽ ആധാർ കാർഡുകളും പാൻ കാർഡുകൾക്ക് സമാനമാണ്.

malayalam.goodreturns.in