ഭാരത് ബോണ്ട് ഇടിഎഫ്; സബ്സ്ക്രൈബ് ചെയ്യണമെന്നുണെങ്കിൽ ഈ കാര്യങ്ങൾ ശ്രദ്ധിക്കുക

ഡിസംബർ 4-നാണ് കേന്ദ്രസർക്കാർ ഇന്ത്യയിലെ ആദ്യ ബോണ്ട് എക്സ്‌ചേഞ്ച് ട്രേഡഡ് ഫണ്ട് (ഇടിഎഫ്) അവതരിപ്പിച്ചത്. നിഫ്റ്റി ഭാരത് ബോണ്ട് സൂചിക ട്രാക്കുചെയ്‌ത് കേന്ദ്ര പൊതുമേഖലാ സ്ഥാപനങ്ങളിൽ നിക്ഷേപം നടത്തുന്ന ഒരു ഫണ്ടാണിത്. മൂന്ന് വർഷം 10 വർഷം എന്നിങ്ങനെ രണ്ട് കാലാവധികളിലുള്ള ഭാരത് ബോണ്ട് ഇടിഎഫുകൾ നിക്ഷേപകർക്ക് തിരഞ്ഞെടുക്കാനാകും. വ്യക്തിഗത നിക്ഷേപകർക്കും ഭാരത് ബോണ്ട് ഇടിഎഫിൽ നിക്ഷേപം നടത്താം. റീട്ടെയിൽ നിക്ഷേപകർക്ക് ഇടിഎഫിൽ കുറഞ്ഞത് 1000 രൂപ വരെ നിക്ഷേപിക്കാവുന്നതാണ്. സാധാരണ ജനങ്ങളെ ലക്ഷ്യമിട്ടാണ് ഭാരത് ബോണ്ട് ഇടിഎഫ് അവതരിപ്പിക്കുന്നത്. ഈ ബോണ്ടുകൾ നിങ്ങൾക്ക് സ്റ്റോക്ക് എക്സ്‌ചേഞ്ചിൽ വാങ്ങാനും വിൽക്കാനും കഴിയും.

ഭാരത് ബോണ്ട് ഇടിഎഫുകളുടെ നേട്ടങ്ങൾ

ഇടിഎഫിന്റെ ഏറ്റവും വലിയ നേട്ടം എന്ന് പറയുന്നത് നികുതി ആനുകൂല്യമാണ്. മൂന്ന് വർഷത്തിൽ കുറഞ്ഞ കാലയളവിലുള്ള ഡെറ്റ് ഫണ്ടുകൾക്ക് സ്ലാബ് അടിസ്ഥാനത്തിലും കൂടുതൽ കാലം കൈവശം വയ്‌ക്കുന്നവയ്‌ക്ക് സൂചികയോടൊപ്പം 20% നികുതിയും ചുമത്തുന്നതാണ്. ബാങ്കുകളിലെ സ്ഥിര നിക്ഷേപവുമായി താരതമ്യപ്പെടുത്തുമ്പോൾ ഇടിഎഫിന് ഇത് വലിയ നേട്ടമാണ്. മറ്റൊരു നേട്ടം മെച്യൂരിറ്റി ഘടനയാണ്. കൂടാതെ ഇടിഎഫുകൾക്ക് പരമ്പരാഗത ഓപ്പൺ എൻഡ് ഫണ്ടുകളേക്കാൾ കുറഞ്ഞ പ്രവർത്തനച്ചിലവും കൂടുതൽ സുതാര്യതയും ഉണ്ട്. ലിക്യുഡിറ്റിയാണ് മറ്റൊരു നേട്ടം. നിങ്ങളുടെ സൗകര്യപ്രകാരം ഭാരത് ബോണ്ട് ഇടിഎഫ് വാങ്ങാനും വിൽക്കാനും കഴിയും. കൂടാതെ നിങ്ങൾക്ക് ട്രേഡിംഗ് ദിവസത്തിൽ മാത്രമല്ല ഒരു ട്രേഡിംഗ് ദിവസത്തിലെ വ്യത്യസ്ത പോയിന്റുകളിൽ പ്രവേശിക്കാനും പുറത്തുകടക്കാനും കഴിയും.

ഭാരത് ബോണ്ട് ഇടിഎഫുകളുടെ കോട്ടങ്ങൾ

ഇടിഎഫിൽ ചില മാർക്കറ്റ് റിസ്‌ക്കുകൾ നിക്ഷേപകർ നേരിടേണ്ടി വരാറുണ്ട്. മിക്ക ചെറുകിട നിക്ഷേപകർക്കും വിപണി വില വളരെ പ്രധാനമാണ്, കാരണം അവർ എ‌എം‌സിയുമായി നേരിട്ട് ബന്ധപ്പെടുന്നതിനേക്കാൾ ഒരു സ്റ്റോക്ക് എക്സ്ചേഞ്ചിൽ യൂണിറ്റുകളുടെ ഇടപാടുകൾ നടത്തും. കാലാവധി പൂർത്തിയാക്കുന്നതിന് മുമ്പ് നിങ്ങൾ ഇടിഎഫിൽ നിന്ന് പിന്മാറുകയാണെങ്കിൽ മാർക്കറ്റിലെ ഈ ഏറ്റക്കുറച്ചിലുകൾ കാരണം നിങ്ങൾക്ക് നഷ്ടം നേരിടേണ്ടിവരാം.