ആരോഗ്യ സഞ്ജീവനി ഇൻഷുറൻസ് പോളിസി എടുത്താൽ നിങ്ങൾക്ക് ലഭിക്കുന്ന നേട്ടങ്ങൾ

ഇൻഷുറൻസ് റെഗുലേറ്ററി ആൻഡ് ഡെവലപ്‌മെന്റ് അതോറിറ്റി ഓഫ് ഇന്ത്യ (ഐആർ‌ഡി‌എ‌ഐ) വ്യക്തികൾക്കും കുടുംബങ്ങൾക്കുമായി ആരംഭിച്ച ആരോഗ്യ ഇൻഷുറൻസ് പോളിസിയാണ് ആരോഗ്യ സഞ്ജീവനി ഇൻഷുറൻസ് പോളിസി. ആശുപത്രിവാസവുമായി ബന്ധപ്പെട്ട ചെലവുകൾക്കായി 5 ലക്ഷം രൂപ വരെ ഈ പോളിസിയിലൂടെ ഉപഭോക്താക്കൾക്ക് ലഭിക്കും. ആരോഗ്യ സഞ്ജീവനി എന്ന സ്റ്റാൻഡേർഡ് ഹെൽത്ത് ഇൻഷുറൻസ് പോളിസിയെക്കുറിച്ച് അതോറിറ്റി മാർഗ്ഗനിർദ്ദേശങ്ങൾ പുറപ്പെടുവിക്കുകയും ചെയ്തിരുന്നു.

അനുമതി

29 ജനറൽ, ഹെൽത്ത് ഇൻഷുറൻസ് കമ്പനികൾക്ക് ഈ ഉൽപ്പന്നം വിപണനം ചെയ്യാൻ ഐആർ‌ഡി‌എ‌ഐ അനുമതി നൽകിയിട്ടുണ്ട്. താഴെ നൽകിയിരിക്കുന്ന ലിസ്റ്റിലുള്ള ഇൻഷുറൻസ് കമ്പനികളെ സമീപിച്ച് താൽപ്പര്യമുള്ളവർക്ക് ഈ സ്റ്റാൻഡേർഡ് ഹെൽത്ത് ഇൻഷുറൻസ് പോളിസി സ്വന്തമാക്കാവുന്നതാണ്. പ്രീമിയം നിരക്കുകളും ഉപഭോക്തൃ സേവനവും ഒരോ ഇൻഷുറൻസ് ദാതാക്കളിലും വ്യത്യസ്തമായിരിക്കും.

ഇൻഷുറൻസ് കമ്പനികൾ

• രഹേജ ക്യൂബിഇ ജനറൽ ഇൻഷുറൻസ് കമ്പനി
• ഭാരതി ആക്സ ജനറൽ ഇൻഷുറൻസ് കമ്പനി
• ചോള എംഎസ് ജനറൽ ഇൻഷുറൻസ് കമ്പനി
• റെലിഗെയർ ഹെൽത്ത് ഇൻഷുറൻസ് കമ്പനി
• മണിപ്പാൽ സിഗ്ന ഹെൽത്ത് ഇൻഷുറൻസ് കമ്പനി
• എഡൽവെയിസ് ജനറൽ ഇൻഷുറൻസ് കമ്പനി
• കൊട്ടക് ജനറൽ ഇൻഷുറൻസ് കമ്പനി
• ഫ്യൂച്ചൽ ജനറൽ ഇന്ത്യ ഇൻഷുറൻസ്
• ഐഎഫ്എഫ്കോ ടോക്കിയോ ജനറൽ ഇൻഷുറൻസ് കമ്പനി
• നവി ജനറൽ ഇൻഷുറൻസ് കമ്പനി
• ന്യൂ ഇന്ത്യ അഷ്വറൻസ് കമ്പനി
• മാക്സ് ബുപ ഹെൽത്ത് ഇൻഷുറൻസ് കമ്പനി
• ആദിത്യ ബിർള ഹെൽത്ത് ഇൻഷുറൻസ് കമ്പനി
• ടാറ്റാ എയ്ജ് ജനറൽ ഇൻഷുറൻസ് കമ്പനി
• ഗോ ഡിജിറ്റ് ജനറൽ ഇൻഷുറൻസ് കമ്പനി
• ലിബേർട്ടി ജനറൽ ഇൻഷുറൻസ് കമ്പനി
• ബജാജ് അലിയൻസ് ജനറൽ ഇൻഷുറൻസ് കമ്പനി
• റോയൽ സുന്ദരം ജനറൽ ഇൻഷുറൻസ് കമ്പനി
• ഐസിഐസിഐ ലോമ്പാർഡ് ജനറൽ ഇൻഷുറൻസ് കമ്പനി
• നാഷണൽ ഇൻഷുറൻസ്
• മാഗ്മ എച്ച്ഡിഐ ജനറൽ ഇൻഷുറൻസ് കമ്പനി
• യൂണിവേഴ്സൽ സോംപോ ജനറൽ ഇൻഷുറൻസ് കമ്പനി
• യുണൈറ്റഡ് ഇന്ത്യ ഇൻഷുറൻസ് കമ്പനി
• എച്ച്ഡിഎഫ്സി എർഗോ ജനറൽ ഇൻഷുറൻസ് കമ്പനി
• എച്ച്ഡിഎഫ്സി എർഗോ ഹെൽത്ത് ഇൻഷുറൻസ് കമ്പനി
• എസ്ബിഐ ജനറൽ ഇൻഷുറൻസ് കമ്പനി
• സ്റ്റാർ ഹെൽത്ത് ആൻഡ് അലൈഡ് ഇൻഷുറൻസ്
• ഓറിയന്റൽ ഇൻഷുറൻസ് കമ്പനി
• അക്കോ ജനറൽ ഇൻഷുറൻസ്

സവിശേഷതകൾ

• ഉപഭോക്താക്കളുടെ അടിസ്ഥാന ആശുപത്രി ആവശ്യങ്ങൾ ഉൾക്കൊള്ളുന്ന ഒരു സ്റ്റാൻഡേർഡ് ഉൽപ്പന്നമാണിത്.
• ഈ പോളിസിയിൽ കുറഞ്ഞത് ഒരു ലക്ഷം രൂപയും പരമാവധി 5 ലക്ഷം രൂപയുമാണ് ഇൻഷ്വർ ചെയ്യാൻ സാധിക്കുക.
• ഇവ വ്യക്തികൾക്കും കുടുംബത്തിനും ലഭ്യമാണ്.
• ആരോഗ്യ സഞ്ജീവനി പോളിസിയിൽ ആഡ്-ഓണുകളും ഓപ്ഷണൽ കവറുകളും ലഭ്യമല്ല.

പ്രായം

ഏറ്റവും കുറഞ്ഞതും കൂടിയതുമായ പ്രവേശന പ്രായം 18 ഉം 65 ഉം ആണ്. 'ഫാമിലി ഫ്ലോട്ടർ' പോളിസികൾക്ക് കീഴിലുള്ള കുട്ടികൾക്ക് പ്രവേശന പ്രായം 3 മാസവും എക്സിറ്റ് പ്രായം 25 വയസും ആണ്. ഈ പോളിസി പ്രതിവർഷം 30 ദിവസത്തെ ഗ്രേസ് പിരീഡ് ഉപയോഗിച്ച് പുതുക്കാവുന്നതാണ്. എല്ലാ പ്രായത്തിലുമുള്ളവർക്കും അഞ്ച് ശതമാനം കോ-പേയ്‌മെന്റ് ബാധകമാണ്, അതായത് ബിൽ തുകയുടെ 5 ശതമാനം നിർബന്ധമായും പോളിസി ഹോൾഡർ നൽകേണ്ടതുണ്ട്.