യുപിഐ വഴി ഓൺലൈൻ പണമിടപാട് നടത്തുന്നവർ സൂക്ഷിക്കുക, തട്ടിപ്പിൽ നിന്ന് എങ്ങനെ രക്ഷപെടാം?

ഡിജിറ്റൽ പേയ്‌മെന്റ് സംവിധാനത്തിലേക്ക് ഇന്ത്യ വളർന്നു കൊണ്ടിരിക്കുകയാണ്. സമ്പദ്‌വ്യവസ്ഥയിൽ ഡിജിറ്റൽ ഇടപാടുകൾക്ക് മുൻതൂക്കം നൽകാൻ സർക്കാരും കാര്യമായ ഇടപെടലുകൾ നടത്തുന്നുണ്ട്. ഇതിന്റെ ഭാഗമായാണ് നാഷണൽ പേയ്‌മെന്റ് കോർപ്പറേഷൻ ഓഫ് ഇന്ത്യ (എൻ‌പി‌സി‌ഐ) യൂണിഫൈഡ് പേയ്‌മെന്റ് ഇന്റർഫേസിനെക്കുറിച്ച് (യുപിഐ) ആളുകളെ അറിയിക്കാനും ബോധവാന്മാരാക്കാനും മുന്നോട്ട് വന്നിരിക്കുന്നത്.

എന്താണ് യുപിഐ?

തത്സമയ അടിസ്ഥാനത്തിൽ ഒരു ബാങ്ക് അക്കൗണ്ടിൽ നിന്ന് മറ്റൊന്നിലേക്ക് തൽക്ഷണം പണം കൈമാറാൻ യുപിഐ ഉപയോക്താക്കളെ അനുവദിക്കുന്നു. ബാങ്ക് അക്കൗണ്ട് വിശദാംശങ്ങളോ ബാങ്ക് കോഡുകളോ പോലുള്ള വിവരങ്ങൾ ഉപഭോക്താവ് പങ്കിടേണ്ടതില്ല. ഒരു ആപ്ലിക്കേഷനിൽ ഒരു വ്യക്തിക്ക് ഒന്നിലധികം ബാങ്ക് അക്കൗണ്ടുകൾ ഉപയോഗിക്കാനും കഴിയും. എൻ‌പി‌സി‌ഐ 2016 ൽ ആരംഭിച്ച യു‌പി‌ഐ ഇന്ത്യയിലെ മറ്റ് ഡിജിറ്റൽ പേയ്‌മെന്റുകളേക്കാൾ വേഗത്തിൽ വളർച്ച കൈവരിച്ചു കൊണ്ടിരിക്കുകയാണ്. യുപിഐയും മറ്റ് ഡിജിറ്റൽ പേയ്‌മെന്റുകളും / ഇടപാടുകളും നടത്തുമ്പോൾ ശ്രദ്ധിക്കേണ്ട ചില സുരക്ഷാ മാർഗ്ഗനിർദ്ദേശങ്ങൾ ഇതാ..

ഒരിയ്ക്കലും ചെയ്യരുത്

കാർഡ് നമ്പർ, കാലാവധി അവസാനിക്കുന്ന തീയതി, യുപിഐ പിൻ, ഒടിപി എന്നിവ ഉൾപ്പെടുന്ന രഹസ്യവിവരങ്ങൾ ആരുമായും പങ്കിടരുത്. നിങ്ങളുടെ ബാങ്കിൽ നിന്നോ ഏതെങ്കിലും മൂന്നാം കക്ഷി മൊബൈൽ അപ്ലിക്കേഷനിൽ നിന്നോ ഔദ്യോഗിക പ്രതിനിധിയായി നടിക്കുന്ന ആരെങ്കിലും ഇത്തരം വിശദാംശങ്ങൾ നൽകാൻ നിങ്ങളോട് ആവശ്യപ്പെടുകയാണെങ്കിൽ, നിങ്ങൾക്ക് ഒരു ഔദ്യോഗിക ഇമെയിൽ അയയ്ക്കാൻ അവരോട് പറയുക. ബാങ്ക് അല്ലെങ്കിൽ മൂന്നാം കക്ഷി ആപ്ലിക്കേഷനുകളിൽ ഇതിനകം തന്നെ നിങ്ങളുടെ ഇമെയിൽ ഐഡി ഉള്ളതിനാൽ ഒരിയ്ക്കലും നിങ്ങളുടെ ഇമെയിൽ ഐഡി അവരുമായി പങ്കുവയ്ക്കരുത്.

സ്‌പാം മുന്നറിയിപ്പ്

നിങ്ങളുടെ ബാങ്കിന്റെ ഔദ്യോഗിക ഡൊമെയ്‌നിൽ നിന്നോ മൂന്നാം കക്ഷി ആപ്ലിക്കേഷനിൽ നിന്നോ ഉള്ള ഇമെയിലുകളോട് മാത്രം പ്രതികരിക്കുക. വിവിധ പേയ്‌മെന്റുകളുമായി ബന്ധപ്പെട്ട ആപ്ലിക്കേഷനുകൾ സ്‌പാം നമ്പറുകളെക്കുറിച്ച് മുന്നറിയിപ്പ് നൽകാറുണ്ട്. നിങ്ങൾക്ക് ഒരു അജ്ഞാത അക്കൗണ്ടിൽ നിന്ന് ഒരു പേയ്‌മെന്റ് അഭ്യർത്ഥന ലഭിക്കുകയാണെങ്കിൽ, സ്‌പാം മുന്നറിയിപ്പുകൾ ശ്രദ്ധിക്കുക.

സുരക്ഷിതമായ ഇടപാടുകൾ

സംശയാസ്‌പദമായ ഏതെങ്കിലും അക്കൗണ്ടുകൾ നിങ്ങൾ കണ്ടെത്തുകയാണെങ്കിൽ, അത് നിങ്ങളുടെ ബാങ്കിൽ റിപ്പോർട്ടുചെയ്യുകയും ആ അക്കൗണ്ടിനെ സ്പാം എന്ന് അടയാളപ്പെടുത്തുകയും ചെയ്യുക. പ്രശസ്ത ഓൺലൈൻ വ്യാപാരികളിൽ നിന്നും വിപണന കേന്ദ്രങ്ങളിൽ നിന്നും എല്ലായ്പ്പോഴും ഉൽപ്പന്നങ്ങൾ വാങ്ങുക. വിശ്വസനീയമായ ഇ-കൊമേഴ്‌സ് പ്ലാറ്റ്‌ഫോമുകളിലെ ഇടപാടുകൾ നിങ്ങളുടെ പേയ്‌മെന്റുകൾ സുരക്ഷിതമാണെന്ന് ഉറപ്പാക്കും.