ക്രെഡിറ്റ് കാർഡ് തട്ടിപ്പ്: വഞ്ചനയിൽ നിന്ന് സ്വയം എങ്ങനെ സുരക്ഷിതരാകാം?

ഇന്ത്യയിൽ ക്രെഡിറ്റ് കാർഡ് ഉപഭോക്താക്കളുടെ എണ്ണം കുതിച്ചുയരുകയാണ്. അതുപോലെ തന്നെ ക്രെഡിറ്റ് കാർഡ് തട്ടിപ്പുകളും. കഴിഞ്ഞ അഞ്ച് വർഷത്തിനിടെ ക്രെഡിറ്റ് കാർഡ് ഉപഭോക്താക്കളുടെ എണ്ണം ഇരട്ടിയായെന്ന് റിസർവ് ബാങ്ക് ഓഫ് ഇന്ത്യ (ആർബിഐ) റിപ്പോർട്ട് ചെയ്യുന്നു. ക്രെഡിറ്റ് കാർഡുകളുടെ എണ്ണം 11 കോടി കടന്നു. ഇതേ കുതിച്ചുചാട്ടം തന്നെ ക്രെഡിറ്റ് കാർഡ് തട്ടിപ്പുകളുടെ എണ്ണത്തിലും കാണാം. നിരവധി ആളുകളുടെ ക്രെഡിറ്റ് കാർഡുകളിൽ നിന്നും ലക്ഷങ്ങളാണ് അടുത്തിടെ നഷ്ടമായത്. ഏറെ ശ്രദ്ധയോടെ കൈകാര്യം ചെയ്യേണ്ട ഒരു സാമ്പത്തിക ഉപകരണമാണ് ക്രെഡിറ്റ് കാർഡ്. ഇത്തരം ക്രെഡിറ്റ് കാർഡ് തട്ടിപ്പുകളിൽ നിന്ന് സ്വയം പരിരക്ഷിക്കുന്നതിന്, കാർഡ് ഉപയോക്താക്കൾ നിർബന്ധമായും അറിഞ്ഞിരിക്കേണ്ടതുമുണ്ട്. അത് എന്തൊക്കെയാണെന്ന് നോക്കാം.

വിളിക്കുന്നയാൾ ആരാണെന്ന് ഉറപ്പിക്കാം - സാധാരണഗതിയിൽ ഇത്തരം ക്രെഡിറ്റ് കാർഡ് തട്ടിപ്പുകൾ നടക്കുന്നത് ഫോൺ കോളിലൂടെ വ്യക്തിഗത വിവരങ്ങൾ തേടിയായിരിക്കും. ഇത്തരം സാഹചര്യങ്ങളിൽ നിങ്ങളെ വിളിക്കുന്ന ആൾ ആരാണെന്ന് സ്ഥിരീകരിക്കുക. ക്രെഡിറ്റ് കാർഡ് വിശദാംശങ്ങളോ സിവിവി, ഒടിപി പോലുള്ള നിർണ്ണായക വിവിരങ്ങൾക്കായി ബാങ്കുകൾ ഒരിക്കലും ഉപഭോക്താക്കളെ വ്യക്തിപരമായി സമീപിക്കാറില്ലെന്ന കാര്യം ശ്രദ്ധിയ്ക്കുക.

നിർണ്ണായക വിവരങ്ങൾ പങ്കുവെക്കാതിരിക്കുക - നിങ്ങളുടെ ക്രെഡിറ്റ് കാർഡ് വിശദാംശങ്ങൾ ആരുമായും കോളുകളിലൂടെയോ വീഡിയോ ചാറ്റുകളിലൂടെയോ വെളിപ്പെടുത്തുകയോ ചർച്ച ചെയ്യുകയോ ചെയ്യരുത്. ഇവ വായ്പ ഉപകരണങ്ങളാണ്. നിങ്ങളുടെ സ്വകാര്യ വിവരങ്ങൾ ചർച്ച ചെയ്യുകയാണെങ്കിൽ, നിങ്ങൾ സ്വയം സാമ്പത്തിക നഷ്ടത്തിന് ഇരയാകുകയാണെന്ന് ഓർക്കുക.

ഇടപാടുകൾ നിരീക്ഷിക്കുക - കൃത്യമായ ഇടവേളകളിൽ ബാങ്ക് ഇടപാടുകൾ നിരീക്ഷിക്കുകയും അവലോകനം ചെയ്യുകയും ചെയ്യുക. അപകടകരമായ, അനധികൃതമായതോ ആയ ഇടപാടുകൾ ശ്രദ്ധയിൽപ്പെട്ടാൽ ഉടനാടി ബന്ധപ്പെട്ട ബാങ്കിലും പൊലീസിലും പരാതിപ്പെടുക.

ശക്തമായ പാസ്‌വേഡുകളും ബയോമെട്രിക്സും ഉപയോഗിക്കുക - നിങ്ങളുടെ ഡാറ്റ സുരക്ഷിതമായി സൂക്ഷിക്കുന്നതിന് ശക്തമായ പാസ്‌വേഡുകൾ, ബയോമെട്രിക്സ് എന്നിവ ഉപയോഗിക്കുക. ടൂ-ഫാക്ടർ ഒഥന്റിക്കേഷൻ പോലെയുള്ള നൂതന സംവിധാനങ്ങളും സാധ്യമാണെങ്കിൽ ക്രമീകരിക്കുക.

കസ്റ്റമർ സപ്പോർട്ട് ടീമുമായി ബന്ധപ്പെട്ട് സംശയങ്ങൾ ദൂരീകരിക്കുക: സംശയങ്ങൾക്ക് വ്യക്തത ലഭിക്കുന്നതിനും ഔദ്യോഗിക കസ്റ്റമർ സപ്പോർട്ട് ടീം നമ്പർ ലഭിക്കുന്നതിനും എല്ലായ്പ്പോഴും നിങ്ങളുടെ ധനകാര്യ സ്ഥാപനത്തിന്റെ ഔദ്യോഗിക വെബ്സൈറ്റ് സന്ദർശിക്കുക. കൂടാതെ, നിങ്ങൾ ഒരിക്കലും സിവിവി, ഒടിപി, കാർഡ് വിശദാംശങ്ങൾ എന്നിവ പങ്കിടരുത്.