ഡെബിറ്റ് കാർഡും ചെക്ക് ബുക്കും ഇനി നിങ്ങളുടെ സൌകര്യത്തിന് ഏത് സമയത്തും വാങ്ങാം, ചെയ്യേണ്ടത് എന്ത്?

സ്വകാര്യ ബാങ്കായ ഐസിഐസിഐ ബാങ്ക് 'ഐബോക്സ്' എന്ന പേരിൽ ഒരു പുതിയ സേവനം ആരംഭിച്ചു. ഈ സൌകര്യം ഉപയോഗിച്ച്, ഐസി‌ഐ‌സി‌ഐ ബാങ്ക് ഉപഭോക്താക്കൾക്ക് അവരുടെ ഡെബിറ്റ് കാർഡ്, ക്രെഡിറ്റ് കാർഡ്, ചെക്ക് എന്നിവ അവരുടെ വീടിനോ ഓഫീസിനോ അടുത്തുള്ള ഒരു ശാഖയിൽ നിന്ന് തടസ്സരഹിതമായി ശേഖരിക്കാൻ കഴിയും. ഉപയോക്താക്കൾക്ക് ആവശ്യമുള്ളപ്പോൾ ബാങ്ക് സേവനം ഉപയോഗിക്കാൻ സഹായിക്കുന്നതാണ് ഐബോക്സ് എന്ന പദ്ധതി. 24 മണിക്കൂറും അവധി ദിവസങ്ങൾ ഉൾപ്പെടെ എല്ലാ ദിവസങ്ങളിലും ഉപഭോക്താക്കൾക്ക് ഈ ഡെലിവറികൾ ശേഖരിക്കാൻ കഴിയും.

നേട്ടങ്ങൾ

ഉപയോക്താക്കൾക്ക് അവരുടെ സൌകര്യത്തിനനുസരിച്ച് ദിവസത്തിലെ ഏത് സമയത്തും 24 മണിക്കൂറും ഈ സേവനം ഉപയോഗപ്പെടുത്താം. അവധിദിനങ്ങൾ ഉൾപ്പെടെ എല്ലാ ദിവസങ്ങളിലും ഉപഭോക്താക്കൾക്ക് അവർ തിരഞ്ഞെടുക്കുന്ന സമയത്ത് ഈ ഡെലിവറികൾ ശേഖരിക്കാൻ കഴിയും.

സ്റ്റാറ്റസ് പരിശോധിക്കാം

ഐബോക്സ് ടെർമിനലുകൾ ബാങ്ക് ശാഖകളുടെ പരിസരത്ത് ഒരുക്കിയിട്ടുണ്ടാകും. ഔദ്യോഗിക സമയത്തിനു ശേഷവും ഇവ പ്രവർത്തിക്കും. പൂർണ്ണമായും ഓട്ടോമേറ്റഡ് സേവനമാണിത്. അതുകൊണ്ട് തന്നെ ഉപഭോക്താവിനെ അവരുടെ പാക്കേജിന്റെ നിലവിലെ സ്ഥിതി ഓരോ ഘട്ടത്തിലും എസ്എംഎസ് വഴി അറിയിക്കും. ഡിസ്പാച്ച് മുതൽ ഡെലിവറി വരെ.

ചെയ്യേണ്ടത് എന്ത്?

പാക്കേജ് ‘ഐബോക്സ്' ടെർമിനലിൽ എത്തിക്കഴിഞ്ഞാൽ, ഉപഭോക്താവിന് ഒരു എസ്എംഎസ് അറിയിപ്പ് ലഭിക്കും. അതിൽ ‘ഐബോക്സ്'ടെർമിലലിന്റെ ജിപിഎസ് സ്ഥാനം, ഒടിപി, ക്യുആർ കോഡ് എന്നിവ അടങ്ങിയിരിക്കും. ഉപഭോക്താവ് തുടർന്ന് ‘ഐബോക്സ്' ടെർമിനൽ സന്ദർശിക്കണം. അവിടെ രജിസ്റ്റർ ചെയ്ത മൊബൈൽ നമ്പർ നൽകി ഒടിപി സമർപ്പിക്കുക. അല്ലെങ്കിൽ ബോക്സ് തുറന്ന് പാക്കേജ് ആക്സസ് ചെയ്യുന്നതിന് ക്യുആർ കോഡ് കാണിക്കുക. ഏഴ് ദിവസത്തേയ്ക്ക് പാഴ്സൽ ഐബോക്സിൽ തുടരും.

ഐബോക്സ് ടെർമിനലുകൾ

ഡൽഹി എൻ‌സി‌ആർ, മുംബൈ, ചെന്നൈ, കൊൽക്കത്ത, ബെംഗളൂരു, ഹൈദരാബാദ്, പൂനെ, നവി മുംബൈ, സൂറത്ത്, ജയ്പൂർ, ഇൻഡോർ, ഭോപ്പാൽ, ലഖ്‌നൗ, നാഗ്പൂർ, അമൃത്സർ, ലുധിയാന, പഞ്ചകുള എന്നിവിടങ്ങളിലാണ് നിലവിൽ ഐബോക്സ് ടെർമിനലുകൾ സ്ഥിതി ചെയ്യുന്നത്.