ജീവിതം മാറും; സാമ്പത്തിക സ്വാതന്ത്ര്യം ഉറപ്പാക്കാൻ ആറ് ശീലങ്ങൾ ഏതൊക്കെയെന്ന് നോക്കാം

സാമ്പത്തിക സ്വാതന്ത്ര്യം ഏതൊരാളും ആഗ്രഹിക്കുന്ന, സ്വപ്നം കാണുന്ന ജീവിത സാഹചര്യമാണ്. എന്നാൽ പലർക്കും അത് ബാലികേറ മല തന്നെ. കൃത്യമായ സാമ്പത്തിക അച്ചടക്കമാണ് സാമ്പത്തിക സ്വാതന്ത്ര്യത്തിന്റെ അടിസ്ഥാനം. നിങ്ങളുടെ സാമ്പത്തിക നിയന്ത്രണം പൂർണമായും ഏറ്റെടുക്കുന്നതുവഴിയും കടം ഒഴിവാക്കുന്നതിലൂടെയും സാമ്പത്തിക സുരക്ഷിതത്വം ഉറപ്പാക്കുന്ന സ്ഥിതിയാണ്. ആഗ്രഹമായി തുടരുമ്പോഴും ലക്ഷ്യത്തിലേക്കുള്ള പാത തെളിക്കാൻ നമ്മളിൽ പലരും നന്നായി ബുദ്ധിമുട്ടുന്നുണ്ട്. വലിയൊരു വിഭാഗം ആളുകൾക്കും ഇപ്പോഴും യാത്ര എവിടെ തുടങ്ങണമെന്ന കാര്യത്തിൽ അനിശ്ചിതത്വം നിലനിൽക്കുന്നു. എന്നാൽ താഴെ പറയുന്ന ശീലങ്ങളിലൂടെ സാമ്പത്തിക സ്വതന്ത്ര്യം കൈവരിക്കാം.

1. ലക്ഷ്യം മനസിലാക്കുക: സാമ്പത്തിക സ്വാതന്ത്ര്യം നിങ്ങൾക്ക് എന്താണ് അർത്ഥമാക്കുന്നത് എന്ന് മനസിലാക്കുക എന്നതാണ് നിങ്ങളുടെ സാമ്പത്തികം ഫലപ്രദമായി കൈകാര്യം ചെയ്യുന്നതിനുള്ള ആദ്യപടി. കടങ്ങൾ പൂർണമായും ഒഴിവാക്കിയുള്ള ജീവിതരീതി, നേരത്തെ വിരമിക്കാനുള്ള കഴിവ് അല്ലെങ്കിൽ നിങ്ങളുടെ ജോലി ഉപേക്ഷിച്ച് ഒരു ബിസിനസ് ആരംഭിക്കാൻ ധൈര്യമുണ്ടാകുന്ന അവസ്ഥയാണത്. നിങ്ങളുടെ സാമ്പത്തിക ലക്ഷ്യങ്ങൾ തിരിച്ചറിയുകയും അവ നേടുന്നതിന് വ്യക്തമായയും യാഥാർത്ഥ്യമാക്കാൻ സാധിക്കുന്നതുമായ നടപടികൾ ആസൂത്രണം ചെയ്യുക. ഇത്തരത്തിൽ നിങ്ങളുടെ ലക്ഷ്യം തിരിച്ചറിഞ്ഞു കഴിഞ്ഞാൽ അത് അടിസ്ഥാനമാക്കി നിങ്ങൾ പ്രവർത്തിച്ചു തുടങ്ങും. നിങ്ങൾ ഒരു യാഥാസ്ഥിതിക നിക്ഷേപകനാണെങ്കിൽ, നിങ്ങളുടെ പോർട്ട്‌ഫോളിയോയുടെ വലിയൊരു ഭാഗം ഫിക്സഡ് ഇൻകം ഇൻസ്ട്രുമെന്റുകളിൽ ഉൾപ്പെടുത്താം. റിസ്ക് എടുക്കാൻ സാധിക്കുന്നവരാണെങ്കിൽ ദീർഘകാലത്തേക്ക് ഇക്വിറ്റികൾ നൽകുന്ന ഉയർന്ന റിട്ടേൺ നിങ്ങൾക്ക് പ്രയോജനപ്പെടുത്താം.

2. വരവിനനുസരിച്ച് ചെലവ്: നിങ്ങൾ സമ്പാദിക്കുന്നതിനേക്കാൾ കുറച്ച് ചെലവഴിക്കുന്നത് വളരെ പ്രധാനമാണ്. എളുപ്പത്തിൽ സാമ്പത്തിക സ്വാതന്ത്ര്യത്തിലേക്ക് നയിക്കുന്ന ഘടകമാണിത്. പ്രതിമാസ ബജറ്റ് തയാറാക്കുന്നതും അതിനനുസരിച്ച് മാത്രം ചെലവുകൾ പരിമിതപ്പെടുത്തുകയും വേണം. ആവേശത്തോടെയുള്ള വാങ്ങലും അനാവശ്യ കടങ്ങളും ഒഴിവാക്കുക, നിങ്ങളുടെ വരുമാനത്തിന്റെ ഒരു ഭാഗം എത്ര ചെറുതാണെങ്കിലും ലാഭിക്കാൻ എപ്പോഴും പരിശ്രമിക്കുക. ആദ്യം ചെലവഴിക്കുകയും പിന്നീട് ലാഭിക്കുകയും ചെയ്യുന്നതിനുപകരം ആദ്യം ലാഭിക്കുകയും പിന്നീട് ചെലവഴിക്കുകയും ചെയ്യുക എന്നതാണ് വിദഗ്ധർ നിർദേശിക്കുന്നത്. ശമ്പളത്തിന്റെ 10-20 ശതമാനമെങ്കിലും ലാഭിക്കുന്നതിലൂടെ നിങ്ങൾക്ക് സാമ്പത്തിക സ്വാതന്ത്ര്യത്തിലേക്ക് ശരിയായ ചുവടുവെപ്പ് നടത്താം.

3. എമർജൻസി ഫണ്ട്: അപ്രതീക്ഷിതമായ ഒരു സാമ്പത്തിക പ്രതിസന്ധി നിങ്ങളുടെ സാമ്പത്തിക സ്വാതന്ത്ര്യത്തെ എളുപ്പത്തിൽ അപകടത്തിലാക്കും. അത്തരം സാഹചര്യങ്ങളിൽ എമർജൻസി ഫണ്ടുകൾ മികച്ച രീതിയിൽ ഉപയോഗപ്പെടുത്താൻ സാധിക്കും. എമർജൻസി ഫണ്ട് കുറഞ്ഞത് 6 മാസത്തെ ജീവിതച്ചെലവുകൾ കവർ ചെയ്യുന്നതായിരിക്കണം. എമർജൻസി ഫണ്ടുകൾ നിലനിർത്തുന്നതിന് നിങ്ങൾക്ക് സ്ഥിര നിക്ഷേപങ്ങളിലോ ലിക്വിഡ് ഫണ്ടുകളിലോ നിക്ഷേപിക്കാം.

4. ഒന്നിലധികം വരുമാന സ്രോതസുകൾ: ഒരൊറ്റ വരുമാന സ്രോതസിനെ ആശ്രയിക്കുന്നത് അപകടകരമാണ്. നിങ്ങളുടെ കഴിവും അവസരങ്ങളും പരിഗണിച്ച് ഒന്നിലധികം വരുമാന മാർഗങ്ങൾ കണ്ടെത്തുക. ഒരൊറ്റ വരുമാന സ്രോതസ് വിട്ടുവീഴ്ച ചെയ്യപ്പെടുമെന്നതിനാൽ വൈവിധ്യവൽക്കരണം സാമ്പത്തിക അരക്ഷിതാവസ്ഥയുടെ അപകടസാധ്യത കുറയ്ക്കുന്നു.

5. കടം കുറയ്ക്കുക: സാമ്പത്തിക സ്വാതന്ത്ര്യം കൈവരിക്കുന്നതിനുള്ള പ്രധാന തടസമാണ് കടം. ക്രെഡിറ്റ് കാർഡ് കടങ്ങൾ പോലെയുള്ള ഉയർന്ന പലിശയിൽ തുടങ്ങി നിങ്ങളുടെ കടങ്ങൾ വ്യവസ്ഥാപിതമായി വീട്ടി തീർക്കാൻ ആസൂത്രണം ചെയ്യുക. അവധിക്കാലത്തേക്ക് ലോണുകൾ എടുക്കുന്നതോ വിലകൂടിയ മൊബൈലോ ഫോണോ വാങ്ങുന്നതോ നിങ്ങൾ ഒഴിവാക്കണം, കാരണം അത് അമിതഭാരത്തിലേക്ക് നയിക്കുകയും നിങ്ങളെ കടക്കെണിയിൽ കുടുക്കുകയും ചെയ്യും.

6. ബുദ്ധിപൂർവമുള്ള നിക്ഷേപം: നിങ്ങളുടെ സമ്പത്ത് വർദ്ധിപ്പിക്കുന്നതിനുള്ള ഏറ്റവും ഫലപ്രദമായ മാർഗങ്ങളിലൊന്നാണ് നിക്ഷേപം. നിലവിൽ ലഭ്യമായ നിക്ഷേപ സാധ്യതകളിൽ നിന്ന് നിങ്ങൾക്ക് അനുയോജ്യമായത് കൃത്യമായ പഠനത്തിന് ശേഷം ഉറപ്പാക്കുക. ട്രെൻഡുകൾ പിന്തുടരുന്നതിനപ്പുറത്തേക്ക് നിങ്ങളുടെ സാമ്പത്തിക ലക്ഷ്യങ്ങളുമായി പൊരുത്തപ്പെടുന്നത് തിരഞ്ഞെടുക്കണം.