ആ​ഗസ്റ്റ് 15 മുതൽ ഫാസ്റ്റ് ടാ​ഗ് വാർഷിക പാസ് എത്തും: യാത്രക്കാർ ഇത് നിർബന്ധമായും കൈവശം വെക്കണോ?

രാജ്യത്തെ റോഡ് ​ഗതാ​ഗതം കൂടുതൽ സു​ഗമമാക്കുന്നതിനായി 3,000 രൂപയുടെ പുതിയ ഫാസ്റ്റ് ടാഗ് വാർഷിക പാസ് കേന്ദ്ര റോഡ് ഗതാഗത, ഹൈവേ മന്ത്രി നിതിൻ ഗഡ്കരി നേരത്തെ പ്രഖ്യാപിച്ചിരുന്നു. അത് ഈ ആ​ഗസ്റ്റ് 15നാണ് പ്രാബല്യത്തിൽ വരുന്നത്. റോ​ഡ് ​ഗതാ​ഗതം മികച്ചതാവുന്നതിന് ഒപ്പം സാമ്പത്തിക നേട്ടവും യാത്രക്കാർക്ക് ഉറപ്പാക്കാം എന്നതാണ് ഈ ഫാസ്റ്റ് ടാ​ഗ് കൊണ്ട് ലക്ഷ്യമിടുന്നത്.

ഈ ഫാസ്റ്റ് ടാ​ഗ് ആക്ടിവേറ്റ് ചെയ്ത വാർഷിക പാസുണ്ടെങ്കിൽ നാഷണൽ ഹൈവേ, നാഷണൽ എക്സ്പ്രസ് വേ എന്നീ റോഡുകളിലൂടെ യാത്ര ചെയ്യുമ്പോൾ ടോൾ പ്ലാസകളിലൂടെ സൗജന്യ യാത്ര ഉറപ്പാക്കാം. അതായത് ഒരു പാസുണ്ടെങ്കിൽ ഒരു വർഷത്തേക്കോ അല്ലെങ്കിൽ 200 യാത്രകൾക്കോ ആണ് ഈ നേട്ടം പ്രയോജനപ്പെടുന്നത്. സ്വകാര്യ വാഹനങ്ങളായ കാർ, ജീപ്പ്, വാൻ എന്നിവയ്ക്ക് ഇത് ഉപയോ​ഗപ്രദമാവും.

ഫാസ്ടാഗ് വാർഷിക പാസ് ആക്ടിവേറ്റ് ചെയ്യുന്നത് എങ്ങനെ?

വാർഷിക പാസ് ആക്ടിവേറ്റ് ചെയ്യുന്നത് എളുപ്പമാണ്. അതിന് ആദ്യം വാഹനത്തിന്റെയും അനുബന്ധ ഫാസ്റ്റ് ടാഗിന്റെയും യോഗ്യത പരിശോധിക്കണം. ശേഷം, നിങ്ങൾക്ക് രാജ്മാർ​ഗ് യാത്ര എന്ന മൊബൈൽ ആപ്ലിക്കേഷൻ അല്ലെങ്കിൽ NHAI വെബ്സൈറ്റ് വഴി 2025-26 അടിസ്ഥാന വർഷത്തേക്ക് 3,000 രൂപ പേയ്‌മെന്റ് നടത്താം. ഇതോടെ രജിസ്റ്റർ ചെയ്ത ഫാസ്റ്റ് ടാഗിൽ 2 മണിക്കൂറിനുള്ളിൽ വാർഷിക പാസ് ആക്ടിവേറ്റാവും.

ഈ വാർഷിക പാസ് നിർബന്ധമാണോ?

സത്യത്തിൽ ഈ ഫാസ്റ്റ് ടാ​ഗ് വാർഷിക പാസ് നിർബന്ധമല്ല. സ്ഥിരമായി ടോൾ പ്ലാസകൾ വഴി യാത്ര ചെയ്യുന്നവർക്ക് വലിയ തുക ടോളിൽ അടക്കേണ്ടി വരാറുണ്ട്. സ്ഥിരമായി അത്തരത്തിൽ സ്വകാര്യ വാഹനങ്ങളിൽ യാത്ര ചെയ്യുന്നവർക്ക് ഇത്തരം പാസുണ്ടെങ്കിൽ അധിക പണം നൽകാതെ രക്ഷപ്പെടാം. എന്നാൽ വർഷത്തിൽ ചുരുക്കം യാത്രകൾ നടത്തുന്നവർക്ക് ഈ പാസ് ഉപകാരപ്രദമാവില്ല. അതിനാൽ നിങ്ങളുടെ ആവശ്യകതക്ക് അനുസരിച്ച് ഇത് ഫലപ്രദമായി ഉപയോ​ഗിക്കാം.

Take a Poll

നിലവിൽ നാഷണൽ ഹൈവേ, നാഷണൽ എക്സ്പ്രസ് വേ എന്നിവിടങ്ങളിലെ പ്ലാസകളിൽ മാത്രമേ ഇത് ഉപയോ​ഗിക്കാൻ സാധിക്കുള്ളൂ. സംസ്ഥാന സർക്കാരുകളോ തദ്ദേശ സ്വയംഭരണ സ്ഥാപനങ്ങളോ നിയന്ത്രിക്കുന്ന എക്സ്പ്രസ് വേകൾ, സ്റ്റേറ്റ് ഹൈവേ മുതലായവയിലെ ടോൾ പ്ലാസകൾ, പാർക്കിംഗുകൾ മുതലായവയിൽ ഈ ഫാസ്റ്റ് ടാഗ് ഒരു സാധാരണ ഫാസ്റ്റ് ടാഗ് ആയി പ്രവർത്തിക്കും. മാത്രമല്ല ഇതിന് ചില ഫീസ് നിരക്കുകളും ബാധകമായേക്കാം.

വാർഷിക പാസിൻ്റെ കാലാവവധി

ആക്ടിവേഷൻ തീയതി മുതൽ ഒരു വർഷത്തേക്കോ അല്ലെങ്കിൽ മൊത്തം 200 യാത്രകളോ എന്ന അടിസ്ഥാനത്തിലാണ് ഈ പാസിൻ്റെ കാലാവധി തീരുമാനിക്കുന്നത്. ഈ കാലാവധി കഴിഞ്ഞാൽ അത് ഓട്ടോമാറ്റിക്കലി ഒരു സാധാരണ ഫാസ്റ്റ് ടാഗായി മാറും. വാർഷിക പാസ് ആനുകൂല്യങ്ങൾ തുടരാൻ നിങ്ങൾ വാർഷിക പാസ് വീണ്ടും ആക്ടിവേറ്റ് ചെയ്യേണ്ടി വരും.

200 യാത്രകൾ കണക്കാക്കുന്നതും വ്യത്യസ്തമായിട്ടാണ്. അതായത് പോയിന്റ് അടിസ്ഥാനമാക്കിയുള്ള ടോൾ പ്ലാസകളിൽ ഓരോ ക്രോസിംഗും ഒരു യാത്രയായും, ഒരു റൗണ്ട് ട്രിപ്പ് (അങ്ങോട്ടും ഇങ്ങോട്ടും) രണ്ട് യാത്രകളായും കണക്കാക്കുന്നു. എന്നാൽ ക്ലോസ്ഡ് ടോൾ പ്ലാസകളിൽ അങ്ങോട്ടുമിങ്ങോട്ടും ഒരുമിച്ചുള്ള യാത്രയെ ഒറ്റ യാത്രയായി കണക്കാക്കുന്നു.