അഞ്ച് വർഷം കൊണ്ട് മികച്ച റിട്ടേൺസ്; പോസ്റ്റ് ഓഫീസ് നിക്ഷേപങ്ങളെ അറിയാം

മികച്ചതും ഉറപ്പുള്ളതുമായ റിട്ടേൺസാണ് മറ്റ് നിക്ഷേപ രീതികളിൽ നിന്ന് പോസ്റ്റ് ഓഫീസ് സമ്പാദ്യ നിക്ഷേപങ്ങളെ വ്യത്യസ്തവും ജനപ്രിയവുമാക്കുന്നത്. വ്യത്യസ്ത പ്രായത്തിലും സാഹചര്യത്തിലുമുള്ള ഉപഭോക്താക്കൾക്ക് അവരുടെ വിവിധ സാമ്പത്തിക ലക്ഷ്യങ്ങൾക്കായി പ്രയോജനപ്പെടുത്താൻ സാധിക്കുന്ന നിരവധി പദ്ധതികൾ പോസ്റ്റ് ഓഫീസിൽ നിലവിലുണ്ട്. സർക്കാർ പിന്തുണയുള്ള ഇത്തരം പദ്ധതികൾ ആളുകളിൽ സമ്പാദ്യ ശീലം വളർത്തുന്നതിനും സാമ്പത്തിക അടിത്തറ കെട്ടിപ്പടുക്കുന്നതിനും ഉപകാരപ്രദമാണ്.

ഇത്തരത്തിൽ നിങ്ങളുടെ പണം സുരക്ഷിതമായി തുടരുകയും അതിൽ നിങ്ങൾക്ക് നല്ല പലിശ ലഭിക്കുകയും ചെയ്യുന്ന ഒരു നിക്ഷേപ മാർഗമാണ് നിങ്ങൾ അന്വേഷിക്കുന്നതെങ്കിൽ, അതിനും സഹായിക്കുന്ന പോസ്റ്റ് ഓഫീസ് സ്കീമുകൾ നിരവധിയാണ്. 7 ശതമാനത്തിൽ കൂടുതൽ പലിശ നൽകുന്ന 5 വർഷത്തേക്കുള്ള നിക്ഷേപ പദ്ധതികളെക്കുറിച്ചാണ് ഈ ലേഖനത്തിൽ പരാമർശിക്കുന്നത്.

പോസ്റ്റ് ഓഫീസ് സ്ഥിര നിക്ഷേപം: ബാങ്കുകളെപ്പോലെ, പോസ്റ്റ് ഓഫീസിലും വ്യത്യസ്ത കാലയളവുകളുള്ള വിവിധ സ്ഥിര നിക്ഷേപ പദ്ധതികൾ നിലവിലുണ്ട്. എന്നാൽ നിങ്ങൾക്ക് നല്ല പലിശ ലഭിക്കണമെങ്കിൽ 5 വർഷത്തേക്കെങ്കിലും പോസ്റ്റ് ഓഫീസിൽ സ്ഥിര നിക്ഷേപം നടത്തണമെന്ന് സാമ്പത്തിക വിദഗ്ധർ നിർദ്ദേശിക്കുന്നു. നിലവിൽ ഈ എഫ്ഡിക്ക് 7.5 ശതമാനം പലിശയാണ് പോസ്റ്റ് ഓഫീസ് നൽകുന്നത്.

നാഷണൽ സേവിംഗ്സ് സർട്ടിഫിക്കറ്റ്: എൻ.എസ്.സി എന്നറിയപ്പെടുന്ന ഈ സ്കീമിലും 5 വർഷത്തേക്ക് പണം നിക്ഷേപിക്കപ്പെടുന്നു. നിലവിൽ 7.7 ശതമാനം പലിശയാണ് നൽകുന്നത്. നിങ്ങൾക്ക് 1000 രൂപയിൽ നിക്ഷേപം ആരംഭിക്കാം. പരമാവധി നിക്ഷേപത്തിന് പരിധിയില്ല.

സീനിയർ സിറ്റിസൺസ് സേവിംഗ്സ് സ്കീം: ഈ പദ്ധതി മുതിർന്ന പൗരന്മാർക്ക് വേണ്ടി പ്രത്യേകം രൂപകൽപ്പന ചെയ്തിരിക്കുന്നതാണ്. ഇതിലും 5 വർഷത്തേക്കാണ് തുക നിക്ഷേപിക്കുന്നത്. നിലവിൽ ഈ പദ്ധതിയുടെ പലിശ 8.2 ശതമാനമാണ്. അത്തരമൊരു സാഹചര്യത്തിൽ മുതിർന്ന പൗരന്മാർക്ക് നല്ലൊരു തുക സമ്പാദിക്കാം. ഉറപ്പായ പ്രതിമാസ വരുമാനത്തിനും ഈ പദ്ധതി പ്രയോജനപ്പെടുത്താവുന്നതാണ്.

പോസ്റ്റ് ഓഫീസ് മന്ത്ലി സേവിംഗ്സ് സ്കീം: പോസ്റ്റ് ഓഫീസ് എംഐഎസ് എന്നറിയപ്പെടുന്ന ഈ പദ്ധതി പ്രതിമാസ വരുമാനം സൃഷ്ടിക്കാൻ ഉപഭോക്താക്കളെ സഹായിക്കുന്നു. ഇതിൽ ഒറ്റ അക്കൗണ്ടിൽ 9 ലക്ഷം രൂപ വരെയും ജോയിന്റ് അക്കൗണ്ടിൽ 15 ലക്ഷം രൂപ വരെയും നിക്ഷേപിക്കാം. 7.4 ശതമാനം നിരക്കിലാണ് നിക്ഷേപങ്ങൾക്ക് പലിശ നൽകുന്നത്. ഈ പലിശയിൽ നിന്നാണ് സമ്പാദ്യം. ജോയിന്റ് അക്കൗണ്ടിൽ 15 ലക്ഷം രൂപ നിക്ഷേപിക്കുന്നതിലൂടെ, ഈ പദ്ധതിയിൽ നിന്ന് ഓരോ മാസവും 9,250 രൂപ വരെ നേടാനാകും.