ഓൺലൈനായി ട്രെയിൻ ടിക്കറ്റ് എടുക്കാം, പൂർണ്ണ മാർഗ്ഗനിർദേശം ഇതാ, വളരെ എളുപ്പത്തിൽ തീർക്കാം

രാജ്യത്ത് ഒരു ദിവസം ട്രെയിൻ യാത്ര ചെയ്യുന്ന ആളുകളുടെ എണ്ണം എത്രയാണെന്ന് നിങ്ങൾ ആലോചിച്ചു നോക്കിയിട്ടുണ്ടോ.. ? 10 ലക്ഷമെന്നാണ് നിങ്ങളുടെ ഉത്തരമെങ്കിൽ അത് തെറ്റാണ്. ശരാശരി 23 മുതൽ 25 ദശലക്ഷം വരെയാണ് ഒരു ദിവസം ട്രെയിൻ യാത്ര നടത്തുന്നവരുടെ എണ്ണം. പഴയതിൽ നിന്നും വ്യത്യസ്ഥമായി ഇന്ത്യൻ റെയിൽവേയിൽ ഇന്ന് വിപ്ലവകരമായ പല മാറ്റങ്ങളും ഉണ്ടായിട്ടുണ്ട്. വൃത്തിയുള്ള ബോഗികൾ, മികച്ച അടിസ്ഥാന സൌകര്യങ്ങൾ, സുരക്ഷ തുടങ്ങി ആകെ മാറാൻ റെയിൽവേയ്ക്ക് സാധിച്ചു.

ഇന്ന് ട്രെയിൻ ടിക്കറ്റ് ബുക്ക് ചെയ്യുക എന്നതും എളുപ്പമാണ്. വീട്ടിൽ ഇരുന്ന് മൊബൈൽ ഫോണിലൂടെയോ കമ്പ്യൂട്ടറിലൂടെയോ ഏതാനും മിനിറ്റുകൾക്കുള്ളിൽ ടിക്കറ്റ് ബുക്ക് ചെയ്യാം. ഇന്ത്യൻ റെയിൽവേയുടെ ഔദ്യോഗിക ഓൺലൈൻ പ്ലാറ്റ്‌ഫോമായ ഐആർസിടിസി (Indian Railway Catering and Tourism Corporation)വഴിയാണ് ഭൂരിഭാഗം യാത്രക്കാരും ടിക്കറ്റ് ബുക്ക് ചെയ്യുന്നത്. ഇതുകൂടാതെ റെയിൽ‌വൺ ആപ്പിലൂടെയും ടിക്കറ്റ് ബുക്ക് ചെയ്യാം.

ഐആർസിടിസി വഴി ടിക്കറ്റ് ബുക്ക് ചെയ്യുന്നത് എങ്ങനെ?

ഘട്ടം 1 - ഔദ്യോഗിക ഐആർസിടിസി വെബ്സൈറ്റ് സന്ദർശിക്കുക അല്ലെങ്കിൽ ഐആർസിടിസി മൊബൈൽ ആപ്ലിക്കേഷൻ സന്ദർശിക്കുക. നിങ്ങൾ ഒരു പുതിയ ഉപയോക്താവാണെങ്കിൽ, ഒരു ഉപയോക്തൃനാമവും പാസ്‌വേഡും ഉപയോഗിച്ച് ഒരു സൗജന്യ അക്കൗണ്ടിനായി രജിസ്റ്റർ ചെയ്യുക.

സൗജന്യ അക്കൗണ്ട് സൃഷ്ടിക്കുന്നതിനായി ഐആർസിടിസി യുടെ ഔദ്യോഗിക വെബ്സൈറ്റിൽ പ്രവേശിച്ച് "Register" ഓപ്ഷൻ തിരഞ്ഞെടുക്കണം. യൂസർനെയിം, പാസ്‌വേഡ്, മൊബൈൽ നമ്പർ, ഇമെയിൽ ഐഡി തുടങ്ങിയ വിവരങ്ങൾ നൽകി അക്കൗണ്ട് സൃഷ്ടിക്കാം. ഒടിപി വഴി വെരിഫിക്കേഷൻ പൂർത്തിയാക്കണം.

ഘട്ടം - 2 - അക്കൗണ്ട് സൃഷ്ടിച്ചതിന് ശേഷം യൂസർനെയിം, പാസ്‌വേഡ് ഉപയോഗിച്ച് ലോഗിൻ ചെയ്യാം.

ഘട്ടം - 3 - From (പുറപ്പെടുന്ന സ്റ്റേഷൻ), To (എത്തുന്ന സ്റ്റേഷൻ), യാത്രാ തീയതി, ക്ലാസ് (SL, 3A, 2A, CC തുടങ്ങിയവ) എന്നിവ തിരഞ്ഞെടുക്കണം. തുടർന്ന് "Search" അമർത്തുക.

ഘട്ടം 4- ലഭ്യമായ ട്രെയിനുകളുടെ പട്ടിക കാണിക്കും. ആവശ്യമായ ട്രെയിൻയും ക്ലാസും തിരഞ്ഞെടുക്കുക. സീറ്റുകളുടെ ലഭ്യത (Available, RAC, WL) പരിശോധിക്കാം.

ഘട്ടം 5 - പേര്, വയസ്, ലിംഗം, ബർത്ത് പ്രിഫറൻസ് എന്നിവ നൽകണം. ആവശ്യമായാൽ സീനിയർ സിറ്റിസൺ കൺസഷൻ എന്നിവ തിരഞ്ഞെടുക്കാം.

ഘട്ടം 6 - യുപിഐ , ഡെബിറ്റ് കാർഡ്, ക്രെഡിറ്റ് കാർഡ്, നെറ്റ് ബാങ്കിംഗ് തുടങ്ങിയ മാർഗ്ഗങ്ങളിൽ ഒന്നിലൂടെ പണമടയ്ക്കാം. പേയ്മെന്റ് വിജയകരമായാൽ ഇ-ടിക്കറ്റ് ലഭിക്കും.

ഘട്ടം 7- ടിക്കറ്റ് പിഡിഎഫ് ആയി ഡൗൺലോഡ് ചെയ്യാം.

പിഎൻആർ സ്റ്റാറ്റസ് പരിശോധിക്കുന്നത് എങ്ങനെ?

ബുക്ക് ചെയ്ത ടിക്കറ്റിന്റെ നില (Confirmed, RAC, Waiting List) പരിശോധിക്കാൻ ഐആർസിടിസി വെബ്സൈറ്റ് അല്ലെങ്കിൽ ആപ്പ് ഉപയോഗിച്ച് പിഎൻആർ നമ്പർ നൽകാം. ട്രെയിൻ പുറപ്പെടുന്നതിന് മുമ്പ് സ്റ്റാറ്റസ് പരിശോധിക്കുന്നത് അനിവാര്യമാണ്.

ഓൺലൈൻ ബുക്കിംഗിന്‍റെ ഗുണങ്ങൾ

റെയിൽവേ സ്റ്റേഷനിൽ ക്യൂയിൽ നിൽക്കേണ്ടതില്ല

24 മണിക്കൂറും ബുക്ക് ചെയ്യാം

സീറ്റുകളുടെ ലഭ്യത തത്സമയം അറിയാം

പണമടയ്ക്കാൻ വിവിധ ഓപ്ഷനുകൾ ലഭ്യമാണ്

ഇ-ടിക്കറ്റ് മതി; പ്രിന്റ് ആവശ്യമില്ല

ശ്രദ്ധിക്കേണ്ട കാര്യങ്ങൾ

ഔദ്യോഗിക വെബ്സൈറ്റ്/ആപ്പ് മാത്രം ഉപയോഗിക്കുക

ഒടിപി, പാസ്‌വേഡ് എന്നിവ ആരോടും പങ്കുവെക്കരുത്

പേയ്മെന്റ് പൂർത്തിയാകുന്നത് വരെ പേജ് റിഫ്രെഷ് ചെയ്യരുത്

യാത്രയ്ക്കിടെ സാധുവായ ഐഡി കാർഡ് കരുതണം