മിനിമം ബാലൻസ് പണി തന്നോ, ഐസിഐസിഐ ബാങ്ക് അക്കൗണ്ട് ക്ലോസ് ചെയ്യാം, വിശദമായി അറിയാം

സാധാരണ ഉപഭോക്താക്കൾക്ക് ഇരുട്ടടി നൽകിക്കൊണ്ടാണ് കഴിഞ്ഞ ദിവസം ഐസിഐസിഐ ബാങ്ക് മിനിമം ബാലൻസ് തുക ഉയർത്തിയത്. നിലവിലെ ഉപഭോക്താക്കളെ മാറ്റം ബാധിക്കുകയുമില്ല. ഓഗസ്റ്റ് ഒന്നിന് ശേഷം അക്കൗണ്ട് തുറന്നവർക്ക് മാത്രമാണ് നിബന്ധന ബാധകമാവുക. എന്നാൽ ഉയർന്ന പരിപാലന ചെലവുകൾ ഒഴിവാക്കാൻ നിരവധി ഉപഭോക്താക്കൾ അവരുടെ ഐസിഐസിഐ ബാങ്ക് സേവിംഗ്സ് അക്കൗണ്ട് അവസാനിപ്പിക്കാനുള്ള ആലോചനയിലാണ്. അതുകൊണ്ടുതന്നെ എങ്ങനെയാണ് ഒരു ഐസിഐസിഐ ബാങ്ക് അക്കൗണ്ട് ക്ലോസ് ചെയ്യുക എന്നും, ക്ലോസ് ചെയ്യുന്ന സമയത്ത് എന്തെങ്കിലും ഫീ ഈടാക്കുമോ തുടങ്ങിയ കാര്യങ്ങളും പരിശോധിക്കാം.

അക്കൗണ്ട് ഓഫ്‌ലൈനായി എങ്ങനെ ക്ലോസ് ചെയ്യാം

ഘട്ടം 1: നിങ്ങളുടെ ഐസിഐസിഐ ബാങ്ക് ഹോം ബ്രാഞ്ച് സന്ദർശിക്കുക.
ഘട്ടം 2: ഐസിഐസിഐ ബാങ്ക് അക്കൗണ്ട് ക്ലോഷർ ഫോം ശേഖരിച്ച് പൂരിപ്പിക്കുക.
ഘട്ടം 3: ശേഷിക്കുന്ന ബാലൻസ് പിൻവലിച്ച് സീറോ അക്കൗണ്ട് ബാലൻസ് ഉറപ്പാക്കുക.
ഘട്ടം 4: പാസ്ബുക്ക്, ഡെബിറ്റ് കാർഡ്, ചെക്ക്ബുക്ക് എന്നിവ തിരികെ നൽകുക.
ഘട്ടം 5: ഫോം സമർപ്പിച്ച് ഒരു രസീത് നേടുക.
ഘട്ടം 6: അന്തിമ ഐസിഐസിഐ ബാങ്ക് അക്കൗണ്ട് ക്ലോഷർ സ്ഥിരീകരണത്തിനായി കാത്തിരിക്കുക.

ക്ലോസിംഗ് ചാർജുകൾ

നിങ്ങളുടെ ഐസിഐസിഐ ബാങ്ക് അക്കൗണ്ട് തുറന്ന് 30 ദിവസത്തിനുള്ളിൽ ക്ലോസ് ചെയ്താൽ, യാതൊരു നിരക്കുകളും ഈടാക്കില്ല. ഇത് പൂർണ്ണമായും സൗജന്യമാണ്. അതേസമയം അക്കൗണ്ട് തുറന്ന തീയതി മുതൽ 31 ദിവസത്തിനും 1 വർഷത്തിനും ഇടയിൽ ക്ലോസ് ചെയ്യാൻ തിരഞ്ഞെടുക്കുകയാണെങ്കിൽ 500 രൂപ അക്കൗണ്ട് ക്ലോഷർ ഫീസ് നൽകേണ്ടിവരും. ഒരു വർഷത്തിൽ കൂടുതൽ സജീവമായ അക്കൗണ്ടുകൾക്ക് ക്ലോസ് ചെയ്യുന്നതിന് യാതൊരു ഫീസും ഈടാക്കുന്നില്ല.

ആവശ്യമുള്ള രേഖകൾ

നിങ്ങളുടെ ഐസിഐസിഐ ബാങ്ക് സേവിംഗ്സ് അക്കൗണ്ട് ക്ലോസ് ചെയ്യുമ്പോൾ, കാലതാമസം ഒഴിവാക്കാൻ ഇനിപ്പറയുന്ന രേഖകൾ തയ്യാറാക്കി വയ്ക്കുക:

ഐസിഐസിഐ ബാങ്ക് അക്കൗണ്ട് ക്ലോഷർ ഫോം
തിരിച്ചറിയൽ രേഖ (ആധാർ, പാൻ കാർഡ് അല്ലെങ്കിൽ പാസ്‌പോർട്ട്)
വിലാസ തെളിവ് (യൂട്ടിലിറ്റി ബിൽ, വാടക കരാർ മുതലായവ)
ഉപയോഗിക്കാത്ത ചെക്കുകളും ഡെബിറ്റ് കാർഡും

ഇക്കാര്യങ്ങൾ ശ്രദ്ധിക്കണം

2025-ൽ ഐസിഐസിഐ ബാങ്ക് മിനിമം ബാലൻസ് വർദ്ധനയോടെ, സേവിംഗ്സ് അക്കൗണ്ട് പരിപാലിക്കുന്നത് പല ഉപഭോക്താക്കൾക്കും ചെലവേറിയതായിത്തീരും. അതിനാൽ നിങ്ങളുടെ അക്കൗണ്ട് ക്ലോസ് ചെയ്യാൻ പദ്ധതിയിടുന്നതിന് മുമ്പ് താഴേ പറയുന്ന കാര്യങ്ങൾ ശ്രദ്ധിക്കണം.

1. അക്കൗണ്ടുമായി ലിങ്ക് ചെയ്‌തിരിക്കുന്ന EMI-കൾ, SIP-കൾ, ബില്ലുകൾ തുടങ്ങിയ എല്ലാ ഓട്ടോ-ഡെബിറ്റുകളും നിർത്തുക.
2. എല്ലാ ഫണ്ടുകളും മുൻകൂട്ടി പിൻവലിക്കുകയോ കൈമാറ്റം ചെയ്യുകയോ ചെയ്യേണ്ടത് വളരെ പ്രധാനമാണ്.
3. തീർപ്പാക്കാത്ത ഏതെങ്കിലും സർവീസ് ചാർജുകൾ അടച്ചു തീർക്കാൻ ശ്രദ്ധിക്കുക.

മെട്രോ നഗരങ്ങളിൽ 50000 രൂപ

മെട്രോ, നഗരങ്ങളിലെ സേവിംഗ്സ് അക്കൗണ്ടുകളിൽ 50000 രൂപയാണ് മിനിമം ബാലൻസ്. നേരത്തെ ഇത് 10000 രൂപയായിരുന്നു. ഇതോടെ ഐസിഐസിഐ ബാങ്കിന്‍റെ മിനിമം ശരാശരി ബാലൻസ് ഇന്ത്യൻ ബാങ്കുകളിൽ ഏറ്റവും ഉയർന്ന നിരക്കായി മാറി. സാമ്പത്തിക ശേഷി കൂടുതലുള്ള ഉപയോക്താക്കളെ കൂടുതൽ ആകർഷിക്കുന്നതിനും, അത്തരം നിക്ഷേപകരിൽ ശ്രദ്ധ കേന്ദ്രീകരിക്കുന്നതിനും വേണ്ടിയാണ് ബാങ്കിന്‍റെ ഈ നീക്കം.