555 രൂപയ്ക്ക് 10 ലക്ഷത്തിന്റെ ഇൻഷുറൻസ് കവറേജ്; സാധാരണക്കാർക്ക് പോസ്റ്റ് ഓഫീസിന്റെ സംരക്ഷണം

ഇന്ത്യയിൽ ദിനംപ്രതി റോഡപകടങ്ങളുടെ എണ്ണം കൂടിവരികയാണ്. ഇത്തരത്തിൽ അപകടത്തിൽ ജീവൻ നഷ്ടപ്പെടുന്നവരുടെ എണ്ണവും ഉയരുന്നുണ്ട്. ഈ സാഹചര്യത്തിൽ ഇന്ത്യ പോസ്റ്റ് പേയ്‌മെന്റ്സ് ബാങ്ക് (IPPB) സാധാരണക്കാർക്ക് താങ്ങാനാവുന്ന പ്രീമിയത്തിൽ ഒരു അപകട ഇൻഷുറൻസ് പോളിസി പുറത്തിറക്കിയിട്ടുണ്ട്. ഹെൽത്ത് പ്ലസ്, എക്സ്പ്രസ് ഹെൽത്ത് പ്ലസ് എന്നിങ്ങനെ രണ്ടു തരത്തിലാണ് ഇന്ത്യ പോസ്റ്റ് പേയ്‌മെന്റ്സ് ബാങ്ക് അപകട ഇൻഷുറൻസ് പോളിസികൾ വാഗ്‌ദാനം ചെയ്യുന്നത്. പോളിസി കാലാവധി ഒരു വർഷമായിരിക്കും.

വ്യക്തിഗത അപകട ഇൻഷുറൻസ് പോളിസികളിൽ ആർക്കൊക്കെ ചേരാം?

18 നും 65 നും ഇടയിൽ പ്രായമുള്ള വ്യക്തികൾക്ക് ഹെൽത്ത് പ്ലസ്, എക്സ്പ്രസ് ഹെൽത്ത് പ്ലസ് വ്യക്തിഗത അപകട ഇൻഷുറൻസ് പോളിസികളിൽ ചേരാം.

ഹെൽത്ത് പ്ലസ് ഓപ്ഷൻ 1 സവിശേഷതകൾ, ആനുകൂല്യങ്ങൾ

ഹെൽത്ത് പ്ലസ് ഓപ്ഷൻ 1 ന്റെ ഇൻഷുറൻസ് തുക 5 ലക്ഷം രൂപയായിരിക്കും. അപകട മരണമോ, സ്ഥിരമായ അംഗവൈകല്യങ്ങളോ ഉണ്ടായാൽ ഇൻഷ്വർ ചെയ്തയാളുടെ കുടുംബത്തിന് ഇൻഷുറൻസ് തുകയുടെ 100% ലഭിക്കും. മക്കളുടെ വിവാഹത്തിന് 50,000 രൂപ വരെ കവറേജ് ലഭിക്കും. ഈ പോളിസിക്ക് കീഴിൽ, എല്ലുകൾ ഒടിഞ്ഞതിന് 25,000 രൂപ കവറേജ് കിട്ടും. ഹെൽത്ത് പ്ലസ് ഓപ്ഷൻ 1 ന്റെ വാർഷിക പ്രീമിയം നികുതി ഉൾപ്പെടെ 355 രൂപയാണ്.

ഹെൽത്ത് പ്ലസ് ഓപ്ഷൻ 2 സവിശേഷതകൾ, ആനുകൂല്യങ്ങൾ

ഹെൽത്ത് പ്ലസ് ഓപ്ഷൻ 2 വിലെ ഇൻഷുറൻസ് തുക 10 ലക്ഷം രൂപയായിരിക്കും. അപകട മരണമോ, സ്ഥിരമായതോ ആയ വൈകല്യങ്ങളോ ഉണ്ടായാൽ ഇൻഷ്വർ ചെയ്ത വ്യക്തിയുടെ കുടുംബത്തിന് ഇൻഷുറൻസ് തുകയുടെ 100% ലഭിക്കും. എല്ലുകൾ ഒടിഞ്ഞതിന് 25,000 രൂപ കവറേജ് കിട്ടും. ഒരു ലക്ഷം രൂപ വരെ ആക്‌സിഡന്റൽ മെഡിക്കൽ റീഇംബേഴ്‌സ്‌മെന്റ് ലഭിക്കും. അന്ത്യകർമ്മങ്ങൾക്കായി 5,000 രൂപയും കോമ അവസ്ഥകൾക്ക് പ്രതിവാര ആനുകൂല്യവും നൽകുന്നു. കുട്ടികളുടെ വിദ്യാഭ്യാസത്തിന് ഈ സ്കീമിൽ 50,000 രൂപ വരെ ലഭിക്കും. ഹെൽത്ത് പ്ലസ് ഓപ്ഷൻ 2 ന്റെ വാർഷിക പ്രീമിയം നികുതി ഉൾപ്പെടെ 555 രൂപയാണ്.

ഹെൽത്ത് പ്ലസ് ഓപ്ഷൻ 3 സവിശേഷതകൾ, ആനുകൂല്യങ്ങൾ

ഹെൽത്ത് പ്ലസ് ഓപ്ഷൻ 3 യുടെ ഇൻഷുറൻസ് തുക 15 ലക്ഷം രൂപയായിരിക്കും. അപകട മരണമോ, സ്ഥിരമായതോ ആയ വൈകല്യങ്ങളോ ഉണ്ടായാൽ ഇൻഷ്വർ ചെയ്ത വ്യക്തിയുടെ കുടുംബത്തിന് ഇൻഷുറൻസ് തുകയുടെ 100% ലഭിക്കും. ഒരു കുട്ടിയുടെ വിവാഹത്തിന് ഒരു ലക്ഷം രൂപ വരെ കവറേജ് ലഭിക്കും. എല്ലുകൾ ഒടിഞ്ഞതിന് 25,000 രൂപ ലഭിക്കും. മറ്റ് എല്ലാ ആനുകൂല്യങ്ങളും ഹെൽത്ത് പ്ലസ് ഓപ്ഷൻ 2 ന് തുല്യമായിരിക്കും. ഹെൽത്ത് പ്ലസ് ഓപ്ഷൻ 3 ന്റെ വാർഷിക പ്രീമിയം നികുതി ഉൾപ്പെടെ 755 രൂപയായിരിക്കും.

എക്സ്പ്രസ് ഹെൽത്തിന് കീഴിൽ, ടെലി കൺസൾട്ടേഷനുകൾ, വാർഷിക ആരോഗ്യ പരിശോധനകൾ, മറ്റ് ആനുകൂല്യങ്ങൾ എന്നിവയും ലഭിക്കും. ഹെൽത്ത് പ്ലസ് ഓപ്ഷന്റെ മറ്റ് എല്ലാ ആനുകൂല്യങ്ങളും ലഭിക്കും. സാധാരണക്കാർക്കും ഇൻഷുറൻസ് കവറേജ് ഉറപ്പാക്കുന്ന പദ്ധതി സാമ്പത്തിക ഭദ്രതയുടെ ആവരണമാണ് സൃഷ്ടിക്കുന്നത്. അതുവഴി എല്ലാവർക്കും ഏത് അടിയന്തര ഘട്ടത്തിലും സാമ്പത്തിക ഭദ്രതയെന്ന ആശയത്തോടും പോസ്റ്റ് ഓഫീസ് ഒരിക്കൽകൂടി നീതി പുലർത്തുന്നു.