ഓണ്‍ലൈന്‍ റെയില്‍വേ ടിക്കറ്റ് ബുക്കിംഗില്‍ ഐആര്‍സിടിസിയുടെ പുതിയ മാറ്റങ്ങള്‍

ഐആര്‍സിടിസിയില്‍ ഓണ്‍ലൈനായി ബുക്ക് ചെയ്ത ട്രെയിന്‍ ടിക്കറ്റ് റദ്ദ് ചെയ്താല്‍ റീഫണ്ടിനായി രണ്ടോ മൂന്നോ ദിവസം കാത്തിരിക്കേണ്ടി വരുന്നത് ഇനി പഴങ്കഥ. പുറത്തു വരുന്ന റിപ്പോര്‍ട്ടുകള്‍ പ്രകാരം ഇനി ഐആര്‍സിടിസിയുടെ പേയ്‌മെന്റ് ഗേറ്റ് വേയായ ഐആര്‍സിടിസി ഐപേ വഴി ട്രെയിന്‍ ടിക്കറ്റ് ബുക്ക് ചെയ്യുന്ന യാത്രക്കാര്‍ക്ക് ടിക്കറ്റ് റദ്ദ് ചെയ്ത ഉടനേ തന്നെ റീഫണ്ട് തുക ലഭിക്കും.

 

2019ല്‍ കേന്ദ്ര സര്‍ക്കാറിന്റെ ഡിജിറ്റല്‍ ഇന്ത്യ ക്യാംപയിന്റെ ഭാഗമായാണ് ഐആര്‍സിടിസി ഐ പേ അവതരിപ്പിക്കപ്പെടുന്നത്. ടിക്കറ്റ് റദ്ദ് ചെയ്യുന്നതിന് പുറമേ യാത്രക്കാര്‍ക്ക് തത്ക്കാല്‍ ടിക്കറ്റുകളും, റെഗുലര്‍ ടിക്കറ്റുകളും ബുക്ക് ചെയ്യുവാനും സാധിക്കും.

യാത്രക്കാരുടെ എണ്ണം വലിയ തോതില്‍ ഉയര്‍ന്നു വരുന്ന സാഹചര്യത്തില്‍ ഐആര്‍സിടിസി ഐപേ സംവിധാനത്തോടൊപ്പം ഐആര്‍സിടിസി തങ്ങളുടെ യൂസര്‍ ഇന്റര്‍ഫേസും മെച്ചപ്പെടുത്തിക്കൊണ്ടിരിക്കുകയാണ്. അതിനാല്‍ ടിക്കറ്റ് ബുക്ക് ചെയ്യാനെടുക്കുന്ന സമയത്തിലും കുറവുണ്ടായിട്ടുണ്ട് .

ഐആര്‍സിടിസി ഐപേയിലൂടെ എങ്ങനെയാണ് ട്രെയിന്‍ ടിക്കറ്റുകള്‍ ബുക്ക് ചെയ്യാന്‍ സാധിക്കുക എന്ന് നോക്കാം.

www.irctc.co.in എന്ന ഐആര്‍സിടിസി വെബ്‌സൈറ്റ് തുറക്കുക. യാത്ര സംബന്ധിച്ച വിവരങ്ങള്‍ നല്‍കുക. നിങ്ങളുടെ സഞ്ചാര മാര്‍ഗത്തിനനുസൃതമായി ട്രെയിന്‍ തെരഞ്ഞെടുക്കുക. നിങ്ങളുടെ ലോഗ് ഇന്‍ ക്രെഡന്‍ഷ്യലുകള്‍ ഉപയോഗിച്ച് വെബ്‌സൈറ്റിലേക്ക് ലോഗ് ഇന്‍ ചെയ്യുക. യാത്രക്കാരുടെ വിവരങ്ങള്‍ നല്‍കുക
അടുത്തതായി പണം അടയ്ക്കുവാനുള്ള രീതി തെരഞ്ഞെടുക്കുക. ഇവിടെ യാത്രക്കാരന്‍ ഐആര്‍സിടിസി ഐപേ ഓപ്ഷന്‍ തെരഞ്ഞെടുക്കണം. പേ ആന്റ് ബുക്ക് എന്നതില്‍ ക്ലിക്ക് ചെയ്യുക.

നിങ്ങളുടെ ട്രെയിന്‍ ടിക്കറ്റ് ഐആര്‍സിടിസി ഐപേ സംവിധാനം ഉപയോഗിച്ച് ബുക്ക് ചെയ്തു കഴിഞ്ഞു.