സ്വര്‍ണ്ണ വില താഴേക്ക്; സ്വര്‍ണം വാങ്ങാനുള്ള സമയം ഇതാണോ? നിങ്ങള്‍ അറിയേണ്ട കാര്യങ്ങള്‍ ഇവയാണ്

ഓഹരി വിപണികളും സ്വര്‍ണവും തമ്മില്‍ വിപരീത ബന്ധമാണെന്നാണ് പൊതുവെ പറയാറുള്ളത്. ഓഹരി വിപണി താഴേക്ക് വരുമ്പോള്‍ സാധാരണയായി സ്വര്‍ണ വില ഉയരാറാണ് പതിവ്. എന്നാല്‍ ഇത്തരമൊരു ട്രെന്‍ഡിന് ഈയിടെയായി മാറ്റമുണ്ട്. റെക്കോര്‍ഡ് ഉയരത്തില്‍ നിന്നുമാണ് സ്വര്‍ണ വില പെട്ടെന്ന് താഴേക്ക് വന്നത്. ഇന്നത്തെ സ്വര്‍ണ വില പ്രകാരം പവന് 800 രൂപ കുറഞ്ഞ് 29,800 രൂപയിലെത്തി. ഗ്രാമിന് 3725 രൂപയാണ് നിരക്ക്. രണ്ട് മാസത്തിനിടയിലെ ഏറ്റവും കുറഞ്ഞ വിലയിലാണ് ഇന്നത്തെ വ്യാപാരം. കഴിഞ്ഞ ആഴ്ച മുതലാണ് സ്വര്‍ണ വില കുത്തനെ താഴേക്ക് വന്നത്. വിവാഹ ആവശ്യങ്ങള്‍ക്കായി സ്വര്‍ണം വാങ്ങാന്‍ കാത്തിരിക്കുന്നവരെ സംബന്ധിച്ചിടത്തോളം ഏറെ ആശ്വാസകരമായ വാര്‍ത്തയാണ് ഇത്. കാരണം കഴിഞ്ഞ ഏതാനും മാസങ്ങളായി സ്വര്‍ണ വില മുകളിലേക്ക് ഉയര്‍ന്നിരുന്നു. 2020 മാര്‍ച്ച് 9 മുതല്‍ ആഗോള വിപണിയില്‍ സ്വര്‍ണ വില താഴേക്ക് വന്നു. അടുത്തിടെയുണ്ടായ നിരക്ക് വര്‍ധനവുമായി താരതമ്യം ചെയ്യുമ്പോള്‍ തുടര്‍ച്ചയായ മൂന്ന് സെഷനുകളിലും സ്വര്‍ണ വ്യാപാരം നഷ്ടത്തിലാണ്.

ഇന്ത്യയിലെ സ്വര്‍ണ നിരക്ക്

രാജ്യത്തെ സ്വര്‍ണ വില റെക്കോര്‍ഡ് നേട്ടം കൈവരിച്ച മാസങ്ങളാണ് കടന്നു പോയത്. 10 ഗ്രാം സ്വര്‍ണത്തിന് 45,000 രൂപ വരെയെത്തി. മാത്രമല്ല മൂന്ന് ദിവസത്തെ നഷ്ടത്തിന് ശേഷം 43,650 രൂപയ്ക്കാണ് 10 ഗ്രാം സ്വര്‍ണ വ്യാപാരം നടന്നത്. അതിനാല്‍ തന്നെ ഒരു സമ്പാദ്യം എന്ന നിലയ്ക്ക് വലിയ തോതില്‍ സ്വര്‍ണം വാങ്ങിക്കൂട്ടണമോയെന്ന കാര്യം സംശയകരമാണ്.

ദീര്‍ഘകാല കാലാവധിയില്‍ സ്വര്‍ണം വാങ്ങുക

സ്വര്‍ണ വില ചാഞ്ചാടിക്കൊണ്ടിരിക്കുന്ന സാഹചര്യത്തില്‍ ദീര്‍ഘ കാലത്തേക്ക് നിക്ഷേപം നടത്താനാണ് വിദഗ്ധര്‍ പറയുന്നത്. കാരണം സാമ്പത്തിക, സാമൂഹിക-രാഷ്ട്രീയ തലത്തില്‍ നിലവിലെ പ്രതിസന്ധി കണക്കിലെടുക്കുമ്പോള്‍ ഭാവിയില്‍ ഒരു നേട്ടമുണ്ടാകുമെന്നാണ് കണക്കുകൂട്ടല്‍. ഉയര്‍ന്ന വിലയും സ്വര്‍ണത്തിന്റെ ആവശ്യകതയും കണക്കിലെടുക്കുമ്പോള്‍ നിക്ഷേപ മേഖലയില്‍ ഇപ്പോള്‍ മാന്ദ്യമാണ് അനുഭവപ്പെടുന്നത്. അതേസമയം സ്വര്‍ണത്തിന്റെ ഇടിഎഫുകള്‍ കണക്കിലെടുക്കുമ്പോള്‍ ആവശ്യക്കാരുണ്ടെന്നതാണ് വസ്തുത. ഫെബ്രുവരി മാസത്തെ നെറ്റ് ഇന്‍ഫ്‌ളോ 1483 കോടി രൂപയാണ്. തൊട്ടുമുന്‍പത്തെ മാസം ഇത് 202 കോടി രൂപയായിരുന്നു. അതേസമയം ആഗോളതലത്തിലെ ഓഹരി വിപണിയില്‍ സ്വര്‍ണം വിശ്വസിക്കാവുന്ന ആസ്തിയായി കരുതുന്നില്ലെന്നും റിപ്പോര്‍ട്ടുകള്‍ പറയുന്നു.