ആഡ്-ഓൺ ക്രെഡിറ്റ് കാർഡ് ഉണ്ടോ? ഉപയോഗത്തിൽ ശ്രദ്ധ വേണം, ഇല്ലെങ്കിൽ പണിയാണ്

ക്രെഡിറ്റ് കാർഡ് ഉപയോഗിക്കാത്ത മലയാളികൾ പുതിയകാലത്ത് വളരെ കുറവാണ്. അത്യാവശ്യസമയത്ത് പണം കടം തരുന്ന കൂട്ടുകാരനാണ് ക്രെഡിറ്റ് കാർഡുകളെന്ന് വേണമെങ്കിൽ തമാശരൂപേണ പറയാനും സാധിക്കും. എന്നാൽ ആഡ്-ഓൺ ക്രെഡിറ്റ് കാർഡ് സൗകര്യം എത്ര പേർ ഉപയോഗിക്കുന്നുണ്ട് എന്നതാണ് മറ്റൊരു പ്രധാനപ്പെട്ട കാര്യം. കടം കൊടുക്കുന്നയാൾ ക്രെഡിറ്റ് കാർഡ് ഉടമയ്ക്ക് നൽകുന്ന അധിക ക്രെഡിറ്റ് കാർഡുകളാണ് ആഡ്-ഓൺ ക്രെഡിറ്റ് കാർഡുകൾ. അവ സെക്കണ്ടറി അല്ലെങ്കിൽ സപ്ലിമെന്ററി ക്രെഡിറ്റ് കാർഡിന്റെ ഒരു രൂപമാണ്. അതുകൊണ്ടുതന്നെ ആഡ്-ഓൺ ക്രെഡിറ്റ് കാർഡുകളെ കുറിച്ച് വിശദമായി അറിയാം.

ആഡ്-ഓൺ ക്രെഡിറ്റ് കാർഡുകൾ

ഒരു വ്യക്തിയുടെ ക്രെഡിറ്റ് റെക്കോർഡ് മികച്ചതാണെങ്കിൽ, മിക്ക ബാങ്കുകളും അധിക സവിശേഷതകളും, ഉയർന്ന ക്രെഡിറ്റ് ലിമിറ്റുമുള്ള ആഡ്-ഓൺ ക്രെഡിറ്റ് കാർഡുകൾ വാഗ്ദാനം ചെയ്യാറുണ്ട്. ഉപഭോക്താക്കളുടെ പങ്കാളികൾക്കും, കുട്ടികൾക്കും, മാതാപിതാക്കൾക്കും, സഹോദരങ്ങൾക്കും ഈ കാർഡുകൾ ഉപയോഗിക്കാം.

ക്രെഡിറ്റ് കാർഡ് പരിധി

ആഡ്-ഓൺ കാർഡിലെ ക്രെഡിറ്റ് പരിധി പൊതുവെ പ്രാഥമിക ക്രെഡിറ്റ് കാർഡിലേതിന് തുല്യമാണ്. ചില സാഹചര്യങ്ങളിൽ, ആഡ്-ഓൺ കാർഡുകളിലെ ക്രെഡിറ്റ് പരിധി പ്രാഥമിക കാർഡിനേക്കാൾ കുറവാണ്. കുടുംബാം​ഗങ്ങൾക്ക് നിങ്ങളോട് പണം, കാർഡ് എന്നിവ ആവശ്യപ്പെടാതെ ആഡ് ഓൺ ക്രെഡിറ്റ് കാർഡുകളിലൂടെ ചിലവുകൾ നടത്താൻ‍ സാധിക്കുന്നു. കുടുംബാം​ഗങ്ങളുടെ ഉത്തരവാദിത്തത്തോടെയുള്ള ചിലവാക്കലുകൾ ഉറപ്പാക്കാനും ഈ കാർഡുകൾ സഹായിക്കുന്നു.

എന്തൊക്കെയാണ് ചാർജുകൾ?

ആഡ്-ഓൺ ക്രെഡിറ്റ് കാർഡുകളിലെ നിരക്കുകൾ ബാങ്കിനെ ആശ്രയിച്ചാണ്. ഇത് സാധാരണയായി 125 രൂപയ്ക്കും 1000 രൂപയ്ക്കും ഇടയിലാണ്. അധിക ക്രെഡിറ്റ് കാർഡിന് വേണ്ടി വരുന്ന എല്ലാ ചെലവുകളും പ്രാഥമിക ക്രെഡിറ്റ് കാർഡ് ഉടമയാണ് നൽകേണ്ടത്. വലിയ തോതിൽ ചിലവഴിക്കൽ നടത്തുന്നവർക്ക് ചില ബാങ്കുകൾ സൗജന്യമായും ആഡ് ഓൺ കാർഡുകൾ അനുവദിക്കാറുണ്ട്.

എങ്ങനെ ലഭിക്കും...?

ഒരു ക്രെഡിറ്റ് കാർഡിനായി അപേക്ഷിക്കുമ്പോൾ വരുമാനവും, ക്രെഡിറ്റ് സ്കോറും ഉൾപ്പടെ ക്രെഡിറ്റ് യോഗ്യത തെളിയിക്കുന്നതിന് നിരവധി രേഖകളും തെളിവുകളും നൽകണം. ആഡ്-ഓൺ ക്രെഡിറ്റ് കാർഡുകൾ സെക്കന്റെറി കാർഡുകളായതിനാൽ ഈ പ്രശ്നം വരുന്നില്ല. എന്തെന്നാൽ, മുമ്പ് ക്രെഡിറ്റ് കാർഡുകൾ എടുത്തിട്ടുണ്ടെങ്കിൽ ബാങ്കുകളുടെ പക്കൽ ഇതിനകം തന്നെ ഉപഭോക്താക്കളുടെ ക്രെഡിറ്റ് വിവരങ്ങൾ ഉണ്ടായിരിക്കും. പ്രൈമറി ക്രെഡിറ്റ് കാർഡുകൾക്ക് ആഡ്-ഓൺ ആയി ക്രെഡിറ്റ് കാർഡുകൾ ലഭിക്കുമെങ്കിലും, ആഡ്-ഓൺ കാർഡുകൾ വഴി നടത്തുന്ന എല്ലാ ഇടപാടുകളുടേയും ഉത്തരവാദിത്തവും, ബില്ലും ആദ്യത്തെ കാർഡിന്റെ ഉടമയുടെ അക്കൗണ്ടിലേക്ക് ചേർക്കപ്പെടും.

ആഡ്-ഓൺ ക്രെഡിറ്റ് കാർഡുകളുടെ എണ്ണം സാധാരണയായി മൂന്നിനും അഞ്ചിനും ഇടയിലാണ്. ആഡ്-ഓൺ ക്രെഡിറ്റ് കാർഡുകളിലേക്ക് അപേക്ഷിക്കുന്നതിന് ഓരോ ബാങ്കിനും പ്രത്യേക പ്രക്രിയയുണ്ട്. കൂടുതൽ വിശദാംശങ്ങൾ ലഭിക്കുന്നതിന് നിങ്ങൾക്ക് ഔദ്യോഗിക വെബ്സൈറ്റുകൾ പരിശോധിക്കാവുന്നതാണ്.

​പ്രവർത്തിക്കുന്നതെങ്ങനെ?

ക്രെഡിറ്റ് കാർഡുകളിലെ തിരിച്ചടവ് ചരിത്രം പരിശോധിച്ചാണ് ആഡ് ഓൺ ക്രെഡിറ്റ് കാർഡുകൾ അനുവദിക്കുന്നത്. പ്രൈമറി കാർഡ് ഉപയോ​ഗിക്കുന്നവർക്ക് തങ്ങളുടെ കാർഡുകളുമായി ലിങ്ക് ചെയ്തിരിക്കുന്ന ആഡ് ഓൺ കാർഡുകളുടെ ഉപയോ​ഗം ട്രാക്ക് ചെയ്യാൻ സാധിക്കും.

ക്രെഡിറ്റ് കാർഡ് ഉപയോഗത്തെ പോലെ തന്നെ ആഡ്-ഓൺ ക്രെഡിറ്റ് കാർഡ് ഉപയോഗത്തിലും കൃത്യമായ ശ്രദ്ധ പുലർത്തണം. കാരണം ക്രെഡിറ്റ് കാർഡിലെ ആകെ പരിധിയുടെ എത്ര ശതമാനം ഉപയോ​ഗിച്ചു എന്ന ക്രെഡിറ്റ് യൂട്ടിലൈസേഷൻ അനുപാതം ക്രെഡിറ്റ് സ്കോറിനെ ബാധിക്കുന്നു. ഇവിടെ ആഡ് ഓൺ ക്രെഡിറ്റ് കാർഡുകളുടെ ഉപയോ​ഗം ഉയർന്നു നിന്നാൽ ക്രെഡിറ്റ് സ്കോറിനെ അത് ദോഷകരമായി ബാധിക്കും.