ക്രെഡിറ്റ് കാർഡ് കടം ഉയരുന്നത് ഒഴിവാക്കണോ? റൂൾ ഓഫ് 72 അറിഞ്ഞിരിക്കാം

ക്രെഡിറ്റ് കാർഡുകളുടെ ഉപയോഗം ഇന്ന് വ്യാപകമായി മാറിയിട്ടുണ്ട്. വളരെ എളുപ്പത്തിൽ ഇടപാടുകൾ നടത്താനാകും എന്നതിനാൽ ക്രെഡിറ്റ് കാർഡുകളോടുള്ള പ്രിയം പലർക്കും കൂടിയിട്ടുണ്ട്. ഒന്നിലധികം ക്രെഡിറ്റ് കാർഡുകൾ ഉപയോഗിക്കുന്നവരും നിരവധിയാണ്. എന്നാൽ, ക്രെഡിറ്റ് കാർഡ് ഉപയോഗിക്കുന്നതിനൊപ്പം ക്രെഡിറ്റ് കാർഡ് കടം ഉയരുന്നതിലും ശ്രദ്ധ വേണം. ക്രെഡിറ്റ് കാർഡ് കടം ഉയരുന്നത് ഒഴിവാക്കാൻ നിങ്ങൾ അറിഞ്ഞിരിക്കേണ്ട ചില കാര്യങ്ങളുണ്ട്.

ഇങ്ങനെ ക്രെഡിറ്റ് കാർഡ് കടത്തെക്കുറിച്ച് മനസിലാക്കാൻ 72 റൂൾ നിങ്ങളെ സഹായിക്കും. നിങ്ങളുടെ ക്രെഡിറ്റ് കാർഡ് കടം യഥാർത്ഥ കടത്തിന്റെ 100 ശതമാനം വർധിക്കാൻ കഴിയുന്ന കാലയളവ് ഇതിലൂടെ മനസിലാക്കാൻ സാധിക്കും. ഉദാഹരണത്തിന്, ബാങ്ക് ഈടാക്കുന്ന 2 ശതമാനം പ്രതിമാസ പലിശയുടെ അടിസ്ഥാനത്തിൽ ക്രെഡിറ്റ് കാർഡിന്റെ APR (വാർഷിക ശതമാനം നിരക്ക്) 24 ശതമാനമാണെങ്കിൽ. ക്രെഡിറ്റ് കാർഡ് ബാധ്യത ഇരട്ടിയാക്കാൻ എടുക്കുന്ന വർഷം 72-ലെ നിയമം അനുസരിച്ച് 72/24 = 3 (വർഷം) ആയിരിക്കും. മറ്റൊരു വിധത്തിൽ പറഞ്ഞാൽ, ക്രെഡിറ്റ് കാർഡ് കടം ഇരട്ടിയാകാൻ മൂന്ന് വർഷമെടുക്കും.

വർധിച്ചുവരുന്ന ക്രെഡിറ്റ് കാർഡ് കടത്തെക്കുറിച്ച് നിങ്ങൾക്കും ആശങ്കയുണ്ടെങ്കിൽ, ക്രമേണ കുറയ്ക്കാൻ ആഗ്രഹിക്കുന്നുവെങ്കിൽ, ഇനി പറയുന്ന നടപടികൾ സ്വീകരിക്കാവുന്നതാണ്.

1. മിനിമം കുടിശ്ശിക അടയ്ക്കുന്നത് ഒഴിവാക്കുക: മിനിമം കുടിശ്ശിക അടയ്ക്കുമ്പോൾ, പലിശ നിരക്ക് കൂടിച്ചേരുകയും അതുവഴി നിങ്ങളുടെ കടബാധ്യത വർധിക്കുകയും ചെയ്യും.

2. ഉയർന്ന പ്രോസസിംഗ് ഫീസ്: ഉയർന്ന പ്രോസസിംഗ് ഫീസ് ഉള്ള നിരവധി ക്രെഡിറ്റ് കാർഡുകൾ നിങ്ങളുടെ പക്കലുണ്ടെങ്കിൽ, വാല്യൂ അഡീഷൻ നൽകാത്തവ റദ്ദാക്കുക.

3. തവണകളായി തിരിച്ചടയ്ക്കുക: ക്രെഡിറ്റ് കാർഡ് കടം ഒറ്റയടിക്ക് വീട്ടാൻ പണമില്ലെങ്കിൽ, ഗഡുക്കളായി വായ്പ തിരിച്ചടയ്ക്കാം.

4. റിവാർഡുകളും ക്യാഷ്ബാക്കുകളും: കാർഡ് ഉപയോഗിക്കുമ്പോൾ ക്യാഷ്ബാക്കുകളും റിവാർഡുകളും പ്രയോജനപ്പെടുത്തുക, അതുവഴി മൊത്തത്തിലുള്ള ക്രെഡിറ്റ് കാർഡ് കടബാധ്യത കുറയ്ക്കാം.

5. അനാവശ്യ ചെലവുകൾ ഒഴിവാക്കുക: അനാവശ്യ ചെലവുകൾ ഒഴിവാക്കുക. പണം ഉടനടി പോക്കറ്റിൽ നിന്ന് പോകുന്നില്ലെന്നു കരുതി, ചില ഉപയോക്താക്കൾ ക്രെഡിറ്റ് കാർഡുകൾ വഴി അമിതമായി ചെലവഴിക്കുന്നു.

6. കാർഡ് ഉപയോഗത്തിൽ നിയന്ത്രണം: നിങ്ങളുടെ ക്രെഡിറ്റ് കാർഡ് ഉപയോഗം നിരീക്ഷിക്കാൻ സഹായിക്കുന്ന നിരവധി മൊബൈൽ ആപ്ലിക്കേഷനുകൾ ഉണ്ട്. മൊത്തത്തിലുള്ള കാർഡ് കടം ഒരു ചെറിയ പരിധിക്കുള്ളിൽ നിലനിർത്താൻ ചെലവുകൾ പതിവായി നിരീക്ഷിക്കണം.