ക്രെഡിറ്റ് കാർഡ് തട്ടിപ്പ്: ഈ നിയമപരമായ അവകാശങ്ങളെക്കുറിച്ച് അറിഞ്ഞിരിക്കാം

ക്രെഡിറ്റ് കാർഡുമായി ബന്ധപ്പെട്ട തട്ടിപ്പുകൾ രാജ്യത്ത് വർദ്ധിച്ചുവരികയാണ്. ഭൂരിഭാഗം തട്ടിപ്പുകളും ഇന്റർനെറ്റ് ഇടപാടുകൾ വഴിയാണ് സംഭവിക്കുന്നത്. ഇടപാടുകളുടെ ഡിജിറ്റലൈസേഷൻ തട്ടിപ്പുകൾ കൂടുന്നതിനുള്ള ഒരു ഘടകമായി മാറിയിട്ടുണ്ട്. ഇത്തരം തട്ടിപ്പുകൾ മൂലമുണ്ടാകുന്ന നഷ്ടത്തിൽ നിന്ന് ഇന്ത്യൻ പൗരന്മാരെ സംരക്ഷിക്കുന്നതിന് ചില നിയമപരമായ അവകാശങ്ങളുണ്ട്. എല്ലാ ക്രെഡിറ്റ് കാർഡ് ഉപയോക്താക്കളും ഈ നിയമവശങ്ങളെക്കുറിച്ച് ബോധവാന്മാരായിരിക്കണം.

ക്രെഡിറ്റ് കാർഡുകളിലെ സ്വകാര്യതയും സംരക്ഷണവും

സ്വകാര്യതയ്ക്കുള്ള അവകാശമാണ് അതിൽ ആദ്യത്തേത്. ബാങ്കുകളും ബാങ്കിംഗ് ഇതര ധനകാര്യ കമ്പനികളും (NBFC-കൾ) ഉപഭോക്താവ് ആവശ്യപ്പെടാതെ ക്രെഡിറ്റ് കാർഡുകൾ നൽകരുതെന്ന് റിസർവ് ബാങ്ക് ഓഫ് ഇന്ത്യ (RBI) ആവശ്യപ്പെടുന്നു. അതായത്, ഉപഭോക്താവിന്റെ വ്യക്തമായ സമ്മതമില്ലാതെ ക്രെഡിറ്റ് കാർഡുകൾ നൽകാൻ പാടില്ല. ഉപഭോക്താവ് ആവശ്യപ്പെടാതെ അൺസോളിസിറ്റഡ് കാർഡായി നൽകുകയും ഉപയോഗിക്കുകയും ചെയ്താൽ, ചാർജുകൾ റദ്ദാക്കുകയും ചാർജുകൾ അടയ്ക്കുന്നതിന് ബാങ്കിനെ ബാധ്യസ്ഥനാക്കുകയും ചെയ്യും. അതിനുപുറമെ, ബാങ്കുകൾ ഡൂ നോട്ട് കോൾ രജിസ്ട്രി (DNCR)യെ ബഹുമാനിക്കുകയും തേർഡ് പാർട്ടികൾക്ക് വ്യക്തിഗത ഉപഭോക്തൃ ഡാറ്റ നൽകുകയും ചെയ്യരുത്.

തട്ടിപ്പ് സംബന്ധിച്ച ആർബിഐ നിർദേശം

ഇടപാടുകളുമായി ബന്ധപ്പെട്ടുള്ള തട്ടിപ്പ് സംബന്ധിച്ച് വ്യക്തമായ നിർദ്ദേശങ്ങളുണ്ട്. തട്ടിപ്പിന് ഉപഭോക്താക്കൾ ഉത്തരവാദികളായിരിക്കില്ലെന്ന് ആർബിഐ നിർദേശമുണ്ട്. കാർഡ്, പിൻ, അല്ലെങ്കിൽ വെൽക്കം കിറ്റ് നിങ്ങളുടെ കൈവശം എത്തിയിട്ടില്ലെങ്കിൽ കൂടാതെ അനധികൃത ഇടപാട് നടന്നിട്ടുണ്ടെങ്കിൽ, അതിന് നിങ്ങൾ ഉത്തരവാദിയായിരിക്കില്ല. ഇടപാടുകളിൽ തർക്കമുണ്ടെങ്കിൽ, 60 ദിവസത്തിനുള്ളിൽ രേഖകൾ സമർപ്പിച്ച് ബാങ്കിൽ നിന്ന് വിശദീകരണം തേടാവുന്നതാണ്. ഇഷ്യൂ ചെയ്യുന്ന അതോറിറ്റിക്ക് അന്വേഷണത്തിനുള്ള ഒരു അപേക്ഷയും ബാക്കിംഗ് ഡോക്യുമെന്റുകളും സമർപ്പിക്കാവുന്നതാണ്.

ഇവിടെ സമയത്തിന് വളരെയധികം പ്രാധാന്യമുണ്ട്, അതിനാൽ ക്രെഡിറ്റ് കാർഡ് ഇടപാടുകളിൽ എന്തെങ്കിലും പൊരുത്തക്കേടുകൾ ശ്രദ്ധയിൽപ്പെട്ടാൽ അല്ലെങ്കിൽ എന്തെങ്കിലും സംശയങ്ങൾ തോന്നിയാൽ, എത്രയും വേഗം നിങ്ങളുടെ ക്രെഡിറ്റ് ബ്യൂറോയെയും നാഷണൽ സൈബർ ക്രൈം റിപ്പോർട്ടിംഗ് പോർട്ടൽ പോലുള്ള ബന്ധപ്പെട്ട അധികാരികളെയും അറിയിക്കുക. അതിനുള്ള ഔദ്യോഗിക വെബ്‌സൈറ്റ്: https://cybercrime.gov.in.

നിയമവശങ്ങൾ

2019 ലെ ഉപഭോക്തൃ സംരക്ഷണ നിയമം അനുസരിച്ച് തട്ടിപ്പ് ശ്രദ്ധയിൽപ്പെട്ടാൽ ജില്ലാ തലത്തിലോ സംസ്ഥാന തലത്തിലോ പരാതികൾ നൽകാം. അഭിഭാഷകന്റെ സഹായമില്ലാതെ ബാങ്കിംഗ് ഓംബുഡ്‌സ്മാൻ വഴി പരാതികൾ നൽകാൻ കഴിയും. ക്രെഡിറ്റ് കാർഡ് ഉപയോക്താക്കൾ അവരുടെ സംരക്ഷണത്തിനായി ഈ വ്യവസ്ഥകൾ മനസിലാക്കേണ്ടത് പ്രധാനമാണ്.

ഇതിനുപുറമെ, ബാങ്കുകളും എൻ‌ബി‌എഫ്‌സികളും ന്യായമായ രീതിയിൽ കടം തിരിച്ചുപിടിക്കാനുള്ള രീതികൾ നോക്കണം. അക്രമം, ഭീഷണികൾ, ഉപദ്രവം അല്ലെങ്കിൽ ഉപഭോക്തൃ രഹസ്യസ്വഭാവം ലംഘിക്കുന്ന മറ്റേതെങ്കിലും രീതി ഉപയോഗിക്കുന്നത് ധനകാര്യ സ്ഥാപനങ്ങൾക്ക് നിയമപരമായ ശിക്ഷകൾ ലഭിക്കാനുള്ള സാധ്യതയുണ്ട്. 2007 ലെ പേയ്‌മെന്റ് ആൻഡ് സെറ്റിൽമെന്റ് സിസ്റ്റംസ് ആക്റ്റ് കാർഡ് ഇടപാടുകൾക്ക് സുരക്ഷിതമായ പേയ്‌മെന്റ് സംവിധാനങ്ങൾ നൽകുന്നു, കൂടാതെ വഞ്ചനയോ സിസ്റ്റം തകരാറോ ഉണ്ടായാൽ ഓപ്പറേറ്റർമാർ ഉത്തരവാദികളായിരിക്കും. ഈ ഉപഭോക്തൃ അവകാശങ്ങളെക്കുറിച്ച് സ്വയം ബോധവാന്മാരാകുക. തട്ടിപ്പുകൾ യഥാസമയം റിപ്പോർട്ട് ചെയ്യുന്നത് സാമ്പത്തിക നഷ്ടങ്ങളിൽ നിന്നും രക്ഷ നേടാൻ സഹായിക്കും.