2000 രൂപ നോട്ടുകൾ ഇപ്പോഴും കയ്യിലുണ്ടോ? എവിടെ, എങ്ങനെ മാറ്റിയെടുക്കാമെന്ന് അറിയാം

നിങ്ങളുടെ കയ്യിൽ ഇപ്പോഴും 2000 രൂപ നോട്ടുകളുണ്ടോ? അവ എങ്ങനെ മാറ്റിയെടുക്കുമെന്ന് ചിന്തിക്കുകയാണോ?. 2,000 രൂപ നോട്ടുകൾ കൈവശമുള്ള പൗരന്മാരെ സഹായിക്കാൻ റിസർവ് ബാങ്ക് ഓഫ് ഇന്ത്യ (ആർബിഐ) മുന്നോട്ടുവന്നിട്ടുണ്ട്. ഈ നോട്ടുകൾ മാറ്റി വാങ്ങാനോ നിക്ഷേപിക്കാനോ ഉള്ള നിരവധി ഓപ്ഷനുകൾ സെൻട്രൽ ബാങ്ക് വിശദമാക്കിയിട്ടുണ്ട്.

ഏതെങ്കിലും ആർബിഐ ശാഖയിലോ പോസ്റ്റ് ഓഫീസുകളിലോ നേരിട്ടെത്തി നോട്ടുകൾ മാറ്റി വാങ്ങാനോ നിക്ഷേപിക്കാനോ സാധിക്കുമെന്ന് ആർബിഐ പറയുന്നു. നിലവിൽ രാജ്യത്തുടനീളമുള്ള 19 ആർബിഐ ഓഫീസുകളിൽ ആളുകൾക്ക് 2000 രൂപ നിക്ഷേപിക്കാനോ മാറ്റി വാങ്ങാനോ ഉള്ള സൗകര്യം ഉണ്ട്. ഇന്ത്യയിലെ അവരുടെ ബാങ്ക് അക്കൗണ്ടുകളിലേക്ക് തുക ക്രെഡിറ്റ് ചെയ്യുന്നതിനായി ആളുകൾക്ക് ഈ നോട്ടുകൾ തപാൽ ഓഫീസിൽ നിന്ന് ഏത് ആർബിഐ ഇഷ്യൂ ഓഫീസിലേക്കും ഇന്ത്യ പോസ്റ്റ് വഴി അയയ്‌ക്കാനുള്ള സൗകര്യവും ലഭ്യമാണ്.

പോസ്റ്റ് ഓഫീസുകൾ വഴി 2000 രൂപ നോട്ടുകൾ എങ്ങനെ മാറ്റി വാങ്ങാം

2023 മേയിലാണ് റിസർവ് ബാങ്ക് ഓഫ് ഇന്ത്യ (ആർബിഐ) 2000 രൂപയുടെ നോട്ടുകള്‍ പിന്‍വലിക്കുന്നതായി പ്രഖ്യാപിച്ചത്. എന്നാൽ, വ്യക്തികൾക്കോ ​​സ്ഥാപനങ്ങൾക്കോ ​​2000 രൂപ നോട്ടുകൾ ഏത് തപാൽ ഓഫീസ് വഴിയും മാറ്റിയെടുക്കാമെന്ന് ആർബിഐ അടുത്തിടെ വ്യക്തമാക്കി.

1. അപേക്ഷാ ഫോം ഡൗൺലോഡ് ചെയ്യുക: ആർബിഐ വെബ്സൈറ്റ് സന്ദർശിച്ച് ഹോംപേജിലെ 'Forms-Others' എന്ന സെഷൻ കണ്ടെത്തുക. 2000 രൂപ നോട്ടുകൾ മാറ്റുന്നതിനുള്ള അപേക്ഷാ ഫോം ഡൗൺലോഡ് ചെയ്ത് പൂരിപ്പിക്കുക.

2. ആവശ്യമായ രേഖകൾ അറ്റാച്ച് ചെയ്യുക: അപേക്ഷാ ഫോമിനൊപ്പം, ഒഫീഷ്യലി വാലിഡ് ഡോക്യുമെന്റിന്ഖെ (OVD) പകർപ്പും സമർപ്പിക്കണം. ആധാർ കാർഡ്, പാസ്‌പോർട്ട്, വോട്ടർ ഐഡി, ഡ്രൈവിംഗ് ലൈസൻസ്, NREGA കാർഡ്, പാൻ കാർഡ്, സർക്കാർ വകുപ്പോ പൊതുമേഖലാ യൂണിറ്റോ നൽകുന്ന തിരിച്ചറിയൽ കാർഡ് എന്നിവ ഒവിഡികളിൽ ഉൾപ്പെടുന്നു. കൂടാതെ, ബാങ്ക് അക്കൗണ്ട് വിവരങ്ങളുടെ ഒരു കോപ്പി ഉൾപ്പെടുത്തുക, സമീപകാല ബാങ്ക് സ്റ്റേറ്റ്‌മെന്റ് അല്ലെങ്കിൽ നിങ്ങളുടെ പാസ്‌ബുക്കിന്റെ ആദ്യ പേജ് ആകാം.

3. ഏതെങ്കിലും പോസ്റ്റ് ഓഫീസിൽ രേഖകൾ സമർപ്പിക്കുക: രേഖകൾ തയ്യാറായിക്കഴിഞ്ഞാൽ, 2,000 രൂപ നോട്ടുകൾക്കൊപ്പം രാജ്യത്തെ ഏത് തപാൽ ഓഫീസിലും സമർപ്പിക്കുക. പോസ്റ്റ് ഓഫീസുകൾ ഇത് 19 നിയുക്ത ആർബിഐ ഇഷ്യൂ ഓഫീസുകളിൽ ഒന്നിലേക്ക് അയയ്ക്കും.

4. ബാങ്ക് അക്കൗണ്ടിലേക്ക് ക്രെഡിറ്റ് ചെയ്യും: ആർബിഐ നടപടിക്രമങ്ങൾ പൂർത്തിയായശേഷം തുക നിങ്ങളുടെ ബാങ്ക് അക്കൗണ്ടിലേക്ക് നേരിട്ട് ക്രെഡിറ്റ് ചെയ്യും.