റിട്ടയർമെന്റ് കാലം സുരക്ഷിതമാക്കാം... ഇൻഷുറൻസ് പോളിസിയിൽ പരമാവധി നേട്ടം, ഈ കാര്യങ്ങൾ ശ്രദ്ധിക്കൂ

ജീവിതത്തിന്റെ നല്ല കാലം മുഴുവൻ ജോലി ചെയ്യുമ്പോൾ എല്ലാവരും കരുതുന്നത് റിട്ടയർമെന്റിന് ശേഷം സുഖമായി ജീവിക്കാം എന്നാണ്. എന്നാൽ കൃത്യമായ സാമ്പത്തിക ആസൂത്രണം ഇല്ലെങ്കിൽ റിട്ടയർമെന്റ് ജീവിതം പ്രശ്നങ്ങൾ നിറഞ്ഞതായിരിക്കും. സാമ്പത്തിക ഭദ്രത നേടാൻ ഏതെങ്കിലും പദ്ധതിയിൽ നിക്ഷേപം നടത്തണം. അതോടൊപ്പം ഏറ്റവും പ്രധാനപ്പെട്ട മറ്റൊരു കാര്യം നിർബന്ധമായും ആരോഗ്യ ഇൻഷുറൻസ് ഉണ്ടായിരിക്കണം എന്നതാണ്. കാരണം പ്രായമാകുമ്പോൾ തീർച്ചയായും ജീവിതശൈലി രോഗങ്ങൾ വേട്ടയാടാൻ തുടങ്ങും. അതുകൊണ്ടുതന്നെ ആരോഗ്യ ഇൻഷുറൻസ് ഉണ്ടെങ്കിൽ കുടുംബത്തിന് സാമ്പത്തിക ഭാരം അടിച്ചേൽപ്പിക്കാതെ ഗുണനിലവാരമുള്ള ആരോഗ്യ സംരക്ഷണം നേടാൻ മുതിർന്ന പൗരന്മാർക്ക് സാധിക്കും.

വിപണിയിൽ നിരവധി ലൈഫ് ഇൻഷുറൻസ് പോളിസികൾ ലഭ്യമാണ്. അതുകൊണ്ടുതന്നെ ഏതെങ്കിലും ലൈഫ് ഇൻഷുറൻസ് പോളിസി തിരഞ്ഞെടുക്കുക എന്നതിനപ്പുറം ഏറ്റവും അനുയോജ്യമായവ തിരഞ്ഞെടുക്കാൻ പ്രത്യേകം ശ്രദ്ധിക്കണം. പ്രീമിയം തുക, ചികിത്സ ലഭിക്കുന്ന സ്ഥലങ്ങൾ, മറ്റ് വ്യവസ്ഥകൾ തുടങ്ങിയവ കൃത്യമായി മനസ്സിലാക്കിയതിനു ശേഷം മാത്രമേ ലൈഫ് ഇൻഷുറൻസ് പോളിസിയിൽ ചേരാൻ പാടുള്ളു. ഒരു ലൈഫ് ഇൻഷുറൻസ് പദ്ധതിയിൽ ചേരുന്നതിനു മുൻപ് പരിഗണിക്കേണ്ട ചില കാര്യങ്ങൾ പരിശോധിക്കാം.

കവറേജ് പരിധി പരിശോധിക്കുക

ആരോ​ഗ്യ ഇൻഷുറൻസ് പോളിസികളിൽ ആരോ​ഗ്യ സേവനദാതാക്കളുടെ ഒരു നെറ്റ് വർക്ക് ലഭ്യമാക്കിയിരിക്കും. ഇവിടങ്ങളിൽ പോളിസി ഉടമകൾക്ക് ആനുകൂല്യങ്ങൾ/ പോളിസി കവറേജ് ലഭിക്കുന്നു. കവറേജ് എടുക്കുന്നവർ മുൻ​ഗണന നൽകുന്ന ഡോക്ടർമാർ, ഹോസ്പിറ്റലുകൾ, സ്പെഷ്യലിസ്റ്റുകൾ എന്നിവ ഈ നെറ്റ് വർക്കിൽ ഉൾപ്പെട്ടിട്ടുണ്ടോ എന്ന് പലരും പരിശോധിക്കാറില്ല. അതുകൊണ്ടുതന്നെ ലൈഫ് ഇൻഷുറൻസ് പോളിസിയിൽ ചേരുന്നതിനു മുൻപ് കവറേജ് പരിധികൾ, വെയിറ്റിംഗ് പിരിയഡ്, ഒഴിവാക്കലുകൾ എന്നിവ പോലുള്ള ഘടകങ്ങൾ പരിഗണിക്കുകയും അവ വിലയിരുത്തുകയും ചെയ്യുക.

നിലവിലുള്ള ആരോഗ്യ പ്രശ്നങ്ങൾ

പല മുതിർന്ന പൗരന്മാർക്കും പോളിസിയിൽ അംഗങ്ങളാകുമ്പോൾ തന്നെ ആരോഗ്യ പ്രശ്നങ്ങൾ ഉണ്ടായേക്കാം. അതുകൊണ്ടുതന്നെ ഈ പ്രശ്നങ്ങളെ ഉൾക്കൊള്ളുന്ന ആരോഗ്യ ഇൻഷുറൻസ് പോളിസി തിരഞ്ഞെടുക്കുന്നത് നിർണായകമാണ്. ആരോഗ്യ ഇൻഷുറൻസിനായി അപേക്ഷിക്കുമ്പോൾ, നിലവിലുള്ള അവസ്ഥകൾ വെളിപ്പെടുത്തുന്നത് നിർണായകമാണ്. നിലവിലുള്ള പ്രശ്നങ്ങൾ വെളിപ്പെടുത്തിയില്ലെങ്കിൽ പോളിസി റദ്ദാക്കലിന് കാരണമാകാം. കവറേജ് നൽകുന്നതിൽ ഉൾപ്പെട്ടിരിക്കുന്ന അപകടസാധ്യത കൃത്യമായി വിലയിരുത്തുന്നതിന് ഇൻഷുറൻസ് കമ്പനികൾക്ക് മുൻകാല വ്യവസ്ഥകളെക്കുറിച്ച് അറിയേണ്ടതുണ്ട്. ഇൻഷുറൻസ് കമ്പനികൾ സാധാരണയായി അപേക്ഷാ ഫോമിൽ നിലവിലുള്ള ഏതെങ്കിലും വ്യവസ്ഥകളെക്കുറിച്ചുള്ള വിവരങ്ങൾ നൽകാൻ അപേക്ഷകരോട് ആവശ്യപ്പെടുന്നു. ചില ഇൻഷുറൻസ് കമ്പനികൾക്ക് ഒരു മെഡിക്കൽ പരിശോധനയോ അല്ലെങ്കിൽ മെഡിക്കൽ റെക്കോർഡുകളുടെ അവലോകനമോ ആവശ്യമായി വന്നേക്കാം.

ആശുപത്രികളുടെ ശൃംഖല

ഇൻഷുറൻസ് കമ്പനിയുമായി ബന്ധമുള്ള ആശുപത്രികളിൽ മാത്രമേ ആരോഗ്യ ഇൻഷുറൻസ് ഉടമയ്ക്ക് പണരഹിത ചികിത്സ ലഭ്യമാകൂ. ഓരോ ഇൻഷുറൻസ് കമ്പനിക്കും മെഡിക്കൽ സർവീസ് പ്രൊവൈഡർമാരുടെ ഒരു സ്വതന്ത്ര ശൃംഖലയുണ്ട്. അതുകൊണ്ടുതന്നെ ആശുപത്രികളുടെ വിപുലമായ ശൃംഖലയുള്ള പോളിസികൾ തിരഞ്ഞെടുക്കുക. അതുവഴി ഗുണമേന്മയുള്ള ആരോഗ്യ സേവനങ്ങൾ തടസ്സമില്ലാതെ ലഭ്യമാക്കാൻ കഴിയും.

കോ-പേയ്‌മെന്റും സബ്‌ലിമിറ്റുകളും

ആരോഗ്യ ഇൻഷുറൻസിൽ, ഇൻഷ്വർ ചെയ്തയാൾ അടയ്‌ക്കേണ്ട ക്ലെയിം തുകയുടെ ഒരു നിശ്ചിത ശതമാനമാണ് കോ-പേയ്‌മെന്റ്.പോളിസി വാങ്ങുന്ന സമയത്താണ് ഈ ശതമാനം തീരുമാനിക്കുന്നത്. അതിനാൽ വാങ്ങുന്നതിന് മുമ്പ് ബാധകമായ ഏതെങ്കിലും കോ-പേയ്‌മെന്റ് ഉണ്ടെങ്കിൽ അതിനെക്കുറിച്ച് കൃത്യമായി മനസ്സിലാക്കുക. കൂടാതെ, പോളിസികൾക്ക് നിർദ്ദിഷ്ട ചികിത്സകളിൽ ചില പരിധികൾ ഉണ്ടാകും. ഈ വശങ്ങൾ മനസ്സിലാക്കുകയും വിലയിരുത്തുകയും ചെയ്യുന്നത് നിർണായകമാണ്.

മുൻഗണനകളിലെ മാറ്റം

വർഷം ചെല്ലുന്തോറും നിങ്ങളുടെ ആരോഗ്യപരമായ മുൻഗണനകൾ മാറിക്കൊണ്ടിരിക്കാം. ഇക്കാരണത്താൽ എല്ലാ വർഷവും പോളിസി റിവ്യൂ ചെയ്യേണ്ടത് ആവശ്യമാണ്. അതോടൊപ്പം പോളിസി ആവശ്യമെങ്കിൽ നവീകരിക്കുകയും ചെയ്യുക.

ലൈഫ് ഇൻഷുറൻസ് പോളിസിയിൽ ചേരുമ്പോൾ പോളിസി വിവരങ്ങൾ കൃത്യമായി വായിക്കാനോ, അവയുടെ സമ​ഗ്രമായ അർത്ഥം മനസ്സിലാക്കാനോ പലരും ശ്രമിക്കാറില്ല. അടിയന്തിര സാഹചര്യങ്ങളിൽ പാളിച്ച വരാതിരിക്കണമെങ്കിൽ പോളിസി സംബന്ധമായ വിവരങ്ങൾ കൃത്യമായി അറിഞ്ഞിരിക്കേണ്ടത് ആവശ്യമാണ്.