ക്രെഡിറ്റ് കാർഡ് യുപിഐയുമായി ബന്ധിപ്പിക്കാൻ ഒരുങ്ങുകയാണോ?ഗുണങ്ങൾ മാത്രമല്ല, ദോഷങ്ങളും അറിഞ്ഞിരിക്കാം…

ഡിജിറ്റൽ ഇന്ത്യയിൽ അതിവേഗം പ്രചാരം ലഭിച്ച പണമിടപാട് സംവിധാനമാണ് യൂണിഫൈഡ് പേമെന്റ് ഇന്റർഫെയ്സ് അഥവ യുപിഐ. ഇന്ന് ദൈനംദിന പണമിടപാടുകൾക്ക് ഇപ്പോൾ കൂടുതൽ ആളുകളും യുപിഐ സേവനങ്ങൾ പ്രയോജനപ്പെടുത്തുന്നത്. നിരവധി യുപിഐ ആപ്ലിക്കേഷനുകളും നിലവിൽ വിപണിയിലപണ്ട്. ഗൂഗിൾ പേ, ഫോൺ പേ തുടങ്ങിയ വമ്പന്മാർക്കൊപ്പം മൊബിക്വിക്, ഭീം ആപ്പ്, ഭാരത് പേ തുടങ്ങിയ യുപിഐ ആപ്ലിക്കേഷനുകളും വിവിധ ബാങ്കുകൾ തന്നെ വികസിപ്പിച്ചെടുത്തവയും യുപിഐ ഇടപാടുകളുടെ സ്വീകാര്യത വർധിപ്പിക്കുന്നതിൽ സുപ്രധാന പങ്കുവഹിച്ചു. യുപിഐ സംവിധാനം ഉപയോഗിക്കുന്നതിന് വ്യക്തികൾക്ക് ഇതിൽ ഏതെങ്കിലും ആപ്ലിക്കേഷൻ ഡൗൺലോഡ് ചെയ്ത് അവരുടെ ബാങ്ക് അക്കൗണ്ടുമായി ബന്ധിപ്പിച്ചാൽ മതിയാകും.

ഒരിക്കൽ ലിങ്ക് ചെയ്‌താൽ, ഉപയോക്താക്കൾക്ക് അവരുടെ യുപിഐ ഐഡി അല്ലെങ്കിൽ ക്യുആർ കോഡ് ഉപയോഗിച്ച് പണം അയയ്‌ക്കാനും സ്വീകരിക്കാനും കഴിയും. ബാങ്കിൽ ക്യൂ നിൽക്കാതെയും മറ്റ് കടമ്പകളൊന്നുമില്ലാതെയും അനായാസം പണമിടപാടുകൾ എപ്പോൾ വേണമെങ്കിലും ചെയ്യാൻ സാധിക്കുമെന്നതാണ് യുപിഐയുടെ പ്രധാന സവിശേഷത. ഇതിന് പ്രത്യേക നിരക്കും നൽകേണ്ടി വരുന്നില്ല. തുടക്കത്തിൽ, നിങ്ങളുടെ യുപിഐയിലേക്കുള്ള ഫണ്ട് ട്രാൻസ്ഫർ ഒരു ഡെബിറ്റ് കാർഡിലേക്കോ സേവിംഗ്സ് ബാങ്ക് അക്കൗണ്ടിലേക്കോ പരിമിതപ്പെടുത്തിയിരുന്നു. എന്നാൽ റിസർവ് ബാങ്ക് ഓഫ് ഇന്ത്യയുടെ ഏറ്റവും പുതിയ ചട്ടം ക്രെഡിറ്റ് കാർഡുകളുമായും യുപിഐ ബന്ധിപ്പിക്കാൻ അനുവദിക്കുന്നതാണ്. ഇത്തരത്തിൽ ക്രെഡിറ്റ് കാർഡും യുപിഐയും ബന്ധിപ്പിക്കുന്നതിന് മുൻപ് അതിന്റെ ഗുണങ്ങളും ദോഷങ്ങളും കൃത്യമായി മനസിലാക്കാം.

ഗുണങ്ങൾ

* ഒരു ക്രെഡിറ്റ് കാർഡ് യുപിഐയുമായി സംയോജിപ്പിക്കുന്നത് ചെറിയ ഇടപാടുകൾക്കും ക്രെഡിറ്റ് കാർഡുകൾ ഉപയോഗിക്കുന്നതിനുള്ള സൗകര്യം വർദ്ധിപ്പിക്കുന്നു. ക്രെഡിറ്റ് കാർഡ് ഉപയോഗം നിലവിൽ അവ സ്വീകരിക്കുന്ന സ്ഥാപനങ്ങളിലെ ഇടപാടുകൾ മാത്രമായി പരിമിതപ്പെടുത്തിയിരിക്കുന്നു. യുപിഐയുമായി ബന്ധിപ്പിക്കുന്നതിലൂടെ എല്ലാ ഓൺലൈൻ ഇടപാടുകളിലും ക്രെഡിറ്റ് കാർഡിന്റെ സേവനം ഉപയോഗപ്പെടുത്താം.

* റിവാർഡ് പ്രോഗ്രാമുകൾ ഇല്ലാത്ത ഡെബിറ്റ് കാർഡുകളെ അപേക്ഷിച്ച് ക്രെഡിറ്റ് കാർഡ് ഒരു പ്രധാന നേട്ടം തന്നെയാണ്. ക്രെഡിറ്റ് കാർഡ് യുപിഐയുമായി ലിങ്ക് ചെയ്യുന്നത് ഉപയോക്താക്കളെ അവരുടെ മൂല്യം പരിഗണിക്കാതെ തന്നെ എല്ലാ ഇടപാടുകൾക്കും റിവാർഡുകൾ നേടുന്നതിന് പ്രാപ്തരാക്കുന്നു.

* ചില ക്രെഡിറ്റ് കാർഡുകൾ ഇന്ധന പോയിന്റുകൾ, ഡൈനിംഗ് ആനുകൂല്യങ്ങൾ, ഷോപ്പിംഗ് ആനുകൂല്യങ്ങൾ എന്നിങ്ങനെ വിവിധ റിവാർഡുകൾ നൽകുന്നു. ഈ കാർഡുകൾ യുപിഐയിലേക്ക് ലിങ്ക് ചെയ്യുന്നത്, അതിന്റെ മൂല്യം പരിഗണിക്കാതെ തന്നെ ഓരോ ഇടപാടിനും അത്തരം റിവാർഡുകൾ നേടാൻ ഉപയോക്താക്കളെ അനുവദിക്കുന്നു.

* ക്രെഡിറ്റ് പരിധി കൂടുതലാണെന്നതുകൊണ്ട് തന്നെ യുപിഐയുമായി ലിങ്ക് ചെയ്‌ത ക്രെഡിറ്റ് കാർഡ് ഉള്ള വ്യക്തികൾക്ക് ഡെബിറ്റ് കാർഡ് ഉപയോഗിച്ച് ചെയ്യാൻ കഴിയുന്നതിനേക്കാൾ കൂടുതൽ പണം ചെലവാക്കാൻ അവസരം ലഭിക്കുന്നു. ചില അത്യാവശ്യ ഘട്ടങ്ങളിൽ ഉപഭോക്താവിന് അവരുടെ ബാങ്ക് അക്കൗണ്ടിൽ മതിയായ ഫണ്ട് ഇല്ലാത്ത സാഹചര്യത്തിൽ ഇത് പ്രയോജനകരമാണ്.

ദോഷങ്ങൾ

* ക്രെഡിറ്റ് കാർഡ് യുപിഐയുമായി ബന്ധപ്പെടുത്തുന്നത് അമിതമായി ചെലവഴിക്കാനുള്ള സാധ്യത വർദ്ധിപ്പിക്കും. നിലവിൽ കൈവശമില്ലാത്ത ഫണ്ട് ചെലവഴിക്കാൻ ഉപയോക്താക്കളെ അനുവദിക്കുന്ന ക്രെഡിറ്റ് കാർഡുകളുടെ സ്വഭാവമാണ് ഇതിന് കാരണം. ഇത്തരം ചെലവഴിക്കലുകൾക്ക് പലിശ നിരക്കുകൾ ഉണ്ടാകാം. ഒരു ക്രെഡിറ്റ് കാർഡ് യുപിഐയുമായി ബന്ധിപ്പിച്ചിരിക്കുമ്പോൾ അമിതമായി ചെലവഴിക്കുകയും അതിനുള്ള പലിശ അടയ്ക്കുകയും വേണ്ടി വരും.

* ക്യാഷ്ബാക്ക് അല്ലെങ്കിൽ ട്രാവൽ പോയിന്റുകൾ പോലുള്ള ആകർഷകമായ റിവാർഡ് പ്രോഗ്രാമുകളും ചെലവാക്കലുകൾക്ക് പ്രലോഭിപ്പിക്കും. ഓരോ മാസവും ക്രെഡിറ്റ് കാർഡ് ബിൽ പൂർണ്ണമായി തീർപ്പാക്കാനുള്ള മാർഗങ്ങൾ ഇല്ലെങ്കിൽപ്പോലും ഉപയോക്താക്കൾക്ക് ഈ റിവാർഡുകൾ അവരുടെ ചെലവുകൾക്കുള്ള ഒരു നേട്ടമായി കണക്കാക്കാം. ഇത്തരത്തിൽ യുപിഐ ഉപയോഗിച്ച് ക്രെഡിറ്റ് കാർഡുകൾ ഉപയോഗിക്കുന്നത് കടക്കെണിയിൽ വീഴാനുള്ള സാധ്യത വർദ്ധിപ്പിക്കുന്നു.

* ഉയർന്ന പലിശ നിരക്കാണ് ക്രെഡിറ്റ് കാർഡുകളുടേത്. പ്രതിവർഷം ഇത് 18 ശതമാനം മുതൽ 48 ശതമാനം വരെയാണ്. ഓരോ മാസവും ക്രെഡിറ്റ് കാർഡ് ബിൽ പൂർണ്ണമായി തീർപ്പാക്കുന്നതിൽ പരാജയപ്പെടുന്നത് കുടിശികയുള്ള തുകയ്ക്ക് കൂടുതൽ പലിശ നൽകുന്നതിലേക്കും നയിക്കും. ഒരു ക്രെഡിറ്റ് കാർഡ് യുപിഐയുമായി ബന്ധിപ്പിക്കുന്നതിന് മുൻപ് ക്രെഡിറ്റ് കാർഡുകളുമായി ബന്ധപ്പെട്ട ഉയർന്ന പലിശ നിരക്കുകൾ കൃത്യമായി മനസിലാക്കിയിരിക്കണം