ഉടൻ സ്വർണം വാങ്ങുന്നവർ തീർച്ചയായും അറിയേണ്ട പുതിയ ഹോൾ‌മാർ‌ക്കിംഗ് നിയമങ്ങൾ

എല്ലാ ജ്വല്ലറികളിലും ഹോൾമാർക്ക് സ്വർണ്ണാഭരണങ്ങൾ വിൽക്കുന്നത് കേന്ദ്ര സർക്കാർ നിർബന്ധമാക്കി. എന്നാൽ ബ്യൂറോ ഓഫ് ഇന്ത്യൻ സ്റ്റാൻഡേർഡുകളിൽ (ബിഐഎസ്) രജിസ്റ്റർ ചെയ്യാനും പഴയ സ്റ്റോക്കുകൾ മാറ്റാനും ജ്വല്ലറികൾക്ക് ഒരു വർഷത്തെ സമയം നൽകിയിട്ടുണ്ട്. 2021 ജനുവരി 15 മുതൽ ഹോൾമാർക്ക് ചെയ്യാത്ത ആഭരണങ്ങൾ വിൽക്കാൻ അനുവദിക്കില്ല.

എന്താണ് സ്വർണ്ണ ഹോൾമാർക്കിംഗ്?

വിലയേറിയ ലോഹത്തിന്റെ ആനുപാതിക ഉള്ളടക്കത്തിന്റെ കൃത്യമായ നിർണ്ണയവും ഔദ്യോഗിക റെക്കോർഡിംഗുമാണ് ഹോൾമാർക്കിംഗ്. വിലയേറിയ ലോഹത്തിന്റെ പരിശുദ്ധി സർട്ടിഫിക്കേഷനാണിത്. ഇന്ത്യയിൽ നിലവിൽ സ്വർണ്ണവും വെള്ളിയും ഹോൾമാർക്കിംഗിന്റെ പരിധിയിൽ ഉൾപ്പെടുന്നു.

മൂന്ന് വിഭാഗം

14 കാരറ്റ്, 18 കാരറ്റ്, 22 കാരറ്റ് എന്നിങ്ങനെ 3 വിഭാഗങ്ങളിലായി ആഭരണങ്ങൾക്ക് ഹോൾമാർക്കിംഗ് നടത്തും. സ്വർണ്ണാഭരണങ്ങൾക്കും കരകൌശല വസ്തുക്കൾക്കും ഹോൾമാർക്കിംഗ് നിർബന്ധമാക്കിയിട്ടുണ്ട്. സ്വർണ്ണാഭരണങ്ങൾ വാങ്ങുമ്പോൾ ഉപഭോക്താക്കൾ വഞ്ചിക്കപ്പെടുന്നില്ലെന്ന് ഉറപ്പാക്കാനാണ് ഈ നടപടിയെന്ന് കേന്ദ്രമന്ത്രി രാം വിലാസ് പാസ്വാൻ വ്യക്തമാക്കിയിരുന്നു.

നിരക്ക്

ആഭരണങ്ങൾ ഹോൾ‌മാർക്ക് ചെയ്യുന്നതിന് ചാർജുകൾ നൽകേണ്ടതുണ്ട്. ബിഐഎസ് വെബ്‌സൈറ്റ് അനുസരിച്ച്, ഒരു വസ്തുവിന് 35 രൂപ ഈടാക്കും. നിർബന്ധിത ഹോൾമാർക്കിംഗ് സ്വർണ്ണ ആഭരണങ്ങൾ വാങ്ങുമ്പോൾ ഉപയോക്താക്കൾ വഞ്ചിക്കപ്പെടുന്നില്ലെന്നും അടയാളപ്പെടുത്തിയിരിക്കുന്ന അതേ പരിശുദ്ധിയും കാരറ്റും ലഭിക്കുമെന്നും ഉറപ്പാക്കും.

അടയാളങ്ങൾ

സ്വർണ്ണാഭരണങ്ങളുടെ ഹാൾമാർക്കിൽ ഇപ്പോൾ നാല് അടയാളങ്ങളാണുള്ളത്.

• ബിഐസ് മാർക്ക്
• പരിശുദ്ധി കാരറ്റിൽ
• അസ്സേ സെന്ററിന്റെ പേര്
• ജ്വല്ലറികളുടെ തിരിച്ചറിയൽ അടയാളം