പേടിഎം മുതൽ ഗൂഗിൾ പേ വരെ; സ്വർണം വാങ്ങാൻ എട്ട് ആപ്ലിക്കേഷനുകൾ

സ്വർണത്തോട് എന്നും വൈകാരികമായ ബന്ധം കാത്തുസൂക്ഷിക്കുന്നവരാണ് ഇന്ത്യക്കാർ, പ്രത്യേകിച്ച് മലയാളികൾ. അടുത്ത കാലത്തായി സ്വർണത്തിൽ നിക്ഷേപിക്കുന്നവരുടെ എണ്ണത്തിലും വലിയ വർധനവാണ് ഉണ്ടായിരിക്കുന്നത്. ആഭരണങ്ങൾ വാങ്ങി കൂട്ടുന്നതിന് പകരം ഉത്തരവാദിത്വത്തോടെയുള്ള സ്വർണ നിക്ഷേപം വിപണിക്ക് ശുഭ സൂചനയാണ്. നിലവിൽ രണ്ട് തരത്തിലാണ് സ്വർണ നിക്ഷേപം സാധ്യമാകുന്നത്, ഭൗതിക സ്വർണവും ഡിജിറ്റൽ സ്വർണവും. ഭൗതിക നിക്ഷേപത്തിൽ ആഭരണങ്ങൾക്ക് പകരം നാണയങ്ങളായോ കട്ടികളിലോ നിക്ഷേപിക്കാം. ഡിജിറ്റൽ സ്വർണ നിക്ഷേപത്തിൽ സേവറിൻ ഗോൾ ബോൾഡ് ബോണ്ട് മുതൽ ഗോൾഡ് ടിടിഎഫ് വരെ നിരവധി നിക്ഷേപ സാധ്യതകൾ നിലവിലുണ്ട്.

നിക്ഷേപത്തിൽ ഡിജിറ്റൽ സ്വർണത്തിന്റെ തിരഞ്ഞെടുപ്പ് സൗകര്യപ്രദവും ബുദ്ധിപരവുമായിരിക്കുമെന്ന് സാമ്പത്തിക വിദഗ്ധർ ചൂണ്ടി കാണിക്കുന്നു. ആപ്പുകൾ വഴിയോ വെബ്സൈറ്റുകൾ വഴിയോ നിങ്ങൾക്ക് ഡിജിറ്റൽ സ്വർണത്തിൽ നിക്ഷേപിക്കാം. ഇത് ഭൗതിക സ്വർണ നിക്ഷേപത്തിലെ പല വെല്ലുവിളികൾക്കും പരിഹാരവുമാണ്. പരിശുദ്ധി, സുരക്ഷിതത്വം തുടങ്ങി നിരവധി കാര്യങ്ങളിൽ ഡിജിറ്റൽ സ്വർണ നിക്ഷേപം ഭൗതിക നിക്ഷേപത്തേക്കാൾ മുന്നിലാണ്. ഡിജിറ്റൽ സ്വർണത്തിലുള്ള നിങ്ങളുടെ നിക്ഷേപത്തിന് ഉയർന്ന വരുമാനവും പ്രതീക്ഷിക്കാം. നിങ്ങൾക്ക് ഡിജിറ്റൽ സ്വർണം വാങ്ങാൻ കഴിയുന്ന ചില ആപ്പുകൾ പരിചയപ്പെടാം.

ഗൂഗിൾ പേ അഥവ ജിപേ: നമ്മുടെ ദൈനംദിന യുപിഐ പേമെന്റ് ഇടപാടുകളിൽ ഏറ്റവും കൂടുതൽ പ്രചാരത്തിലുള്ള ആപ്ലിക്കേഷനാണ് ഗൂഗിൾ പേ. 99.9 ശതമാനം പരിശുദ്ധിയുള്ള 24 കാരറ്റ് സ്വർണം ഡിജിറ്റലായി വാങ്ങാനും വിൽക്കാനും കൈമാറ്റം ചെയ്യാനും ഉപയോക്താക്കളെ അനുവദിക്കുന്നതിന് ഇന്ത്യയിലെ എൽബിഎംഎ അക്രിഡേറ്റഡ് ഗോൾഡ് സിൽവർ റിഫൈനറിയായ എംഎംടിസി-പിഎഎംപിയുമായി ജി പേ സഹകരിക്കുന്നു. നിങ്ങൾ വാങ്ങിയ സ്വർണം ഡിജിറ്റൽ രൂപത്തിൽ സുരക്ഷിതമായി നിലനിൽക്കും, വിലയേറിയ ലോഹത്തിന്റെ നിലവിലുള്ള വിപണി വിലയനുസരിച്ച് നിങ്ങൾക്ക് എപ്പോൾ വേണമെങ്കിലും അത് ലിക്വിഡേറ്റ് ചെയ്യാം.

പേടിഎം: എംഎംടിസി-പിഎഎംപിയുമായി തന്നെ സഹകരിച്ചുകൊണ്ട് പേടിഎം 24 കാരറ്റ് 99.9 ശതമാനം ശുദ്ധിയുള്ള ഡിജിറ്റൽ സ്വർണം നിക്ഷേപകർക്ക് വാഗ്ദാനം ചെയ്യുന്നു. ഉപയോക്താക്കൾക്ക് അവരുടെ സ്വർണ്ണ ഹോൾഡിംഗ്സ് കാണാനോ വാങ്ങാനോ വിൽക്കാനോ അത് നൽകാനോ ഫിസിക്കൽ ഡെലിവറി സ്വീകരിക്കാനോ കഴിയും.

ഫോൺപേ: എംഎംടിസി-പിഎഎംപിയ്ക്ക് പുറമെ സെയ്ഫ്ഗോൾഡുമായും സഹകരിച്ചാണ് ഫോൺപേ നിക്ഷേപകർക്ക് ഡിജിറ്റൽ സ്വർണം നൽകുന്നത്. 24 കാരറ്റ് 99.9 ശതമാനം ശുദ്ധിയുള്ള ഡിജിറ്റൽ സ്വർണം തന്നെ ഇവിടെയും ലഭ്യമാകുന്നു. പരിവർത്തനത്തിനും സംഭരിക്കുന്നതിനും സുരക്ഷിതമാണ്. ഉപഭോക്താക്കൾക്കായി ക്യാഷ് ബാക്ക് ഓഫറും ഫോൺപേ പ്രഖ്യാപിച്ചിട്ടുണ്ട്.

5 പൈസ: ഈ സ്റ്റോക്ക് ട്രേഡിംഗ് ആപ്ലിക്കേഷൻ നിങ്ങൾക്ക് ഡിജിറ്റൽ സ്വർണ്ണത്തിൽ വ്യാപാരം ചെയ്യാനുള്ള ഓപ്ഷൻ നൽകുന്നു. നിങ്ങൾ നിക്ഷേപിച്ച സ്വർണം വിറ്റാൽ നിങ്ങൾക്ക് തൽക്ഷണ പണവും ലഭിക്കും. ഡിജിറ്റൽ സ്വർണ്ണത്തിൽ നിങ്ങൾക്ക് 100 രൂപയിൽ വരെ നിക്ഷേപം ആരംഭിക്കാം.

ഗ്രോ: സ്റ്റോക്ക്, കമ്മോഡിറ്റീസ് ട്രേഡിംഗ് പ്ലാറ്റ്‌ഫോം ഓഗ്‌മോണ്ട് ഗോൾഡുമായി സഹകരിച്ച് അതിന്റെ ക്ലയന്റുകളെ ഒരു തരത്തിലുള്ള പേപ്പർവർക്കുകളില്ലാതെ ഡിജിറ്റൽ സ്വർണ്ണം വാങ്ങാൻ പ്രാപ്‌തമാക്കുന്നു. ചെറിയ തുകകളിൽ നിക്ഷേപം തുടങ്ങാം. അക്കൗണ്ട് തുറക്കുന്നതിന് അധി ഫീസുകളൊന്നുമില്ല.

ആമസോൺ പേ: ഇ-കൊമേഴ്‌സ് ഭീമനായ ആമസോൺ, സേഫ്‌ഗോൾഡുമായി സഹകരിച്ച്, ആമസോൺ ആപ്ലിക്കേഷനിൽ തന്നെ ആമസോൺ പേ വഴി ഡിജിറ്റൽ സ്വർണം വാങ്ങാനുള്ള അവസരമൊരുക്കുന്നു. സ്വർണ്ണം സുരക്ഷിതമാണ്, ഒരാൾക്ക് എപ്പോൾ വേണമെങ്കിലും അതിന്റെ മൂല്യം പരിശോധിക്കാനും ഇടപാടുകൾ നടത്താനും സാധിക്കും.

എയർടെൽ പേയ്മെന്റ് ബാങ്ക്: എയർടെൽ പേയ്‌മെന്റ് ബാങ്ക് സേവിംഗ്‌സ് അക്കൗണ്ടുള്ള ഉപയോക്താക്കൾക്ക് 99.9 ശതമാനം പരിശുദ്ധിയുള്ള 24 കാരറ്റ് സ്വർണം ഡിജിറ്റൽ രൂപത്തിൽ വാങ്ങാം. നിങ്ങൾക്ക് ഇവിടെയും 100 രൂപ മുതലുള്ള നിക്ഷേപം സാധ്യമാണ്. കൂടാതെ വാങ്ങിയതിനുശേഷം സ്വർണം ഡെലിവറി ചെയ്യാനും കഴിയും.

ജൂപ്പിറ്റർ മണി: ഈ ആപ്പ് സാമ്പത്തിക മാനേജുമെന്റും ഡിജിറ്റൽ സ്വർണ്ണ നിക്ഷേപവും ഒരുമിച്ച് കൊണ്ടുവരുന്നു. ഉപയോക്താക്കൾക്ക് 99.9 ശതമാനം പരിശുദ്ധിയുള്ള 24 കാരറ്റ് സ്വർണം വാങ്ങാനും സ്വയമേവ ലാഭിക്കുന്നതിനുള്ള ഓപ്ഷനുകൾ സജ്ജീകരിക്കാനും അവരുടെ സ്വർണ്ണ നിക്ഷേപം നിരീക്ഷിക്കാനും കഴിയും.