പോസ്റ്റ് ഓഫീസ് എടിഎം കാർഡിന്റെ പ്രത്യേകതകൾ എന്തെല്ലം? നിങ്ങൾ തീർച്ചയായും അറിയേണ്ട കാര്യങ്ങൾ

പോസ്റ്റ് ഓഫീസ് വാഗ്ദാനം ചെയ്യുന്ന ചില നിക്ഷേപ മാർഗങ്ങളാണ് സേവിംഗ്സ് അക്കൗണ്ട്, റിക്കറിംഗ് ഡെപ്പോസിറ്റ് അക്കൌണ്ട് (ആർ‌ഡി), പബ്ലിക് പ്രൊവിഡൻറ് ഫണ്ട് (പി‌പി‌എഫ്), കിസാൻ വികാസ് പത്ര, പ്രതിമാസ വരുമാന പദ്ധതി, സുകന്യ സമൃദ്ധി യോജന, സീനിയർ സിറ്റിസൺ സേവിംഗ്സ് സ്കീം (എസ്‌സി‌എസ്എസ്) എന്നിവ. സേവിംഗ്സ് അക്കൗണ്ടിനൊപ്പം പോസ്റ്റ് ഓഫീസ് ചില പിൻവലിക്കൽ പരിധിയും ഇടപാട് നിരക്കുകളും ബാധകമായ എടിഎം കാർഡുകളും വാഗ്ദാനം ചെയ്യുന്നുണ്ട്. പോസ്റ്റ് ഓഫീസ് എടിഎം കാർഡുകളുടെ പ്രത്യേകതകൾ എന്തൊക്കെയെന്ന് പരിശോധിക്കാം.

പിൻവലിക്കൽ പരിധി

പോസ്റ്റ് ഓഫീസ് എടിഎം കാർഡ് വഴി പ്രതിദിനം 25,000 രൂപ പിൻവലിക്കാൻ സാധിക്കും. പോസ്റ്റ് ഓഫീസ് എടിഎം വഴി ഒരൊറ്റ ഇടപാടിൽ നിന്ന് പിൻവലിക്കാൻ കഴിയുന്ന പരമാവധി തുക 10,000 രൂപയാണ്. ഇന്ത്യ പോസ്റ്റ് എല്ലാ പോസ്റ്റ് ഓഫീസ് എടിഎമ്മുകളിലും ഉപഭോക്താക്കൾക്ക് സൌജന്യ ഇടപാടുകളാണ് വാഗ്ദാനം ചെയ്യുന്നത്.

സൌജന്യ ഇടപാട്

എല്ലാ പഞ്ചാബ് നാഷണൽ ബാങ്ക് എടിഎമ്മുകളിലും പോസ്റ്റ് ഓഫീസ് ഉപഭോക്താക്കൾക്ക് സൌജന്യ ഇടപാട് വാഗ്ദാനം ചെയ്യുന്നുണ്ട്. മെട്രോ നഗരങ്ങളിലെ മറ്റ് ബാങ്കിന്റെ എടിഎമ്മുകളിൽ ഡെബിറ്റ് കാർഡ് ഉപയോഗിക്കുമ്പോൾ ഒരു മാസത്തിൽ മൂന്ന് സൌജന്യ ഇടപാടുകളാണ് പോസ്റ്റ് ഓഫീസ് അനുവദിച്ചിരിക്കുന്നത്.

പരിധി കഴിഞ്ഞാൽ

മെട്രോ ഒഴികെയുള്ള നഗരങ്ങളിലെ മറ്റ് ബാങ്കിന്റെ എടിഎമ്മുകളിൽ പോസ്റ്റ് ഓഫീസ് ഡെബിറ്റ് കാർഡ് ഉപയോഗിക്കുമ്പോൾ ഒരു മാസത്തിൽ 5 സൌജന്യ ഇടപാടുകൾ ഇന്ത്യ പോസ്റ്റ് അനുവദിക്കുന്നു. മെട്രോകളിലും നോൺ-മെട്രോ നഗരങ്ങളിലും, നിശ്ചിത പരിധികളിൽ സാമ്പത്തിക, സാമ്പത്തികേതര ഇടപാടുകൾ ഉൾപ്പെടുന്നു. നിശ്ചിത പരിധി കഴിഞ്ഞാൽ ബാങ്ക് എടിഎമ്മുകളിൽ സാമ്പത്തിക, സാമ്പത്തികേതര ഇടപാടുകൾക്കായി ചില നിരക്കുകൾ നൽകണം.

നിരക്കും ജിഎസ്ടിയും

മറ്റ് ബാങ്കുകളുടെ എടിഎമ്മുകളിൽ, നിശ്ചിത സൌജന്യ ഇടപാടുകൾക്കപ്പുറമുള്ള ഏത് സാമ്പത്തിക ഇടപാടിനും 20 രൂപയും ബാധകമായ ജിഎസ്ടിയും ഈടാക്കും. മറ്റ് ബാങ്കുകളുടെ എടിഎമ്മുകളിൽ നിശ്ചിത സൌജന്യ ഇടപാടുകൾക്കപ്പുറമുള്ള ഏതെങ്കിലും സാമ്പത്തികേതര ഇടപാടുകൾക്ക് 8 രൂപയും ബാധകമായ ജിഎസ്ടിയും ഈടാക്കും.