സ്ഥിര നിക്ഷേപത്തെ മറന്നേക്കൂ..10 ലക്ഷം 20 ലക്ഷമാക്കാം, ഇതാണ് മികച്ച നിക്ഷേപ പദ്ധതികൾ

ഇന്ത്യയിലെ പോസ്റ്റ് ഓഫീസ് നിക്ഷേപ-സമ്പാദ്യ പദ്ധതികൾ സർക്കാർ പിന്തുണയുള്ളവയാണ്. അതുകൊണ്ടുതന്നെ അവ ഉറപ്പായതും അപകട സാധ്യത ഇല്ലാത്തതുമായ വരുമാനം നൽകുന്നു. പബ്ലിക് പ്രൊവിഡന്‍റ് ഫണ്ട് (പിപിഎഫ്), സീനിയർ സിറ്റിസൺ സേവിംഗ്സ് സ്കീം (എസ്‌സി‌എസ്‌എസ്), പ്രതിമാസ വരുമാന പദ്ധതി (എം‌ഐ‌എസ്) എന്നിവയുൾപ്പെടെയുള്ള ജനപ്രിയ പദ്ധതികൾ അപകട സാധ്യത ഇല്ലാത്ത നിക്ഷേപ പദ്ധതികൾ തേടുന്നവരെ ലക്ഷ്യം വച്ചുള്ളതാണ്.
കൂടാതെ, ആദായനികുതി നിയമത്തിലെ സെക്ഷൻ 80 സി പ്രകാരം 1.5 ലക്ഷം രൂപ വരെ നികുതി ആനുകൂല്യങ്ങളും പോസ്റ്റ് ഓഫീസ് നിക്ഷേപ പദ്ധതികൾ നൽകുന്നു. 8.2 ശതമാനം വരെ പലിശ നിരക്ക് നൽകുന്ന എട്ട് പോസ്റ്റ് ഓഫീസ് പദ്ധതികളെ നമുക്ക് പരിചയപ്പെടാം.

1. പോസ്റ്റ് ഓഫീസ് പ്രതിമാസ വരുമാന പദ്ധതി

ഈ പോസ്റ്റ് ഓഫീസ് സ്കീമിൽ നിക്ഷേപകർ ഒരു തവണ മാത്രം നിക്ഷേപിച്ചാൽ മതി. പ്രതിവർഷം 7.40 ശതമാനം പലിശ നിരക്ക് പദ്ധതി വാഗ്ധാനം ചെയ്യുന്നു. നിങ്ങൾക്ക് 100 രൂപ ഉപയോഗിച്ച് അക്കൗണ്ട് തുറന്ന് 1,000 രൂപയുടെ ഗുണിതങ്ങളിൽ നിക്ഷേപിക്കാം. ഒരു അക്കൗണ്ടിൽ, പരമാവധി നിക്ഷേപം 9 ലക്ഷം രൂപയാണ്. ജോയിന്‍റ് അക്കൗണ്ടിൽ പരമാവധി 15 ലക്ഷം രൂപ വരെ നിക്ഷേപിക്കാം

2. കിസാൻ വികാസ് പത്ര

പട്ടികയിലെ രണ്ടാമത്തെ പദ്ധതി കിസാൻ വികാസ് പത്ര (കെവിപി) ആണ്. ഇത് പ്രതിവർഷം 7.50 ശതമാനം പലിശ നിരക്ക് വാഗ്ധാനം ചെയ്യുന്നു. ഏറ്റവും കുറഞ്ഞ നിക്ഷേപം 1000 രൂപയാണ്. എന്നാൽ പരമാവധി നിക്ഷേപത്തിന് പരിധിയില്ല. 115 മാസമാണ് നിക്ഷേപ കാലാവധി.കെവിപി അക്കൗണ്ട് തുടങ്ങഇ 2 വര്‍ഷവും 6 മാസവും കഴിഞ്ഞാല്‍ എപ്പോള്‍ വേണമെങ്കിലും അതു പിന്‍വലിക്കാനും ഓപ്ഷന്‍ ഉണ്ടായിരിക്കും. ഈ പദ്ധതിയില്‍ 10 ലക്ഷം രൂപ നിക്ഷേപിച്ചെന്നു കരുതുക. കാലാവധി പൂര്‍ത്തിയാകുമ്പോള്‍ 20 ലക്ഷം രൂപ കൈയ്യില്‍ കിട്ടും.

3. സുകന്യ സമൃദ്ധി യോജന

സുകന്യ സമൃദ്ധി യോജന (SSY) ഒരു പെൺകുട്ടികളുടെ പ്രത്യേക പദ്ധതിയാണ്. ഈ പദ്ധതി പ്രകാരം, ഒരു പെൺകുട്ടിയുടെ മാതാപിതാക്കൾക്കോ ​​നിയമപരമായ രക്ഷിതാക്കൾക്കോ ​​ഒരു വർഷത്തിൽ പരമാവധി 1.50 ലക്ഷം രൂപ വരെ നിക്ഷേപിക്കാം. പദ്ധതി 8.2 ശതമാനം പലിശ നിരക്ക് നൽകുന്നു. ഈ പദ്ധതി നികുതി ആനുകൂല്യങ്ങളും വാഗ്ദാനം ചെയ്യുന്നു.

4. മുതിർന്ന പൗരന്മാരുടെ സേവിംഗ്സ് സ്കീം

ഉയർന്ന വരുമാനവും നികുതി ആനുകൂല്യങ്ങളും വാഗ്ദാനം ചെയ്യുന്ന ഒരു വിരമിക്കൽ സേവിംഗ്സ് പ്ലാനാണിത്. കുറഞ്ഞത് 1,000 രൂപ നിക്ഷേപിക്കണം, പരമാവധി 30 ലക്ഷം രൂപയുമാണ്. പലിശ നിരക്ക് പ്രതിവർഷം 8.2% ആണ്.

5. നാഷണൽ സേവിംഗ്സ് സർട്ടിഫിക്കറ്റ് (എൻ‌എസ്‌സി)

നാഷണൽ സേവിംഗ്സ് സർട്ടിഫിക്കറ്റ് വാർഷികമായി 7.70 ശതമാനം പലിശ നൽകുന്നു. ഒരാൾക്ക് കുറഞ്ഞത് 1,000 രൂപ വരെ നിക്ഷേപിക്കാം, പരമാവധി പരിധിയില്ല. എൻ‌എസ്‌സിക്ക് 5 വർഷത്തെ നിശ്ചിത കാലാവധിയുണ്ട്.

6. പോസ്റ്റ് ഓഫീസ് ആർ.ഡി

ഈ റിക്കറിംഗ് അക്കൗണ്ടിന് (RD) കീഴിൽ, നിങ്ങൾക്ക് പ്രതിവർഷം 6.70 ശതമാനം പലിശ ലഭിക്കും. ഒരാൾക്ക് കുറഞ്ഞത് 100 രൂപ നിക്ഷേപിക്കാം, പരമാവധി നിക്ഷേപ പരിധിയില്ല.

7. പബ്ലിക് പ്രൊവിഡന്‍റ് ഫണ്ട് (പിപിഎഫ്)

നികുതി രഹിത വരുമാനം വാഗ്ദാനം ചെയ്യുന്ന ദീർഘകാല സേവിംഗ് ഓപ്ഷനുകളിൽ ഒന്നാണ് പിപിഎഫ്. നിക്ഷേപകർക്ക് ഒരു വർഷത്തിൽ 500 മുതൽ 1.5 ലക്ഷം രൂപ വരെ നിക്ഷേപിക്കാം. ഈ പദ്ധതി പ്രതിവർഷം 7.10 ശതമാനം പലിശ നൽകുന്നു.

8. പോസ്റ്റ് ഓഫീസ് സേവിംഗ്സ് അക്കൗണ്ട്

വ്യക്തിഗത/ജോയിന്‍റ് അക്കൗണ്ടുകൾക്ക് പ്രതിവർഷം 4 ശതമാനം പലിശ നിരക്ക് ഇത് നൽകുന്നു. ഒരു അക്കൗണ്ട് ആരംഭിക്കാൻ ആവശ്യമായ ഏറ്റവും കുറഞ്ഞ തുക 500 രൂപയാണ്.