ഈ ബജറ്റിൽ വിവാഹിതർക്കും അവിവാഹിതർക്കും പ്രത്യേകം നികുതി സ്ലാബുകൾ

ഈ വർഷത്തെ കേന്ദ്ര ബജറ്റിന് ഇനി വെറും ദിവസങ്ങൾ മാത്രം ബാക്കി നിൽക്കെ, ആളുകൾ ആദായനികുതി സ്ലാബുകളിൽ മാറ്റങ്ങൾ പ്രതീക്ഷിക്കുന്നു. കാലങ്ങളായി ധനമന്ത്രിമാർ കേന്ദ്ര ബജറ്റിൽ നിരവധി ആദായനികുതി മാറ്റങ്ങൾ നിർദ്ദേശിച്ചിട്ടുണ്ട്. കുടുംബ അലവൻസുകൾക്ക് അനുയോജ്യമായ രീതിയിൽ വിവാഹിതർക്കും അവിവാഹിതർക്കും വിവിധ നികുതിയിളവ് സ്ലാബുകൾ നിർദ്ദേശിക്കുന്ന ബജറ്റും ഇന്ത്യയുടെ ചരിത്രത്തിൽ ഉണ്ടായിരുന്നു.

1950ലെ ബജറ്റ്

1950 കളിൽ, ആദായനികുതിയുടെ പരമാവധി നിരക്ക് 5 അണയിൽ നിന്ന് 4 അണ ആയി കുറക്കുകയും സമ്പത്ത് നികുതി ഏർപ്പെടുത്തുകയും ചെയ്തു. സിഡി ദേശ്മുഖ് ധനമന്ത്രിയായിരിക്കെ 1955-56 വർഷത്തെ ബജറ്റിലാണ് ഈ തീരുമാനം എടുത്തത്. കൂടാതെ ബജറ്റ് പ്രസംഗത്തിന്റെ ഹിന്ദി പതിപ്പ് പുറത്തിറക്കിയതും അതേ വർഷം തന്നെയാണ്. വാർഷിക ധനകാര്യ പ്രസ്താവനയുടെ ഹിന്ദി പതിപ്പുകളും വിശദീകരണ മെമ്മോറാണ്ടവും ആ വർഷം മുതൽ പ്രചരിപ്പിക്കപ്പെട്ടു.

വിവാഹിതർക്കും അവിവാഹിതർക്കും പ്രത്യേകം നികുതി

കമ്മീഷന്റെ ശുപാർശകൾക്കനുസൃതമായി 1,500 രൂപയുടെ നികുതിയിളവ് സ്ലാബ് വിവാഹിതർക്ക് 2,000 രൂപയായി ഉയർത്തുകയും അവിവാഹിതർക്ക് 1,000 രൂപയായി കുറയ്ക്കുകയും ചെയ്യുന്നുവെന്ന് അദ്ദേഹം പ്രസംഗത്തിൽ പറഞ്ഞു. വിവാഹതർക്കും അവിവാഹിതർക്കും ഏർപ്പെടുത്തിയ ആദായ നികുതി സ്ലാബുകൾ താഴെ പറയുന്നു.

1955-1956 സാമ്പത്തിക വർഷത്തിലെ വിവാഹിതരായ വ്യക്തികൾക്കുള്ള ആദായനികുതി സ്ലാബുകൾ

• 0 മുതൽ 2,000 രൂപ വരെ നികുതി സ്ലാബ് - ആദായനികുതി നൽകേണ്ടതില്ല
• 2,001 മുതൽ 5,000 രൂപ വരെ നികുതി സ്ലാബ് - ഒമ്പത് പൈസ
• 5,001 മുതൽ 7,500 രൂപ വരെ നികുതി സ്ലാബ് - ഒരു അണയും ഒമ്പത് പൈസയും
• 7,501 മുതൽ 10,000 രൂപ വരെ നികുതി സ്ലാബ് - രണ്ട് അണയും മൂന്ന് പൈസയും
• 10,001 മുതൽ 15,000 രൂപ വരെ നികുതി സ്ലാബ് - മൂന്ന് അണയും മൂന്ന് പൈസയും
• 15,001 രൂപയും അതിന് മുകളിലുള്ളതും - നാല് അണ

1955-1956 സാമ്പത്തിക വർഷത്തിലെ അവിവാഹിതരായ വ്യക്തികൾക്കുള്ള ആദായനികുതി സ്ലാബുകൾ:

• 0 മുതൽ 1,000 രൂപ വരെ - ആദായനികുതി ഇല്ല
• 1,001 മുതൽ 5,000 രൂപ വരെ - ഒമ്പത് പൈസ
• 5,001 മുതൽ 7,500 രൂപ വരെ - ഒരു അണയും ഒമ്പത് പൈസയും
• 7,501 മുതൽ 10,000 രൂപ വരെ - രണ്ട് അണയും മൂന്ന് പൈസയും
• 10,001 മുതൽ 15,000 രൂപ വരെ - മൂന്ന് അണയും മൂന്ന് പൈസയും
• 15,001 രൂപയും അതിന് മുകളിലുള്ളതും - നാല് അണ